مراجعة سريعة لـ فيلم He’s Just Not That Into You هتخليك تعيد تفكيرك في حاجات كتير تخص العلاقات
الفترة دي انتشرت مصطلحات كتير على السوشيال ميديا زي الـ ghosting والـ fear of commitment و trust issues وكل المبررات اللي ممكن نطلعها للأشخاص اللي بيختفوا فجأة من حياتنا بدون سبب واضح وعلى الرغم إن فيلم He’s Just Not That Into You اتعمل سنة 2009 إلا إنه بيجاوب بوضوح على السبب الرئيسي اللي بيخلي حد يختفي من حياتك أو يبطل يرد عليك.. عشان كده في الموضوع ده هنقولك التفسير بالظبط!
الفيلم واخد تقييم 6.4l10 وده يعتبر تقييم مش كبير آوي على IMDB لكنه من الكلاسيكيات الأمريكية المهمة اللي اتكلمت عن العلاقات بشكل مركز وصريح.. الفيلم بيتكلم عن أربع علاقات مختلفة عن”جيجي” اللي دايمًا بتسيء فهم إشارات الرجالة
و”بث”و”نيل” اللي بينهم مشكلة بسبب اختلاف رأيهم في فكرة الجواز.. و”جانين”اللي بيخونها جوزها”بين” وهي ماتعرفش.. وآخر علاقة هي “ماري”وصديقها”كونور” اللي بيديها mixed signals لكنها بتكتشف إنه غير مهتم.. والعلاقات الأربعة كلهم بيعانوا من مشاكل في التواصل بشكل مباشر أو إساءة فهم الإشارات من بعضهم لأنهم مابيتكلموش مع بعض بشكل واضح وده بيخلي كل واحد يفسر كل حاجة على مزاجه بالطريقة اللي ماتخليهوش يضايق نفسه عشان الدنيا تمشي ومش هنحرقلك الفيلم ونقولك على تفاصيل روح اتفرج بنفسك عشان تفهم ده بيحصل إزاي..
الفيلم كمان من بدايته وهو مركز على الفكرة اللي المجتمع بيحاول يرسخها في دماغ البنات مهما اختلفت الثقافات.. والفكرة هي إن لو في راجل بيعاملك بطريقة وحشة فهو بيحبك بس مش عايز يبين أو بيحاول يبقى تقيل أو فكرة إيجاد مبررات دايمة للراجل من الست نفسها أو من صحابها عشان تحس أحسن وماتحسش شعور الرفض زي إنه أكيد مهتم بس فيه سبب منعه وده مش صحيح لأن فعلا الراجل بيكون مش مهتم بالعلاقة مش أكتر!
عشان كده تيمة الفيلم اتقالت بشكل صريح على لسان واحد من الأبطال وهو “ألكس” لما صديقته “جيجي” راحت تسأله عن يا ترى ليه ممكن يكون سبب إن شخص مردش عليها وقعدت تقول أعذار كتير بس جاوب عليها أليكس وقالها:
If a guy doesn’t call you, he doesn’t want to call you.so trust me when I say if a guy is treating you like he doesn’t give a shit, he genuinely doesn’t give a shit. No exceptions.
وده بيوضح بشكل صريح اللي الفيلم عايز يوصله إن بدل مانفكر في الماورائيات في العلاقات إن أحيانا عدم الرد هو في حد ذاته إجابة وافية إن الإنسان مش مهتم ببساطة!.. وكمان وضح “أليكس” إن في أوقات قليلة جدا بيكون في استثناء.. وده يعني إن جايز فعلا الشخص عنده حاجة حقيقية مانعاه بس حتى لو ده حصل فلو الشخص مهتم فعلا هيفسر سبب الاختفاء وهيكون مهتم يرجع للصورة تاني!
من الآخر العلاقات وظيفتها إنها تبقى مريحة نفسيًا وصحيًا لينا فلو حاسس إنك بتشغل دماغك كتير وبتضيع وقت في تفسير أفعال اللي قدامك عشان تفهم هو عايز إيه الإجابة إن العلاقة مش مناسبة ليك لأن الشخص الصح هيكون واضح في تصرفاته وأفعاله وهيخليك ماتفكرش كتير!
