إيه هي ظاهرة قمر الفراولة؟
النهاردة هتشوف القمر في شكل مميز ونادر ليه.. ومش بتكلم عن الكراش عامة.. القمر اللي في السما هيحصله حاجة بتحصل مرة كل 18.6 سنة والمرة الجاية اللي هيحصله فيها كده هتكون في 2043 حسب موقع EarthSky والظاهرة دي اسمها “قمر الفراولة” أو “Strawberry moon”
إيه هو “قمر الفراولة”/ “Strawberry moon”؟ وليه اتسمى كده؟
القمر اتسمى بـ “الفراولة” عشان توقيته مش لونه.. دي ظاهرة بتحصله في شهر يونيو تحديدًا.. واتسمت الظاهرة كده عشان قبائل “ألجونكوين” في أمريكا الشمالية ربطوا اكتمال القمر في شهر يونيو بموسم حصاد الفراولة
هل ظهور “قمر الفراولة” ليه معنى؟
زمان الناس كانوا بيسموا بدر كل شهر باسم عشان يساعدهم في معرفة الفصول.. وقمر الفراولة إشارة إن ده آخر اكتمال للقمر في الربيع في نصف الكرة الشمالي وإن الصيف خلاص على الأبواب
هو “الفراولة” الاسم الوحيد للقمر ده؟
قمر الفراولة ليه أسامي تانية زي “القمر الوردي” أو “قمر الفقس” وده عشان مرتبط بفقس الحيوانات الصغيرة في أمريكا الشمالية
ليه “قمر الفراولة” مميز؟
قمر شهر يونيو بيتميز إنه بيبقى منخفض في السما في النص الشمالي من الكرة الأرضية.. بس الانخفاض ده المرادي هيكون أدنى اكتمال للقمر من عقود كتيرة وده عشان بيحصل حاجة اسمها “التوقف القمري” واللي هو اللحظة اللي القمر بيوصل فيها لأقصى نقطة شمالية أو جنوبية في مداره حوالين الأرض.. وده اللي بيخليه منخفض بشكل كبير في السما
