طول ما انت بتتمشى في التايم لاين.. هتلاقي ناس في الاستاد.. وناس تانية في باريس.. وواحد قاعد جنب كرستيانو رونالدو وصاحبه التاني قاعد جنب جمال عبد الناصر.. فتحس إنك دخلت الزمكان ومش فاهم انت فين.. بس بعدها تفتكر إن إحنا في زمن الـ AI وتمصمص شفايفك وتقول عادي بتحصل يعني.

الموضوع ممكن يكون هزار.. بالذات يعني لما حد بيعمل كده في حاجة ماتنفعش تحصل.. يعني صورة مع واحد مات مثلًا أو حدث قديم.. زي صاحبك اللي حاطط صورته وهو محارب إسبرطي.. مع إنه بيطلع يجري في كل الخناقات.. بس الموضوع بيحتاج نظرة تانية لما الحاجات دي تكون حاجات عادية.. واحد عامل صورته وهو في نويبع.. ولا في باريس.. أو في ستاد ساعة ماتش زي ما قولنا.

من وانت صغير لحد ما كبرت

فاكر زمان وانت صغير لما كنت تعمل نفسك دكتور وتمشي تكشف على كل الناس اللي في البيت؟ ساعتها كنت بتحس إنك فعلًا دكتور.. والاحساس ده مش عشان انت كنت صغير بس.. لكن كمان ده بسبب حاجة اسمها المحاكاة الذهنية – Mental Simulation وهي إن الإنسان بيكون عنده القدرة إنه يحط نفسه في سيناريوهات تانية سواء في زمن أو مكان مختلف.. زي كده لما بتيجي تنام وتتخيل إنك رديت الرد المناسب على مديرك.. أو إنك بتلعب في الدوري الإسباني وجبت الجون اللي كسب فريقك الدوري.. والحركة دي بتساعد إنها تدي معنى للحياة بشكل ما.

بس شوف بقى لما ماتباقش بتتخيلها بس.. لا انت ممكن تشوفها كمان.. ساعتها المكافأة اللي بيديها مخك ليك بتزيد أكتر.. فانت مثلًا مش بس بتتخيل إنك بتلعب في الأهلي.. لأ.. ده انت كمان بتشوف شكلك كان هيبقى عامل إزاى لو انت بتلعب هناك بجد وجوه الملعب.

هو ده حلو ولا وحش؟

الموضوع مش بالبساطة دي.. المحاكاة الذهنية أو التخيل أحيانًا بيكون مفيد وساعات تانية مضر.. مفيد لما يكون بتستخدمه عشان توصل فعلًا لنتيجة.. زي لما تبقى عايز تقوم تذاكر بس مكسل.. لما بتتخيل إنك نجحت أو اترقيت.. مخك بيشتغل وبتتخيل إنك وصلت.. فبتعرف انت هتحس بإيه لما توصل.. وساعتها التمرين والمذاكرة والجهد بيكون أسهل.. عشان انت في دماغك النتيجة واحساسها.

لكن بيكون مضر لما تعيش فيه.. ويبقى هو طريقة للهروب من الحياة.. فـ “أنا مش هحوش عشان أسافر.. أنا بس هتخيل نفسي مسافر.. وهعمل صورتي وأنا تحت برج إيفل وحلو أوي كده”

يعني نعمل إيه؟

إحنا هنا مش بنقولك تعمل إيه وماتعملش إيه.. اعمل صور براحتك.. بس خلي دايمًا دماغك عارفة إن ده مش حقيقي.. ومش بديل للحياة الحقيقية
ويعني شوف انت بتتبسط بصورتك إزاي.. تخيل بقى لو عملت الحاجة دي بجد وصورت نفسك صورة حقيقية.. بيتهيألنا الموضوع هيكون أحلى بكتير.. وبلاش بقى صور سبارطة والملوك الرومانيين دي.. نصيحة جانبية يعني