4 فوائد لحلاقة الشعر والصلع.. الأولى ستبهرك
الصلع هو شبح لأي شاب أو راجل، ده طبعا في الأول هتتخض إن شعرك بيقع وإنك ممكن تصلع، ولكن بعد كده هتحب الموضوع أوي وهتحس إن دماغك خفيفة وفي طراوة رايحة جاية عليها كده، زيي كده وأنا بكتب الموضوع ده دلوقتي، لإن أنا قديم والقرعة دي مش من فراغ!
موقع Healthline سأل سؤال مهم، هل في أي فوائد من حلاقة شعر الرأس؟ أه في، ولو جربت الموضوع كذا مرة هتحبه وهتحس إنها مش نهاية العالم وعادي، فأنت لو شعرك بيقع دلوقتي أو بفتكر تحلق زيرو هنقولك إيه فوائد موضوع حلقة الشعر خالص أو حتى الصلع ده وحاجات غيرها:
1- التعامل مع تساقط الشعر:
زي ما قولنا فوق، ده هيكون حل كويس لو شعرك بيقع وزهقت من تجربة أدوية أو زيوت أو لبس الطواقي أو البواريك، اتكل على الله وشيلها زيرو.
2- توفير الوقت:
الموضوع بيخلص في 10 دقايق، هي ماكينة حلاقة وتحط الدرجة اللي أنت عايزها وكده إحنا خلصنا!
3- توفير فلوس:
زي ما قولتلك، الموضوع ممكن يخلص في البيت، مش هتحتاج لحلاق، مش هتحتاج تشتري منتجات عناية بالشعر أو مشط أو فرشة أو سشوار، وزي ما قولنا هما 10 دقايق بس!
4- التجديد جميل:
هل تعاني من الحلاق وإنه مش بيعمل اللي بتقوله عليه؟ حان الأن الوقت إنك تجرب قصة شعر جديدة أو يعني تشيله كله، والمظهر الجديد ده ممكن يرفع من معنوياتك.
ولكن برضه خلونا نتكلم عن الآثار الجانبية للموضوع واللي بتتلخص في التالي:
1- الجفاف: الحلاقة المتكررة للرأس ممكن تسبب جفاف وحكة، فحاول ماتهرش كتير في دماغك بضوافرك واستخدم المرطبات.
2- تهيج فروة الرأس: ممكن وأنت بتحلق تتعور وده بيؤدي لاحمرار في جلد الرأس والتهابه، فحاول تكون حريص جدا وأنت بتحلق، أو استخدم الماكينة الكهربائية وريح نفسك لإن كده كده هي أمان أكتر.
3- رأسك مكشوفة طول الوقت: الرأس هي أول حاجة هتتعرض للعوامل الجوية، مطر، رعد، برق، شمس، حر، فحاول تغطي رأسك في الطقس اللي فيه شمس قوية.
4- الاهتمام ثم الاهتمام: لو مش بتحب يطلعلك شعر خفيف أو قصير، هتحتاج تحلق يوميا تقريبًا أو كل يومين، حسب سرعة نمو شعرك.
5- تعليقات: ممكن تسمع بعض التعليقات السلبية من الناس، وطبعا مش محتاجين نقول إن رأي الناس ليس له أي أهمية في الحاجات الشخصية.
وآخر وأهم فائدة للصلع.. إن محدش يقدر يمس شعره منك.. هههه!
حسب موقع “times of india”، عالم اسمه “ألبرت إي مانيس” في جامعة بنسلفانيا في أمريكا عمل دراسة على القصة دي، عرض صورتين لراجل على المشاركين، صور للراجل ده بشعر والتانية من غير شعر، كل المشاركين لقوا إن الأصلع كان شكله أقوى وأكبر.
وفي دراسة تانية لـ”رونالد هينس” في جامعة سارلاند في ألمانيا عمل بحث على 20 ألف شخص، وكانت النتيجة إن الشخص الأصلع هو أكبر سنا وأكثر ذكاء وحكمة.
