مراجعة سريعة لمسرحية “نمرة 2 يكسب” هتحببك أكتر في كوميديا الأبيض وأسود
بييجي علينا وقت كده بنبقى نفسنا في مسرحية حلوة زي اللي بنحبهم بس جديدة.. حاجة مانعرفهاش.. قصة مختلفة.. حاجة ماشوفنهاش قبل كده.. أو شوفناها وناسينها مثلًا.. فأحب أعرفك بقى بمسرحية النهاردة.. نمرة 2 يكسب.. اللي مش بس مختلفة.. دي ملحمة كوميدية هتقوم منها تعبان من الضحك!
“نمرة 2 يكسب” بطولة محمد عوض وعبد المنعم مدبولي.. ميمي جمال ومحمد رضا وأبطال تانية هنحكيلك عنهم قدام.
مبدئيًا كده وفي أول الكلام المسرحية بتحكي عن رستم بيه.. اللي قرر هو والمحامي بتاعه يعملوا إعلان في الجرايد ويدوروا عن أي حد من عيلة “عبد الفتاح الأرنؤوطي” صديقه ومدير شركته القديم.
وفي نفس يوم عيد ميلاد بنته “سامية” اللي بتقوم بدورها ميمي جمال.. بيظهر “ناصح الأرنؤوطي” الرسام اللي هو محمد عوض ومعاه مدير أعماله والمحامي بتاعه “تحسين المالح”.. عبد المنعم مدبولي يعني.
وده اللي قالوه عشان ياخدوا الـ10 آلاف جنيه اللي رستم بيه كتبهم في الإعلان.. لكن في الحقيقة ناصح يبقى صبي في ورشة النقاشة بتاعت الأسطى تحسين.
ونسيت أقولك حاجة مهمة.. رستم بيه حط شرط أساسي قصاد الفلوس.. وهو عدم وجود قرايب للشخص اللي هياخد الفلوس دي!
المسرحية لحد كده تبان عادي.. طب فين اللي مش عادي؟
اللي مش عادي هو “وجدي الأرنؤوطي”.. أخو ناصح اللي شبهه بالمللي بس مايعرفوش بعض.. واللي هيجي في نفس اليوم بسبب نفس الإعلان.. عشان ياخد نفس الفلوس.
وعلى ما “تحسين” يحاول يلم الدنيا عشان ياخد هو وناصح الـ 10 الآف.. بيظهر “بهجت الأرنؤوطي”.. مش هنقولك بقى مين ده وجاي ليه وعشان إيه.. انت أكيد عرفت لوحدك.
الـ 3 إخوات باختلاف شخصياتهم.. ناصح اللي عكس اسمه تمامًا.. ووجدي الأرستقراطي المُهندم اللي تحسه مكوي مع البدلة بتاعته.. والشبح الخِطِر الحرامي بهجت.. هيخلوك انت وتحسين تتلغبطوا وتبقى مش عارف مين فيهم اللي بيتكلم دلوقتي!
المسرحية إنتاج 1966.. وكانت نقلة في حياة محمد عوض وفي المسرح عمومًا.. هتحس كإن فيه 3 محمد عوض بيدخلوا ويخرجوا في ساعتها مع إنه هو شخص واحد.. وعلى لسانه هو شخصيًا لما اتسأل عن المسرحية وقال: “الجمهور كان مش فاهم إزاي يبقى ناصح لسه خارج أهو ونلاقي وجدي طالع من الناحية التانية؟!”
المسرحية كوميدية درامية وكانت أيقونة في الستينيات وعملت إيرادات كبيرة وقتها..لأن الضحك فيها متعوب عليه.. وفيها تفاصيل وطريقة كلام ولبس وحركة مختلفة لكل شخصية.
ونسيت أقولك على باقي الشخصيات صحيح.. “عاشور السفرجي” المُستغل اللي في الرايحة والجاية يقَلب تحسين.
و”حميدة” اللي بتقوم بدورها خيرية أحمد.. مرات ناصح اللي هتظهر عشان تعقد الموضوع أكتر.. غير “إنشراح” أخت رستم اللي بتحب المحامي بتاعه.. والمحامي نفسه اللي لو نفخت فيه هيقع واللي مش بيبطل مناكفة مع رستم بيه.
إيه ده؟ فين الباقي؟.. كورس الضحك المكثف ده بـ 8 شخصيات بس؟
ده حقيقي.. 8 شخصيات هيتشقلبوا حرفيًا لمدة 3 ساعات قدامك في حدوتة عشان نشوف مين في التلاتة هيكسب الفلوس في الآخر.. وبعدين مين عارف.. مش يمكن يطلعلهم إخوات تانيين؟
“نمرة 2 يكسب” مسرحية روشة.. مش قايمة على ضحك قديم.. وأي حد هيحبها ومش هيقوم إلا وهو مخلصها.. فبعد ماتاكل فتة العيد اعملك كوباية شاي أخضر حلوة عشان تهضم.. واتفرج وقولنا مين فيهم اللي هيكسب في الآخر؟
