مراجعة سريعة لمسلسل “هبة رجل الغراب” هترجعك لقبل 2019 وتفكرك بالأيام الحلوة

كتير مننا بيحس إنه ياه لو نرجع بالزمن شوية.. وقت ما كنا لا نحمل همًا.. ناكل الأكل الطيب البيتي بتاعنا.. نعمل عصير فراولة تقيل في الخلاط ونشربه مع صحابنا.. نلبس بيجامة كاملة على بعضها.. نشوف مسلسل شبههنا بيتكلموا فيه زينا وبيلبسوا فيه زينا وبيحكي عن حياتنا..وآه انت صح.. أنا بلمحلك من تحت لتحت على مسلسلنا النهاردة.. “هبة رجل الغراب”.

“هبة رجل الغراب” ليه 4 أجزاء والجزء الأول إنتاج سنة 2014 ومن إخراج رامي رزق الله وتامر بسيوني.

أول جزئين من المسلسل من بطولة إيمي سمير غانم ومحمد سلام.. حازم سمير.. ريهام حجاج وفنانين تانيين كتير.. وحط خط تحت كتير دي.

أما الجزء التالت والرابع فهم من بطولة ناهد السباعي وأحمد فريد.. هبة عبد العزيز  ومع ثبات أبطال كتير من الجزئين الأولانيين.

وزي ما عرفتك على أبطال العمل.. محتاجة أعرفك عن صاحبة المسلسل الحقيقية بقى.. هبة.. بنت “عادية” شبه بنات كتير أوي ممكن نكون قابلناهم في حياتنا وبنحبهم.. ده لو ماكناش إحنا نفسنا زيها.

ممكن ماعندهاش أكبر قدر من الجمال.. لكن بنت طيبة وشاطرة وأذكى من ناس كتير.

عندها هوايات مختلفة.. مجتهدة أوي في دراستها.. بتلبس اللبس اللي بتحبه حتى لو مابيتقالهاش إنه شكله حلو.. المهم إنه مريحها وعاجبها.

هبة عبد العزيز النجار.. بنت غلبانة وعلى نياتها.. مش عايزة حاجة من الدنيا غير إن باباها ومامتها يبقوا كويسين وإنها تلاقي شغل كويس تثبت نفسها وقدراتها فيه.

ودلوقتي بعد ما عرفت هبة.. عايزة أعرفك على “إيكو موضة”.. بيت الأزياء المصري المشهور اللي أي حد يحلم يشتغل فيه.. وليه بعرفك عليه؟

عشان هبة صاحبتنا ولأول مرة الحظ بيبقى معاها.. والدنيا بتضحكلها أخيرًا وبتتقبل في الإنترفيو.. عشان تشتغل سكرتيرة المدير العام هناك.

آه يمكن مش الشغلانة اللي تستحقها ولا قد تعبها.. بس انت فكرك هبة بعد كل اللي حكيتهولك عنها ده هتسكت وهتهمد كده من غير ما تبقى أهم موظفة في الشركة؟

وبما إننا هنا بالمرة.. فمستر حازم المدير العام للشركة هيبقى شخص مهم معانا الفترة الجاية.. ما هبة طبعًا أول ما هتشوفه هتدلق على بوزها وهتحبه!

وهو الصراحة كمان هيحب ذكائها وإنها بتلقطها وهي طايرة وبتحب شغلها.

وطبعًا انت عايزني أقولك انهم عاشوا في تبات ونبات وخلفوا صبيان وبنات بس الحقيقة إن فيه ناس هيبقى شغلهم الشاغل ينكدوا على هبة.. ومنهم “بيريهان مأمون” اللي عكس هبة في كل حاجة.. أحلى واحدة بس مابتعرفش تفكر.. واللي بتنافسها في منصب السكرتيرة برضو!

ده غير “فريدة النشار” اللي بتقوم بدورها في أول جزئين ريهام حجاج في واحد من أحلى وأليق أدوارها.. بدور خطيبة مستر حازم وشريكته في “إيكو موضة”.

وماقدرش أسيبك كده من غير أقولك إن هبة بخفة دمها وشخصيتها التلقائية هتحبب باقي الشركة فيها.. بالذات “شلة الضايعين”.. سكيرتيرات الشركة البنات كلهم اللي ولا واحدة فيهم شبه التانية.. وكل واحدة عندها حدوتة هتعرفها لما تتفرج.. بس اعمل حسابك في دواء صداع وشوية فشار عشان دول كل ما يحصل حاجة يتجمعوا في حمام الشركة وهاتك يا نم.. المسلسل ده مافيهوش حاجة بتستخبى!

ومن ضمن الناس اللي بتحب هبة.. “تيمور” ابن خالة هبة.. واللي ساكن معاها في نفس العمارة.. واللي هيساعدها وهيكون سبب في حاجات حلوة كتير أوي ليها.. وحاجات وحشة كتير أوي برضه!

المسلسل درامي كوميدي.. هيخليك تشوف مع هبة حواديت وخناقات و”نم” بين الصحاب.. وهتقابل فيه شخصيات كتيرة وضحك أكتر.. وعياط ساعات.

هتشوف في هبة نفسك زمان.. هتشوف أحلام.. وشطارة.. وكإنها بتقول يا جماعة أنا عندي حاجة سيبوني بس أثبت نفسي.. هتشوف شغف وحب.. وزعل وضحك.. ومشاعر كتير.

وهتقابل جوه “مستر هادي” اللي بيقدمه الممثل محمد سليمان.. اللي أنا متأكدة إنك هتبقى بتستنى مشاهده عشان تشوف عصبيته وخلقه الضيق اللي مش لايقين على قميصه.

هو آه الناس اختلفت على مين اللي عمل الدور أحسن.. إيمي ولا ناهد.. لكن الأكيد إن كل حد منهم عمل طعم مختلف للمسلسل.. كإنهم مسلسلين مش واحد.. فأنصحك تتفرج وتحكم بنفسك.

ولأ مش هقولك ليه اتسمت هبة رجل الغراب.. هسيبك تخمن وتتفرج وتيجي تقولنا.. ويلا يا سيدي مشاهدة ممتعة.