التين الشوكي.. مش مجرد فاكهة

التين الشوكي غير إنه طعمه حلو ومسكر وساقع وبيهون علينا الحر وناقص يشيلنا من عالأرض شيل.. إلا إنه كنبات مهم جدًا وأنقذ ناس وحضارات كاملة.

من حسبة 500 سنة كده قبل ما الأوروبيين يدخلوا أمريكا.. كان فيه شوية قبائل في الجنوب بتعتمد عليه كمصدر للغذاء في وقت الجفاف أو السفر والصيد.

وسامعينك يالي بتقول إشمعنا؟.. أولًا اتكلم كويس على التين.. ثانيًا موجود في البر ومش محتاج ري وبيديك ماية وأكل في نفس الوقت.. مايعتمدوش عليه لييه؟

دول كمان استخدموه في الطب.. لأن عصارته شبه جل الصبار بتخفف الالتهابات وتسرع التئام الجروح.. وقبيلة منهم اسمها “البيما” استخدمتها لزيادة إدرار الحليب عند السيدات.

ومش بس كده.. ده الشوك بتاعه كانوا بيعملوا منه إبر خياطة أو خطاف لصيد السمك.. يعني مش عارفين نودي جمايله فين بصراحة.

ولما الأوروبين دخلوا بقوا يأكلوا الحيوانات الألواح بتاعته.. بعد ما يشيلوا الشوك طبعًا.. وعملوا مربى وعصير وحلويات.. بص ماسابوش حاجة ماعملوهاش.

والتين الجدع اللي خيره مغرقنا.. ممكن ياكلوه الطيور والغزلان والحيوانات الصحراوية.. وجذوره بتقلل إنحراف التربة.. والزهور بتاعته بتغذي النحل والفراشات.

وكمان فيه أنواع من التين بتعيش عليها حشرة صغيرة اسمها القرمز.. بيطلع منها صبغة حمراء اسمها “كارمين”.. ودي كانت من أغلى الأصباغ الطبيعية في العالم في القرن الـ 16 

ومش هنتكلم بقى إن شعار المكسيك نسر ونبات تين شوكي.. فإحنا أقل واجب يعني نقوم دلوقتي ناكلنا 200 واحدة ورا بعض ولا حاجة.