رياضات ممكن تمارسها في أي سن

 “اللي فاته القطر خلاص” المثل اللي دايمًا بيتقال لكن الحقيقة إن في الرياضة في أنواع رياضة مصممة أساسًا إنها تتلعب في أي سن ومش محتاجة لياقة خارقة أو تدريب سنين بالعكس بعضها بيبقى مفيد جدًا لكبار السن أو الناس اللي بتبدأ من الصفر وبيتحول مع الوقت لأسلوب حياة مش مجرد نشاط.

 في رياضات سهلة التعلم والضغط فيها قليل على الجسم ومناسبة لأي مرحلة عمرية ومعاها أمثلة حقيقية لناس كبار في السن لسه بيلعبوا وبيتنافسوا بشكل طبيعي.

المشي السريع

المشي السريع  يعتبر واحد من أسهل وأهم الرياضات اللي ممكن تبدأ بيها في أي سن لأنه مفيهوش معدات ولا اشتراك نادي وممكن يتعمل في أي مكان سواء في الشارع أو الحديقة أو حتى على جهاز المشي.. الدراسات بتقول إن المشي لمدة 30 دقيقة يوميًا بيساعد بشكل كبير في تقليل خطر أمراض القلب وبيحسن المزاج وكمان بيساعد في تنظيم الوزن. 

منظمة الصحة العالمية بتوصي بيه كواحد من أهم الأنشطة اليومية.. والمميز فيه كمان إنك ممكن تلاقي ناس فوق الـ70 و80 سنة لسه بيمارسوه بشكل يومي وبيشاركوا في فعاليات وماراثونات مشي في دول زي اليابان وأوروبا وده بيثبت إن العمر مش عائق خالص قدام الحركة.

رياضة “صديقة المفاصل”

السباحة من أكتر الرياضات المناسبة لكل الأعمار لأنها بتقلل الضغط على المفاصل بشكل كبير بسبب مقاومة المياه وده بيخليها مثالية خصوصًا لكبار السن أو الناس اللي عندهم مشاكل في الركب أو الظهر غير كده فهي بتقوي العضلات بدون إجهاد وبتحسن التنفس والدورة الدموية بشكل ملحوظ وكمان بتساعد على الاسترخاء وتقليل التوتر في الواقع فيه عدد كبير من الناس فوق سن 60 و70 بيشاركوا في مسابقات سباحة للهواة أو بيستمروا في التدريب بشكل أسبوعي منتظم وكمان السباحة من الرياضات الأساسية في بطولات “Masters” المخصصة لكبار السن حول العالم وده بيأكد إنها رياضة مستمرة مدى الحياة.

ركوب العجل

ركوب الدراجات مش بس للأطفال لكنه واحد من أفضل الرياضات اللي ممكن يمارسها الكبار كمان لأنه بيحسن اللياقة القلبية وبيساعد على حرق السعرات بدون ما يضغط على الركب أو المفاصل في دول زي هولندا والدنمارك هتلاقي كبار السن بيركبوا العجل بشكل يومي كجزء من حياتهم الطبيعية مش مجرد رياضة وفيه كمان قصص لناس فوق 80 سنة بيشاركوا في رحلات طويلة بالدراجات لمسافات كبيرة وده بيدل إن الرياضة دي تقدر تكمل مع الشخص طول العمر طالما الجسم قادر يتحرك.

اليوجا

“اليوجا” بقت واحدة من أشهر الرياضات في العالم لأنها مناسبة لكل الأعمار ومش محتاجة مجهود بدني عالي أو منافسة لكنها بتعتمد على التنفس التوازن والمرونة.

 الدراسات الحديثة بتوضح إنها بتساعد في تقليل التوتر بشكل كبير وتحسين النوم.. وتقوية العضلات بشكل تدريجي من غير ضغط على الجسم فيه نماذج حقيقية لناس فوق 70 سنة لسه بيمارسوا اليوجا بشكل يومي وبعضهم بقى مدرب كمان خصوصًا في الهند والولايات المتحدة وده بيخليها رياضة مثالية للجسم والعقل مع بعض.

الجولف والبادل

الجولف من الرياضات اللي ممكن تتلعب في أي سن وكتير بيربطوه بكبار السن لأنه مش محتاج مجهود بدني عالي لكنه بيعتمد أكتر على التركيز والدقة.. اللاعب بيكون محتاج يمشي مسافات متوسطة داخل الملعب لكن بدون إجهاد كبير.. في الواقع فيه لاعبين بيكملوا ممارسة الجولف لحد سن 80 وأكثر وده لأنه رياضة ذهنية بقدر ما هي بدنية وبتناسب الناس اللي عايزة نشاط هادي ومنظم في نفس الوقت.

رياضة البادل انتشرت بسرعة في العالم العربي وأوروبا لأنها أبسط من التنس التقليدي ومش محتاجة مجهود بدني كبير وده خلاها مناسبة لكل الأعمار تقريبًا أما تنس الطاولة “البينج بونج” فهو من أسرع الرياضات اللي بتطور رد الفعل والتركيز وممكن يتلعب في أماكن صغيرة جدًا.. الاتنين مع بعض بيساعدوا على تحسين التناسق الحركي وتنشيط الجسم والعقل وبيتم استخدامهم كمان في مراكز كبار السن في أوروبا وآسيا كنوع من العلاج الحركي والترفيهي.

أمثلة من الواقع

فيه أمثلة كتير بتثبت إن السن مش عائق خالص قدام الرياضة من إدوارد ويتلوك يعتبر واحد من أشهر عدّائي الماراثون في العالم وواحد من أقوى الأدلة إن السن مش عائق.. قدر يجري ماراثون في أقل من 3 ساعات وهو فوق سن 70 وحقق زمن 2:54:48 وهو في عمر 73 سنة وده رقم استثنائي في عالم الجري لمسافات طويلة كمان استمر في الجري لحد ما وصل لـ85 سنة وحقق أرقام قياسية في فئته العمرية و قصته اتذكرت كتير كنموذج للرياضيين الكبار اللي بيكملوا أداء عالي رغم التقدم في السن.

جيني بيدارد بدأت الجري في سن متأخر نسبيًا لكن قدرت تكمل مشاركات في ماراثونات كبيرة زي نيويورك ماراثون وهي فوق سن 70 و80 سنة كمان حققت أرقام مميزة في فئتها العمرية ووصلت إنها تبقى من أكبر العدّاءات سنًا في السباقات. أسلوب حياتها بيعتمد على الجري اليومي لمسافات طويلة وده ساعدها تحافظ على مستوى لياقة ثابت لسنوات طويلة جدًا.

فاوستو بوجاتو المعروف إعلاميًا باسم فاوستو بودين يعتبر من أشهر العدائين في فئة كبار السن وشارك في ماراثونات بعد سن 70 وحقق أزمنة قوية جدًا مقارنة بعمره.. قصته مشهورة في أوروبا لأنه كان بيكمل الجري في سباقات تنافسية رغم تجاوزه السبعين وبيعتبر من الأمثلة اللي بتثبت إن التحمل ممكن يستمر لسن متقدم جدًا مع التدريب المستمر.

فوايا سينج مشهور عالميًا بلقب “أكبر عدّاء ماراثون في العالم” وبدأ الجري في سن متأخر جدًا لكنه كمل وشارك في ماراثونات كاملة وهو فوق سن 90 و100 سنة كمل سباقات رسمية لحد ما بقى رمز عالمي لفكرة إن العمر مش حد نهائي للرياضة. 

سوانج جانبرام من أشهر الرياضيين في فئة الماسترز (كبار السن جدًا) وبيشارك في ألعاب القوى في سن يتجاوز 100 سنة.. بيجري بيرمي رمح وبيشارك في مسابقات مختلفة داخل فئته العمرية وبيجمع ميداليات في بطولات كبار السن. 

البولندي ستانيسلاف كوالسكي كان واحد من أشهر الرياضيين في أوروبا في فئة فوق 100 سنة وشارك في سباقات 100 متر ورمي الجلة حتى عمر 104 سنة وحقق أرقام مميزة جدًا بالنسبة لسنّه. 

مع التقدم في السن الجسم بيحتاج حركة مستمرة مش عنيفة، وده بيساعد على الحفاظ على صحة القلب ومرونة المفاصل وتقليل خطر الاكتئاب وكمان تحسين جودة الحياة بشكل عام.. الأهم من كل ده إن الرياضة بتدي إحساس بالاستمرارية والنشاط وده بيأثر نفسيًا بشكل إيجابي كبير جدًا على كبار السن.