إيه علاقة تريند اللبس المنقط عند البنات بمارلين مونرو والرقص الإسباني؟
أكيد شوفت حد لابسها في الشارع أو في فيلم من الأفلام.. أو حتى واحدة من صحابك بعتتلك صورتها وعايزة تروح تشتريها.
غير إنك لو فتحت دولاب مامتك بالصدفة ممكن تلاقيها وسط الحاجات.. وممكن دولاب جدتك برضو مايمنعش.
فإيه حكايتها بقى وعايزة مننا إيه القماشة المنقطة دي؟
سنة 1857.. وفي صفحة من صفحات مجلة “Godey’s Lady’s Book” الأمريكية.. وصفت واحدة من الكاتبات “شال” وقالت عليه إنه خفيف ويعتبر مثالي للصيف.. وقالت إنه حوافه مطرزة بنقط مدورة.. ودي كانت أول مرة تظهر فيها كلمة “البولكا دوتس” في الجرايد.
طب بدأت إزاي؟
زمان شوية كده.. قرب القرن الـ18.. وزي ماخدنا في حصص التاريخ وإحنا صغيرين حاجة اسمها الثورة الصناعية.. كانت وقتها آلات النسيج على الله ولسه ماتطورتش كفاية عشان تعرف تعمل دواير بنفس النسب جنب بعض على القماش.
بس في سنة 1790 لما عملوا أول آلة خياطة بدائية شوية الموضوع بقى سهل وبقوا يعرفوا يعملوا نقط مدورة قد بعض وبينهم مسافات متساوية.
إيه علاقتها بالرقص؟
وفي التشيك في القرن الـ 19.. كان فيه رقصة مشهورة جدًا عند الفلاحين هناك.. وسموها رقصة “البولكا”.. وماكنتش بس القماشة دي الحاجة الوحيدة اللي اتسمت على اسمها.. لأ الموضوع وصل للأكل زي “بودينج البولكا” ولحاجات تانية كمان.. هي آه اتسمت على اسمها بس ارتبطت أكتر بعد كده بالرقصة اللي بيدبدبوا فيها على الأرض دي.. آيوه “الفلامنكو”بتاعت أسبانيا مظبوط.
إمتى وصلنا التليفزيون؟
ولما دخلنا القرن العشرين فضلت النقشة دي تتشهر أكتر وأكتر.. وتوصل من بلد لبلد.. لحد ما ملكة جمال أمريكا سنة 1926 “نورما سمولوود” لبستها.. وبعدها وصل الموضوع للتليفزيون عند حبيبك ميكي ماوس.. لما ديزني قررت تظهر شخصية ميني لأول مرة بفستان بنفس النقشة.. مع العلم إن وقتها ديزني قالت إنها هتحذف أي نقط مدورة من أفلامها بسبب صعوبة تحريكها.. ومع ذلك رسموا فستان ميني المنقط وعملوه في صور ثابتة.
سيناترا وديانا وجنون مارلين مونرو!
البولكا دوتس كمان عملت تأثير كبير في الأحداث الثقافية في الحقبة دي.. ده حتى فرانك سيناترا عمل أغنية بعنوان “Polka Dots and Moonbeams” في الأربعينيات.. ولبستها مارلين مونرو ولوسيل بول في الخمسينيات.. وكملت في حركة الموضة العصرية مع تويجي وجولدي هاون في الستينيات.. ولبستها أيقونات زي الأميرة ديانا وجوليا روبرتس في التمانينيات والتسعينيات.
وعندنا إحنا بقى طبعًا السندريلا سعاد حسني والبرنيطة المعروفة.
من الألفية ولحد دلوقتي
فضلت البولكا دوتس تتشهر أكتر بالذات في الربيع والصيف.. وبالرغم من إن الأسود والأبيض شكلهم كلاسيكي إلا إنها بتليق مع أي لون تاني في الدنيا.
وكل فترة قماشة البولكا دوتس ترجع تاني وتفضل الناس تلبسها.. جواكيت ماشي.. جيبة ماشي.. بلوزة شغال.. طاقية ماتقولش لأ.
ودلوقتي في صيف 2026 رجعت تاني بألوان كتيرة بس بنفس النقط البيضاء.. بس قبل ما تاخدك الحماسة وتروحي تجيبي دستة كل الألوان.. بصي بصة في دولاب مامتك يمكن تلاقيها وتبقى فلوس البولكا دوتس دي جيبك أولى بيها!
