ليه الناس بتبقى عصبية وعنيفة أكتر في الصيف؟

كتير من العلماء والباحثين درسوا تأثير الحر على العدوان والعنف، وتقريبا كلهم وصلوا لنفس النتيجة تقريبا: إن مع ارتفاع درجة الحرارة، العنف والعصبية والعدوانية بتزيد.

 

تعالوا نكتشف سبب ده حسب دراسات ومقالات وأوراق بحثية كتير اتنشرت في أماكن مختلفة زي Independent و The Guardian و Psychology Today  و Radboud Universiteit

 

البلاد والمدن الحر عندها معدلات جريمة أعلى، والدراسات بتقول إن كل ما قربت من خط الاستواء، كل ما معدلات العنف بتزيد.

 

الأيام والشهور والسنوات اللي فيها حر شديد بتؤدي لعنف وعصبية أكتر، في دراسة أمريكية امتدت لحوالي 45 سنة قالت إن الخناقات العنيفة بتزيد في السنين والفصول الأكثر حرارة، و Safe Traffic Netherlands نشرت إن معدلات الوفيات والإصابات المرتبطة بحوادث المرور بتزيد بنسبة 30% في الصيف مقارنة بالشتاء.

 

الناس بتبقى عنيفة وعصبية في الجو الحر بسبب ارتفاع درجة حرارة أجسامهم. ارتفاع درجة حرارة الجسم بيصاحبها زيادة في معدل ضربات القلب وضغط الدم والعرق والتنفس. والباحثين بيسموا ده “زيادة في إثارة الجسم”، والإثارة دي بتؤدي لحاجات تانية زي الغضب “من أسباب عادية أو صغيرة”، اللي بيؤدي بعد كده لـ العصبية والعنف.

 

بعض الخبراء بيقولوا إن التفاعلات الفسيولوجية للحرارة هي المسؤولة عن كل ده، درجات الحرارة المرتفعة بتزود معدلات ضربات القلب وهرمون التستوستيرون وردود الفعل التانية اللي بتحفز الجهاز العصبي، المسؤول عن انفعال الناس وميلهم للخناق والقتال.

 

ده غير إن فيه نظريات نفسية كتير، بتناقش “عدم الراحة” لو الشخص ماعندوش إمكانية الوصول لـ تكنولوجيا التحكم في المناخ زي التكييف، فبيبقى صعب إنه يهرب من الحر. والنظريات دي برضه بتستند على إن الجو لو برد، أنت ممكن تلبس طبقات أكتر فتتدفى، أما الحر فهو وراك في أي مكان وأي حال، ومع الرطوبة كمان، فالناس بيتضايقوا وبيتعصبوا وبيحسوا بالضغط من أي حاجة مش قادرين يتحكموا فيها، فبالتالي بيزيد معدل الغضب، والغضب ده بيبدأ يتحول لخناقات ومشاكل مع الناس لأي سبب.