لو فكهاني وبتحب الفاكهة.. جرب كوكتيلات الفاكهة دي!
الجو بقى حر والتوقيت الصيفي بدأ يعني هتروح شغلك ومشاويرك في الشمس وترجع في الشمس.
وعشان ترطب على نفسك بقى بعد يوم طويل.. جمعنالك شوية كوكتيلات تعملهم في البيت من فاكهة الصيف.. سهلة وطعمها حلو وهتخفف عنك حرارة الشمس الحارقة دي!
-
جوافة وتفاح اخضر وعنب
مليان فيتامين C وألياف ومضادات أكسدة وفوايد قد كده.. غير إن التفاح الأخضر بيخلي الطعم فريش وخفيف.
-
بنجر وبرتقال وجنزبيل
ده هينقذك من الأنيميا وقلة الأكل والفاست فود اللي مبهدلك ده.. وطعمه حلو ولونه أحلى.
غير البوتاسيوم وفيتامينات C و B9 والحديد اللي بيزودوا النشاط وتدفق الدم في الجسم.
-
بنجر وفراولة وليمون
ابن عم رقم 2.. بيعزز المناعة برضه بس لونه أقوى ومزازته أقل.
ماتنساش بس عصرة الليمون الحلوة عشان جسمك يستفيد بيه للأخر.
-
رمان وتوت
فرط حبة رمان على توت مشكل في الخلاط وشوية تلج.. هيخفف الحر وهيظبطلك هضمك وبشرتك ومناعتك في نفس الوقت.
-
جوافة وموز وفانيليا
ده لو عايز حاجة أتقل شوية وكريمي.. والفانيليا بتدي ريحة وطعم شبه الميلك شيك أو الآيس كريم بس ماتكترش منها عشان بتخليك مُر.
-
بطيخ بالفراولة والنعناع
دول يقولوا للصيف قوم يا صيف عشان نقعد مكانك.. ده المشروب الصيفي كما يقول الكتاب.
-
جوز الهند والأناناس
ينفع يتعمل بماية جوز الهند أو بلبن جوز الهند برضه مايقولش لأ.. ده لما هتشربه هتحس إنك قاعد جنبك نخل في كل حتة وقردين صغيرين بيتنططوا حواليك.
-
كانتلوب وأناناس ونعناع
ماينفعش يبقى فيه كانتلوب ومانعملوش يعني.. منعش واستوائي وهيعوض جسمك بالمياه اللي محتاجها.
جربهم وزود الفاكهة اللي تحبها واخترع براحتك.. أهم حاجة لو اخترعت كوكتيل حلو وجديد ياريت لو تعمل حسابنا في كوباية بس.
