“مش دايما بناكل بسبب الجوع”.. دراسة بتكشف دور المخ والذاكرة في الأكل وزيادة الوزن

طول الوقت فيه إعلانات حوالينا معمولة مخصوص عشان تفضل تورينا وتفكرنا قد إيه هنبقى مبسوطين لو أكلنا أكل معين.. هتاكل وهتتبسط.. بس هل عمرك فكرت إن ممكن يبقى فيه أجزاء معينة في المخ بتأثر على أكلك والكميات اللي بتاكلها وحتى نوعية الأكل اللي بتاكله؟

بمعنى تاني.. هل ممكن تاكل عشان مخك بيفكرك بذكريات ومشاعر معينة حلوة هتحسها لما تاكل.. حتى لو انت مش جعان؟ وهل ممكن الذاكرة تأثر في الأكل اللي بناكله وكمية الأكل ونوعه؟

دراسة جديدة قالت إن الخلايا العصبية في المخ بتخزن ذكريات الأكل وده بيأثر على استهلاكنا للأكل وزيادة الوزن.. وده اكتشاف ممكن يساعد في علاج السمنة.. الدراسة كشفت إن فيه خلايا عصبية في المخ بتخزن ذكريات مرتبطة بالسكريات والدهون.. وده ليه تأثير كبير على عادات الأكل بتاعتنا والصحة العامة.

الدراسة اتعملت في Monell Chemical Senses Center.. والبحث بتاعهم حدد لأول مرة نظام الذاكرة الخاص بالأكل في المخ وعلاقته المباشرة مع الإفراط في الأكل والسمنة الناتجة عن النظام الغذائي.

الدراسة دي اتنشرت في مجلة Nature Metabolism واتكلمت عن مجموعة محددة من الخلايا العصبية في المخ اللي بتخزن ذكريات مرتبطة بالسكريات والدهون.. وده بيأثر بشكل كبير على استهلاك الأكل ووزن الجسم.

الخلايا العصبية دي بتخزن ذكريات عن الأكل اللي بنحبه.. خصوصًا زي ما قولنا السكريات والدهون.. ولو سكتّنا الخلايا العصبية دي بيبقى فيه صعوبة في استرجاع الذكريات المرتبطة بالأكل.. وده بالتالي هيقلل استهلاك الأكل وهيمنع زيادة الوزن.. وعلى العكس تنشيط الخلايا دي بيزود الذاكرة المرتبطة بالأكل وبالتالي بيزيد استهلاك الأكل ومعاها الوزن بيزيد.

النتائج دي بتقدم مفهومين جداد: الأول إن فيه خلايا عصبية معينة في المخ بتخزن ذكريات مرتبطة بالأكل.. والتاني إن الذكريات دي ليها تأثير مباشر على كمية الأكل اللي بناكلها.

الدراسة بتقول: “مش غريب إننا نفتكر تجارب الأكل الحلوة.. لكن كان متوقع من زمان إن الذكريات دي ملهاش تأثير كبير على سلوك الأكل”.. و”أكتر حاجة مفاجئة إن تعطيل الخلايا العصبية دي بيمنع زيادة الوزن حتى مع الأنظمة الغذائية الغنية بالدهون والسكر”.

الذاكرة عادةً مش بتعتبر عامل أساسي في تحديد كمية الأكل لكن الدراسة دي بتوضح الرابط المباشر بين الذاكرة والتمثيل الغذائي.. إيه التمثيل الغذائي ده؟ اللي هي العملية اللي بيحول بيها الجسم الأكل والشرب لطاقة.. زي الهضم وحرق السعرات الحرارية واستخدام العناصر الغذائية للحفاظ على وظائف الجسم.. واللي بيميز الاكتشاف ده عن باقي الدراسات المرتبطة بالذاكرة هو تأثيره على فهم اعلاقة بين المخ والتمثيل الغذائي.

لما تم حذف الخلايا العصبية المسؤولة عن الاستجابة للسكر في المخ عند الفئران اللي جربوا عليهم.. استهلاكهم للسكر قل.. وده حماهم من زيادة الوزن.. حتى مع التعرض لأنظمة غذائية فيها سكر عالي.. والاكتشاف ده بيوضح وجود علاقة مباشرة بين دوائر معينة في المخ مرتبطة بالذاكرة والتمثيل الغذائي.. والنقطة دي محدش كان مركز عليها أوي في أبحاث السمنة.

الدراسة كمان قالت إن “في البيئات الحديثة اللي فيها الأكل موجود في كل حتة والمحفزات موجودة في كل مكان.. كل المحفزات دي بتأثر على المخ وممكن تكون سبب في زيادة الأكل وده اللي بيساهم في زيادة السمنة”.

طب بعد كل الكلام ده بقى.. الدراسة دي ممكن تفيد الناس إزاي؟

نتائج الدراسة دي ممكن تساعد العلماء والباحثين إنهم يواجهوا زيادة الأكل والسمنة وده من خلال دراسات وأبحاث أكتر تخليهم يوصلوا لاستهداف دوائر الذاكرة في المخ المرتبطة بالأكل فممكن بعد كده نوصل لمرحلة نقدر نعطل المحفزات المرتبطة بالذكريات اللي بتخلينا ناكل أكل مش صحي ومليان سعرات حرارية.. وده لو حصل فممكن يبقى علاج للسمنة في عالم مليان أكل مش صحي وسكريات وإعلانات بتحاول طول الوقت تقنعنا إننا مش هنبقى كويسين ومبسوطين غير لما ناكل أكل مش صحي.

Related Articles

Back to top button