5 طرق تعمل بيها اللحمة الضاني لو مابتحبش ريحتها!
كل عيد كبير بيعدي علينا بيجي معاه نفس المشكلة.. كيس اللحمة الضاني اللي في الفريزر اللي ماحدش بيحبه ومش عارفين نعمل فيه إيه؟.. إحنا هنقولك بقى تعمل فيه إيه عشان يطلع حلو ومن غير زفارة خالص.
الطريقة الأولى: الثوم والروزماري
هنغسل اللحمة بخل ودقيق وليمون.. بس من غير ما ننقعها كتير عشان ماتنشفش.. وبعدها ننشفها كويس ونتبلها بـ 5 فصوص ثوم مهروسين + معلقة كبيرة روزماري + معلقة زعتر وعصير ليمون + 3 معالق زيت زيتون.. ورشة قرفة بسيطة جدًا وملح وفلفل.
وتتساب في التتبيلة ساعتين على الأقل وبعدين في صينية مع بصل وجزر وطماطم وشوية مية أو مرقة ونغطيها بفويل وعلى الفرن ساعتين.. وفي آخر ربع ساعة نشيل الفويل عشان تاخد لون.
الروزماري والثوم مش بس هيغطوا على الريحة دول هيخلوا ريحتها حلوة جدًا.
الطريقة التانية: البصل والطشة
نشوح 3 بصلات كبار متقطعين شرائح ونكرملهم شوية وبعد ما ننزل عليهم اللحمة وورق الورا والحبهان والمستكة هنشوحهم سوا لحد ما لون اللحمة يتغير.. بعدها شوية ملح وفلفل وكمون ورشة قرفة ونغطيها بمرقة ونسيبيها تستوي براحتها.
وفي الآخر نعمل طشة ثوم وكزبرة ناشفة على الوش… ودي من أنجح الطرق اللي بتضيع الريحة ومناسبة جدًا لأجواء العيد.
الطريقة التالتة: الليمون والنعناع
لو عندك ريش بالذات بقى فالنعناع بيليق عليها جدًا.
والتتبيلة بتقول: عصير عدد 2 ليمون.. ونعناع فريش مفروم.. شوية ثوم وزيت زيتون وملح وفلفل أسود ورشة كمون.. بس خلي بالك بتتساب ساعتين مش أكتر عشان الليمون ماينشفهاش.. وبعدها تتشوي على نار عالية.
الطريقة الرابعة: الفتة
ولو رجعنا للكلاسيكيات وعايزين نعمل فتة فأهم حاجة السلق عشان الريحة.
وعشان نسلق صح.. هنحط اللحمة في مياه بتغلي 5 دقايق وبعدها نرمي الماية دي خالص ونبدأ سلق جديد بماية نضيفة مع بصلة كاملة وحبهان وورق لورا وعود قرفة وجزراية وكرفس.
لما تستوي هنحط عليها معلقة زبدة أو سمنة ونحمرها سريعًا في الطاسة.
الطريقة الخامسة: الطماطم والفلفل الألوان
هنشوح اللحمة في معلقة سمنة مع بصلتين.. فلفل ألوان و 3 حبات طماطم مبشورين على معلقة صلصة.. توم.. كمون وبابريكا مدخنة وهنسيبه يستوي على نار هادية لحد ما الصوص يتقل..
الطماطم والفلفل المدخن هيطلعوا طعم اللحمة الضاني حلو حتى للي مش بيحبوه.
وأخيرًا افتكسوا وزودوا اللي عايزينه عادي.. وألف هنا وشفا عليكم والعيد فرحة وماء ماء ماء.
