إزاي تبقى شخص حيادي أو موضوعي!

أوقات كتير بيبقى المفروض نقول رأينا في مشاكل حصلت بين ناس بنحبها وناس مابنحبهاش أوي وبشكل تلقائي جدا بنقول رأينا اللي بيبقى مبني على أساس مشاعرنا واللي بينصف الناس اللي بنحبهم بتعصب حتى لو هما اللي غلطانين أو فيه جزء من الغلط يخصهم فبننساه.

ولإن ده شئ مش عادل فلو بتعمل كده حاول ماتعملهوش أو ماتقولش رأيك وتتجنب إنك تتدخل خالص أو تتعلم تبقى شخص حيادي أو موضوعي وتشوف حقايق الأمور وتقول رأيك بإنصاف من غير أي مشاعر.

في الغالب فكرة التحيز وعدم الموضوعية دي أكتر مكان ممكن تحصل فيه هي الشغل أو أي مكان عمل عشان كده لازم يكون الشخص المسؤول يكون حقاني وحتى كمان زملاء العمل بيحتاجوا يبقوا منصفين وموضوعين أكتر في بعض المواقف عشان رأيهم بيكون مهم.

وبما إن بيئة العمل هي أكتر مكان محتاج تكون حقاني وموضوعي فيه فموقع calibre furniture قال في واحد من مقالاته إزاي تكون مدير أو شخص عادل ومنصف في الشغل وقال:

1- دور على الحقايق: 

ضروري لما تتعامل مع مواقف فيها اشتباك أو خناقة تركز بس على الحقايق، وبلاش تسمع لحدسك أو مشاعرك ولا تسأل أي شخص تاني حاسس بإيه، أهم حاجة بس إنك تركز على حقايق وتفاصيل الموقف نفسه وتتعامل معاها.

2- ركز إنك تبقى عادل مع الطرفين من غير تحيز:

لو سألت تعمل ده إزاي فهيكون بكل بسهولة هو إنك ماتفضلش جانب من الطرفين اللي في الصراع على التاني حتة لو كان جواك فيه ميل ولو صغير جدا، ولازم ماتسمحش بالمشاعر دي إنها تبان ولا تأثر عليك ولا على قرارك، ولازم كمان تسمع كل الأطراف وتسمعهم وقت بيساوي بعض ويبقى عندك نفس القواعد في التعامل مع الطرفين يعني مثلا ماتسمحش لطرف فيهم إنه يشتم التاني وكذلك الطرف التاني برضه، ولازم كمان تفضل بتعامل نفس الطرفين بنفس طريقة المعاملة حتى لو شايف إن فيهم طرف غلطان.

3- حاول تشجع الأطراف إنهم يحلوا المشكلة بنفسهم:

بدل ما تاخد موقف بناءًا على مشاعرك أو وجهة نظرك أنت.. حاول تقوم بدور الوسيط في الأول اللي بيشجع الطرفين يقعدوا مع بعض ويصلحوا المشكلة بنفسهم، ولو هما بنفسهم ماقدروش يحلوا الموضوع والموضوع اتطور بينهم للأسوأ عادي ممكن تتدخل خصوصا لو كنت شخص مسؤول عشان ماتحصلش أي تطورات أو الغلط يزيد بس حاول في الأول تشجعهم يكتشفوا المشكلة بنفسهم ويهدوا ويوصلوا للغلط بطريقتهم وبنفسهم.

 

4- ركز على المصلحة العامة:

ركز إيه المصلحة العامة للمكان كله سواء بقى كان الشركة أو المكتب أو التيم حت (ولو برا الشغل يبقى مصلحة افراد البيت كلهم أو مصلحة جروب الصحاب كله وهكذا)، فلو كان لازم يعني تتدخل وتحل المشكلة بنفسك فلازم تركز على مصلحة المكان بالكامل مش على شخص واحد، ولازم يبقى من ضمن نتايج التدخل ده إن المشكلة تبقى اتحلت بالكامل من غير أي ديول في المستقبل، ولا في أي مشاكل معنوية في داخل أي طرف أو شخص تاني.

أكيد طبعا كلنا بنميل لصحابنا وبنحاول نبعد عن اللي مابنحبهش ونلبسهم كمان في الحيطة، بس حاول كده تعمل اختبار لنفسك وتشوف أنت شخص متحيز ولا لا وتسأل نفسك لو دخلت حفلة هتقف مع كل الناس بنفس القدر من الوقت ونفس الحب ولا هتنجذب لمجموعة معينة وتحاول ماتسلمش على ناس معينة؟ هل لو شوفت شخص في الشارع ماشي هتحكم عليه وتشكل شوية مفاهيم عنه عن طريق مظهره سواء بالإعجاب أو الاشمئزاز؟

عموما هتلاقي أغلبنا بيعمل كده من غير ما يقصد عشان كده مهم إنك تدرب عقلك إنك تشوف الناس يستحقوا نفس القدر من الحب والرحمة، ولما تعمل ده هتلاقي نفسك بتتعامل مع الكل بطريقة فيها احترام وود.

وفي النهاية تقدر تدرب عقلك كل يوم لفترات إنه يهدي ويفتكر الأشخاص اللي بتكرهم وحاول تشوفهم بطريقة محايدة من غير نفور منهم، وتشوف العلاقات في حياتك بشكل صح وتسكن أدوار الناس في مكانها بطريقة مناسبة لوجودهم ومواقفهم من غير أي مشاعر منك تجاههم.. وخليك فاكر إن العدل شئ صعب في الأول والأخر.