مين هيبقى المدرب الجديد لليفربول بعد أرني سلوت؟

قرار مفاجئ هز الكورة الإنجليزية بإعلان ليفربول إقالة مدربه الهولندي سلوت بعد موسم واحد بس من قيادته للفريق رغم إنه كان بطل الدوري الإنجليزي من سنة واحدة بس.. لكن إدارة “الريدز” شافت الفريق دخل في مرحلة سيئة.. فقرروا ياخدوا موقف

رحيل سلوت

ورغم إن سلوت قدر ينهي الموسم في المراكز المؤهلة لدوري أبطال أوروبا إلا إن تراجع النتائج والمستوى كان واضح جدًا.. الفريق فقد شخصيته تدريجيًا ومبقاش بيقدم الكرة السريعة والشرسة اللي اتعود عليها جمهور ليفربول في عصر يورجن كلوب

الموضوع ماكانش نتائج بس لكن كمان طريقة اللعب نفسها اتأثرت.. ليفربول ظهر في فترات كتير من الموسم من غير هوية واضحة وده اللي لمح له محمد صلاح قبل إعلان رحيله عن النادي لما اتكلم عن أهمية الرجوع للكرة الهجومية والضغط العالي اللي كانت سبب رئيسي في نجاحات الفريق خلال السنوات اللي فاتت ومع فتح ملف المدير الفني الجديد بدأت أسماء كتير تتردد بقوة داخل النادي

1- “أندوني إيراولا” المرشح الأقرب

المدرب الإسباني “إيراولا” شكله الأقرب دلوقتي لخلافة سلوت وده حسب تقارير إعلامية إنجليزية كتير بتقول أنه هيكون مدرب المرحلة الجاية.. مدرب بورنموث قدم موسم استثنائي وقدر يقود فريقه بورنموث للتأهل الأوروبي وكمان أنهى الموسم بسلسلة طويلة من النتائج الإيجابية.

اللي بيميز إيراولا هو مرونته التكتيكية وقدرته على تطوير اللاعبين بجانب اعتماده على الضغط العالي واللعب السريع ودي كلها حاجات قريبة جدًا من فلسفة ليفربول اللي الجمهور بيحبها

كمان الإدارة شايفة أنه ممكن يكون بيناسبها ويحافظ على التوازن في الصرف وبردوا الاعتماد على المواهب لأن الإدارة شافت انها صرفت كتير جدًا ومحصلتش حاجة وشايفه أن إيراولا أقرب لنموذج كلوب اللي كان بيجيب صفقة أو اتنين كبار كل سنة مع الاعتماد على الموجودين.

2- المدرسة الألمانية “سيباستيان هونيس” و”ناجلسمان”

هونيس مدرب شتوتجارت بقى واحد من أكتر المدربين المطلوبين في أوروبا خلال الفترة الأخيرة لأنه نجح يرجع شتوتجارت لدوري أبطال أوروبا وقدم كرة هجومية ممتعة معتمدة على الاستحواذ والضغط المستمر

كتير شايفين إنه من الجيل الجديد للمدربين الألمان اللي متأثرين بأفكار كلوب وناجلسمان وده ممكن يخليه خيار مناسب جدًا لأنفيلد

رغم ارتباطه حاليًا بمنتخب ألمانيا في كأس العالم 2026 إلا إن اسم يوليان ناجلسمان ما زال موجود بقوة في الترشيحات.. صاحب الـ38 سنة يمتلك خبرات كبيرة مع لايبزيج وبايرن ميونخ وبيعتمد على أفكار تكتيكية متطورة جدًا وعنده قدرة كبيرة على تطوير اللاعبين الشباب ولو قرر يرجع لتدريب الأندية هيكون من أقوى الأسماء المتاحة في السوق

3- “أوليفر جلاسنر” بطل المفاجآت

المدرب النمساوي أنهى فترته مع كريستال بالاس بشكل رائع بعد ما قاد الفريق لتحقيق لقب أوروبي تاريخي ونجح يبني فريق منظم وقوي تكتيكيًا ورغم إن اسمه مش بنفس بريق بعض المرشحين التانيين لكن اللي حققه خلال السنوات الأخيرة يخليه ضمن الأسماء اللي تستحق التفكير فيها بجدية

4- “ستيفن جيرارد” الأسطورة اللي بتحلم بالرجوع

أسطورة ليفربول وقائد الفريق التاريخي ما زال بيحلم بالعودة لأنفيلد كمدرب.. جيرارد معندوش السيرة الذاتية الأقوى مقارنة بباقي المرشحين خصوصًا بعد تجاربه المختلفة مع أستون فيلا والاتفاق السعودي لكن شعبيته الكبيرة وسط الجماهير ممكن تديله دعم ضخم لو حصل على الفرصة

اسم جيرارد رجع تاني للمرشحين لخلافة سلوت وشايفين أن ممكن جيرارد والجرينتا ممكن يكون الريدز محتاجها الوقت دة ويقدر يعمل حاجة ويبني جيل للنادي

5- مدربهم السابق “يورجن كلوب”

ورغم ابتعاده عن التدريب منذ رحيله عن ليفربول فإن اسم يورجن كلوب هيفضل حاضر كل ما النادي يدخل في أزمة.. عودة المدرب الألماني ممكن تكون حل مثالي على المدى القصير.. كلوب عارف النادي واللاعبين والجماهير أكتر من أي حد ويقدر يعيد الاستقرار بسرعة للفريق خلال موسم أو اتنين وبعدها يتم تسليم المشروع لمدرب شاب يقود المرحلة الجديدة.

وده مش سيناريو جديد في عالم الكرة لأن أندية كبيرة كتير عملت كده قبل كده ورجعت مدربين سابقين عشان يعيدوا التوازن قبل بداية مشروع جديد وكمان كلوب اللي كان قافل فكرة التدريب بعد لما مشي وقال أنه هيستريح رجع تاني وفتح الباب قدام رجعوه للتدريب ودة يخليه مرشح برده

6- جوارديولا؟

يمكن الفكرة تبدو خيالية شوية لكن لو بنتكلم عن المدرب المثالي من الناحية الفنية البحتة فبيب جوارديولا هيكون من أفضل الأسماء الممكنة.. المدرب الإسباني عارف الدوري الإنجليزي واللاعبين وكل تفاصيل المنافسة بعد 10 سنين مع مانشستر سيتي وعنده القدرة إنه يبني منظومة لعب واضحة ويرجع ليفربول للمنافسة على كل البطولات

لكن العقبة الأكبر إن جوارديولا بقى جزء من تاريخ مانشستر سيتي وقضى هناك سنوات طويلة مليانة نجاحات وألقاب وبالتالي هيبقى من الصعب جدًا تخيل انتقاله لتدريب أحد أكبر المنافسين التاريخيين للنادي السماوي

وفي النهاية.. يفضل السؤال مفتوح قدام جماهير الريدز هل يكون إيراولا هو الرجل المناسب للمرحلة الجديدة؟ ولا الرجوع لكلوب هو الحل الأسرع؟ ولا إدارة ليفربول هتفاجئ الجميع باسم جديد محدش متوقعه؟