موضوع مايهمكش: 5 حاجات ماتحبش حد يعرفها عن شرابك

الشراب لا يقل أهمية عن باقي لبسك ودوره كبير في شياكتك.. فيه ناس بتختاره نفس لون لبسهم مخصوص عشان يكملوا الأوتفت.. بس برضه هو عليه حركات بايخة بيحب يحطنا فيها.. في اليوم العالمي لـ “من غير شرابات” جمعنالك شوية حاجات ماتحبش حد يعرفها عن شرابك

شكل شرابك

تبقى شخص وقور ليك هيبتك وكلمتك يتهزلها أشنبة ولابس بدلة وتيجي تقعد تلاقي شراب مليان سبونج بوب وبسيط يبوظوا الهيبة دي كلها

حالة الشراب

لما بتستنى صاحبك بالساعات تحت البيت ومابينزلش بيقولك اطلع تستنى فوق.. ساعتها بتتحط في موقف مش عامل حسابه وهو لما تخلع جزمتك.. هتلاقي صباعك الكبير خارج من شرابك المخروم وساعتها بتعمل نفسك مش واخد بالك أكرملك

الفردة والفردة

فيه حاجات مُقدر ليها إنها تختفي للأبد من غير أسباب.. الإكس والشرابات حاجة منهم.. مفيش مرة جبت شراب غير وفردته ضاعت وبيخليك ماشي بفردة وفردة

ريحة الشراب

الكمكمة اللي بتخرج من شرابك وسط أي قعدة كفيلة تضيع كل تعبك في البرفيومز المختلفة اللي بتحطها عشان ريحتك تكون لطيفة.. فاتأكد إنك غاسل رجلك كويس قبل ما تلبس الشراب.. وماتلبسش الشراب مرتين ورا بعض

عمر الشراب

لما بتلبس شراب معين أكتر من مرة لونه بيبدأ يتغير من بطن الرجل وشكله بيكون كأنه متوسخ حتى لو هو نضيف ولونه بيكون قلب للأسود.. الناس بتبدأ تشك في الـ hygiene بتاعتك

الشرابات وطولها وألوانها والمطبوع عليها بيعبر عن شخصيتك.. وتقدر توصل بيها رسالات خفية للي حواليك طالما كده كده بتبان بقى