7 نصائح عشان تحافظ على نشاط جسمك في الصيام

خلاص دخلنا رمضان والطاقة والتركيز في النازل.. خصوصًا مع الصيام وقلة النوم… عشان كده جمعنالكم شوية نصائح تعدوا بيها يومكم في رمضان بأقل الخساير سواء الصبح في الشغل أو الدراسة.. وكمان تقدروا بيها تكملوا يومكم بعد الفطار..وده وفقًا لـ منظمة الصحة العالمية و cleveland clinic

1- استفيد من فترات الذروة لدماغك:

اعرف الأوقات اللي بتحس فيها إنك فايق وركز على المهام الصعبة.. وخلي الباقي للمهام البسيطة.. يعني مثلا فترات النشاط الأكبر بتبدأ الصبح وبتقل تدريجيًا مع الصيام.. ويعني مرة تاسك ومرة بريك وأهي ماشية.

2- تمارين خفيفة خلال اليوم:

لا قدر الله لو روحت الجيم يبقى تمام وزي الفل.. لو لا جرب تتمشى شوية بعد الإفطار أو قبل السحور.. اعمل أي حاجة أي حاجة.

3- تنظيم النوم:

بما إن النوم في رمضان في ذمة الله.. فحاول تتمسك بأقل قدر ممكن منه.. يعني حدد مواعيد ثابتة للنوم بعد ماتخلص يومك.. وحاول تبعد عن استخدام الأجهزة الإلكترونية زي الموبايل أو اللاب توب قبل النوم لتحسين جودته.

4- فطار صحي:

حاول تبدأ فطارك بالتمر ويكون على الأكل سلطة..  لأن ده هيحافظ على مستويات الطاقة.. وخلي وجبة الفطار دايمًا متوازنة من البروتين والخضروات والكربوهيدرات.

5- التقليل من السكريات:

قلل من العصائر قبل الأكل والحلويات بعد الأكل.. لأنها بترفع نسبة الأنسولين وهتحسسك بالخمول وهيبقى المود السائد “بطة بلدي” ومش هتقدر تعمل حاجة.

6-  سحور صحي:

أحيانًا مابتحلقش تاكل كويس على الفطار.. فحاول بعد ماتخلص التزاماتك الدينية أو الحياتية إنك تتعشى.. وتختم بوجبة خفيفة وفاكهة وخضار فيه ألياف.. أحسن بكتير أنك تاكل وجبة دسمة في السحور وقبل النوم لان ده هيخليك لما تصحى مش شايف ولا مستوعب أي حاجة.

7- شرب المياه:

النصيحة الأزلية اوعى تنسى تشرب مياه وسوائل.. عشان تحافظ على جسمك من الجفاف.. وعندك وقت كبير من الفطار للسحور تعمل ده.. وسلملي على الحجج والأعذار