موضوع مايهمكش: 15 حاجة ماتعرفهاش عن اللوز
اللوز من المكسرات اللي أغلب الناس بتحبها وأغلب الناس عارفة فوايدها وبتحبه سواء تاكله في المكسرات عادي أو حتى تحطه على أكلات معينة زي السلطة أو الرز وفيه ناس بتحبه في أشكال تانية زي لبن اللوز مثلا.
وبمناسبة يوم اللوز قررنا نقولك 15 حاجة ماتعرفهاش عن اللوز زي ما قال موقع “foodconfidence” و موقع “healthysupplies” في مقالاتهم عنه:
1- اللوز بيحتاج جو حر وشتاء ساقع عشان ينمو
2- اللوز عشان ينمو بيحتاج لنحل بنسبة 100% عشان تلقيح المحاصيل ومعنى كده لو مفيش نحل يعني مفيش لوز
3- مزارعين اللوز بيأجروا نحل للتلقيح ودي واحدة من أكتر المشاكل المكلفة بالنسبة للمزارعين
4- النحل كائنات صعبة خصوصا إنهم مابيشتغلوش تحت المطرة أو بليل أو الصبح بدري أو لما بيكون فيه صقيع وتلج.
5- بعض الناس بتحتفظ باللوز وهو أخضر من غير ما يكمل نضجه عشان تخلله وبيبقى بالنسبة لهم أكله طعمها حلو أوي
6- اللوز فيه منه 8 أصناف رئيسية ومن بين الأصناف دي فالـ “Nonpareil” هو اللي قيمته الغذائية أكتر (مع إن كل الأصناف ليهم نفس الخصائص الغذائية)
7- فيه حوالي 98 ورقة بحثية اتنشرت لحد دلوقتي، وفيه حوالي 19 ورقة لسه بيتعملوا، عن الأثار الصحية للوز وفوايده وتأثيره على صحة القلب والسكر وإدارة الوزن
8- اللوز من أول الأكلات اللي حصلت على شهادة صحية في أمريكا
9- اللوز بيساعد على إبطاء عملية امتصاص السكر والكربوهيدرات
10- الدراسات الحديثة اللي اتعملت مؤخرا بينت إن تناول اللوز في نص النهار بيساعد في ظبط نسبة السكر في الدم على مدار اليوم
11- ممكن تحتفظ باللوز لفترة طويلة بتوصل لسنتين بس يكون مش متقشر ويكون في التلاجة، وده لإنه بيحتوي على فيتامين “هـ” اللي بيساعد إنها تفضل طازة، لكن لو ماعندكش مكان في التلاجة ممكن تقفله كويس وتحطه في مكان ضلمة وبارد
12- اللوز من عائلة البرقوق زي الخوخ والكريز والمشمش، والمكسرات اللي عارفينها في الواقع هي بذور فاكهة، لكن على الفاكهة فأنت ماتقدرش تاكل الجزء اللي فيه لحم منها وبتاكل البذر
13- اللوز بيحتوي على أعلى نسبة بروتين من بين كل المكسرات لإن كل 100 جرام منه بيساوي 21.1 جرام بروتين وده بيخليه أعلى نسبة بروتين بين جميع المكسرات
14- دقيق اللوز يعتبر بديل كويس جدا لدقيق القمح وخالي من الجلوتين ومتعدد الاستخدامات كمان ومنخفض الدهون وقليل في نسبة الكربوهيدرات، وبيبقي إضافة كويسة للكيكات والحلويات والمعجنات
15- اللوز بيساعد في إنتاج الطاقة في الجسم لإنه بيحتوي على المنجنيز والنحاس والريبوفلافين، ولو ضفته على العصير بتاعك الصبح بيبقي إضافة رائعة لبداية اليوم بالنسبة لجسمك
