في يومه العالمي للتوعية به.. أعرف إيه هو اضطراب ثنائي القطب؟
![](https://theglocal.com/wp-content/uploads/2024/03/331.png)
فى الحقيقة مش كل الـ mood swings هى حالة انطفاء أو فقدان الشغف أو شوية زعل ومشاكل وهيعدوا أو حتى ينفع نهزر عليهم بفيديو تحت شعار “أنا فجأة بدون سبب” بعد ما كنت فى كامل طاقتك .
وأكيد طبعاَ طبيعى يكون فى وقت حزن وعياط ومانبقاش قادرين نعمل حاجة بس لكن كل حاجة لوزادت عن حدها, هنا نبتدى نسأل طب ليه وإيه السبب اللي بيوصل الشخص إنه يبقى متقلب المزاج طول الوقت وبيحس إنه بينطفي كتير ومابيبقاش كويس؟
أوقات بيتم تشخيص الـ mood swings الزيادة دي إنه اضطراب نفسي لإنه بيكون وصل لمرحلة خطر شوية وبيتم تشخصيه من متخصصين نفسيين وبيكون اسمه “bipolar disorder symptoms” أو اضطراب ثاني القطب.. وفى اليوم العالمى لمرض الثنائى القطب اللي هو يوم 30 مارس حابين نشاركوا شوية معلومات عن الاضطراب ده واللي ممكن تكون خطوة بسيطة عشان نفهم من خلالها الناس اللي بيعانوا من الاضطراب ده أكتر.
اضطراب ثنائي القطب بيبقى تحول كامل في الحالة المزاجية واللى ممكن يوصل الشخص لاكتئاب ونوبات هوس و بيتضمن 3 أنواع :
و بيتم تصنيف اضطراب ثنائي القطب لـ 3 أنواع والنوع الأول بيكون عبارة عن نوبات هوس ممكن تستمر لمدة 7 أيام على الأقل وبأعراض هوس شديدة اللى ممكن تظهر فى سرعة التفكير أو مش قادر تركز فى فكرة واحدة والشخص مش بيعرف ينام أصلا.. والنوع الأول ممكن يوصل أن الشخص بيتخيل حاجات مش حقيقية.
الاضطراب ثنائي القطب من النوع الثاني بيكون عبارة عن نوبات من الاكتئاب ونوبات هوس خفيفة وبتكون أقل من النوع الأول شوية.
أما بقى النوع التالت بيطلق عليه دوروية المزاج وده عبارة عن أعراض اكتئاب متكررة ولكن مش بتدوم لدرجة كافية تخليها توصل لنوبات الهوس.
ولكن في بعض الأحيان ممكن الشخص يعانى من أعراض اضطراب ثنائي القطب مش بتتوافق مع الفئات دى و بيسموها “الاضطرابات ثنائية القطب الأخرى المحددة وغير المحددة والاضطرابات ذات الصلة” أو : moving from extreme lows to extreme highs وهي يعني إنك مرة مبسوط وعندك طاقة ونشاط لكن الساعة اللى بعدها تحس إنك حزين وعند نقطة الصفر
وغالبًا بيتم تشخيص الاضطراب ثنائي القطب في أواخر مرحلة المراهقة أو في مرحلة البلوغ المبكر وفي بعض الأحيان، ممكن يظهر أعراض ثنائي القطب عند الأطفال.. وعلى الرغم من أن الأعراض بتختلف مع مرور الوقت، إلا أن الاضطراب ثنائي القطب عادة بيتطلب متابعة وعلاج .
من المسلسلات اللى سلطت الضوء على الاضطراب ده في الفترة الأخيرة هو مسلسل إمبراطورية ميم من خلال مايان السيد “مادى ” اللى بتعانى من الـ bipolar” أو اضطراب ثنائي القطب
والمسلسل بيوضحلنا قصتها مع المرض وبعض أعراضه زى النوبات اللى بتعانى منها أوقات فبتقفل على نفسها ومش بتكون قادرة تكلم حد .
وفي المسلسل بنتعرف على شخصية مادي أكتر اللي بيظهرلنا من المواقف اللي بتقابلها في بعض الأحداث زي إنها بتعاني من مشاكل نفسية، وده بإنها بيحصلها تقلبات مزاجية من غير أي مقدمات وكمان بيصدر منها تصرفات عدائية مش مبررة زي إنها بتحرض مروان على باباه ومتمردة على كل حاجة حواليها وعلى كل القوانين وعايزة كل الناس تتمرد زيها، وبعد كده بنعرف إن ده بسبب تعرضها وهي صغيرة لعنف من عيلتها وده بيكون السبب إنها تبقى بتعاني من إضطراب في الشخصية مأثر عليها وعلى اللي حواليها.
وفى الأخر لو حاسس إن الموضوع عندك مش مجرد تقلبات مزاجية أو بتعاني أكتر فرحلتك هتكون أسهل لما تفهم نفسك من خلال إستشارة طبيب نفسى أو حتى بطلب المساعدة من اللى حواليك وافتكر دايماٌ أنك مش لوحدك .