في اليوم العالمي للتوعية بالشعاب المرجانية.. اعرف عن أهميتها في مصر

بمناسبة اليوم العالمي للشعاب المرجانية..  حبينا نتكلم عنها لإنها مصدر مهم للسياحة في مصر.. ووفقًا لموقع الهيئة العامة للاستعلامات نقلا عن”مركز المعلومات ودعم اتخاذ القرار”.. البحر الأحمر لوحده بيضم واحدة من أطول تجمعات الشعاب المرجانية الحية في العالم واللي بتمثل حوالي 5% من الغطاء المرجاني العالمي..  وبتمتد مساحتها لمسافة 4 آلاف كم من سواحل البحر الأحمر.. وفيها حوالي 350 نوع مختلف من الشعاب المرجانية وده اللي بيخلي البحر الأحمر مصدر مهم للسياحة لأن مصر فيها حوالي 209 نوع من الشعاب المرجانية..


وفقا لموقع enterprise وموقع hepca.. أثبتت الدراسات إن عينات الشعاب المرجانية المأخوذة من شمال البحر الأحمر بتتميز بقدرتها على تحمل المناخ ومقاومة ارتفاع درجات حرارة وعندها قدرة على تحمل درجات حرارة تصل لـ 6 درجات مئوية أعلى من المعتاد وده بيخليها عندها قدرة على إعادة تأهيل الشعاب المرجانية المتضررة وحمايتها من الانقراض.



وكمان البنك الدولي قال في تقرير أصدره سنة 2022م إن الشعاب المرجانية بتعادل نصف عائدات السياحة المصرية بشكل عام.. وقال كمان أن مصر تمتلك حوالي 30 محمية طبيعية منها 6 محميات فيها شعاب مرجانية زي:
( محمية رأس محمد- محمية نبق-محمية أبو جالوم – محمية وادي الجمال-
محمية جزر البحر الأحمر الشمالية -محمية السلوم )


ووفقا لموقع reefresilience الشعاب المرجانية بيبقى ليها أنواع مختلفة:

الشعاب المرجانية: ودي اللي بتنمو جنب الشاطئ وبتكون الأصغر في السن

الحاجز المرجاني: ودي اللي بيفصلها عن الشاطئ مسطح مائي يطلق عليه اسم  بحيرة

الشعاب المرجانية المنفصلة أو المعزولة: وغالبًا بتكون بين الشعاب المرجانية والحاجز المرجاني

الجزر المرجانية: بتكون مجموعة من الشعاب المرجانية بتتشكل ومع الوقت ممكن تنحسر الجزيرة تحت السطح وتسيب حواليها حلقة من الشعاب وتكون جزيرة مركزية

وبما إن النهاردة يوم التوعية بالشعاب المرجانية في تقرير أصدرته الأمم المتحدة قالت فيه أن 70%  من الشعاب المرجانية في العالم معرضة للتهديد بسبب كذا سبب..
من ضمنهم

أسباب طبيعية: زي التغير المناخي وارتفاع درجة حرارة سطح البحر وكمان بسبب التغير في منسوب البحر..

وفي أسباب تانية بشرية: ممكن تأثر على الشعاب المرجانية زي الردم والتجريف اللي بيحصل حواليها وده بيسبب تعكير البحر وتقليل كمية الضوء اللي بيوصل للشعاب المرجانية فبالتالي بتتدمر .. وكمان صيد أسماك الزينة والأصداف والرخويات لإن ده بيخل بالنظام الإيكولوجي للشعاب المرجانية – والنظام الإيكولوجي هو الأسس البيولوجية وغير البيولوجية في مساحة محددة والعلاقات المتبادلة بينها-
وكمان قالت الأمم المتحدة إن استخدام أدوات الصيد المخالفة والمواد السامة بيسبب تدمير الشعاب المرجانية..