١٠ نقط يعرفوك إذا كان دكتورك النفسي بيساعدك ولا محتاج تغيره

 في سنة 2011 كان عدد الدكاترة النفسيين في الولايات المتحدة حوالى نص مليون طبيب، لازم كل دكتور منهم يكون محضر ماجستير على الأقل عشان يقدر يمارس المهنة، معروف دايما إن أحسن دكتور نفسي هو اللي مش هيخليك تفضل معاه بتروحله وبتتعالج عنده مدى الحياة، المفروض الدكتور أو المعالج يوصل المريض بتاعه إنه يقدر يتعافى ويتخلص من مرضه ويعتمد على نفسه بعد كده، مش كل المعالجين طبعا عندهم نفس القدرة، فمن أهم الحاجات اللي المفروض العميل أو المريض يعملها إنه يبقى موضوعي وحيادي جدا في تقييم الدكتور اللي بيتعامل معاه، وإنه يعرف هل الدكتور ده كويس أو مناسب له أو لا؟

عشان كده هنقولك على شوية حاجات المفروض تبقى موجودة بينك وبين دكتورك، في قايمة حددها موقع Psychology Today المتخصص في الصحة النفسية:

1- حدود واضحة:

من أهم الحاجات اللي المفروض تبقى بينك وبين دكتورك هو إن مايكونش فيه بينكم تواصل إلا في حدود العلاج، بمعني إنه مش صاحبك ولا شريكك ولا شريك حياتك، وبالتالي مالوش الحق إنه يتصل بيك على طول أو إنه يتطفل على حياتك الشخصية، وفي حالة اختلاف جنس الطبيب عن المريض، فمش من حق أي طرف يـ”فليرت” أو بيغازل التانى أو يبقى عنده ناحيته أي مشاعر رومانسية، ومن الأول المفروض الطبيب/ المعالج يشرحلك إيه هو المقبول وإيه غير المقبول في علاقتكم، وبيحدد عدد الساعات اللي ممكن تكلمه فيها.

2- السرية:

لازم الطبيب/المعالج بتاعك يحافظ على سرية معلوماتك، وفيه بعض المعالجين بيحطوا سياسة الخصوصية بينك وبينهم من الأول، عموما المفروض المعالج بتاعك مايطلعش تفاصيل أو معلومات عنك أو عن الحالات بتاعته من غير علمهم أو إذنهم، ولو حكى ليك عن حالات مماثلة المفروض مايقولش أسماءهم أو تفاصيل عنهم كتير، المفروض المعالج كمان مايقولش أي معلومات عنك لطرف تالت زي أهلك أو شريك حياتك.

3- التوجيه ومعالجة السلوك:

لازم تكون مستريح مع الدكتور بتاعك، لكن مش كل الراحة، بمعنى إنه مش المفروض يبقى بيوافق على كل التصرفات اللي بتعملها أو على كل سلوكك، المفروض المعالج أو الدكتور بيوجهوك للتصرفات أو السلوكيات الصح عن طريق إنهم بيسألوك بعض الأسئلة، أو بيرشدوك على طول للسلوك أو التصرف الصح، ولو دكتورك ماعملش كده لازم تستبدله بدكتور تاني.

4- خطة علاج واضحة ومحددة:

صحتك النفسية مابتختلفش عن صحتك الجسدية، يعني لو روحت لدكتور قلب وبعد فترة لقيت نفسك أسوأ هتبطل تروحله، نفس الكلام في صحتك النفسية، لازم تبقى عارف قبل ما تبدأ العلاج مع دكتورك الخطوات اللي المفروض تاخدها، يعني ماينفعش خطة علاجك تكون سر أو مفاجأة بالنسبة لك، ولازم كمان تناقش اختيارات علاجك في جلساتك الأولى، ومن أهم الحاجات اللي المفروض تلاحظها في نفسك خلال وقت علاجك هو تحسن نتايجك.

5- استخدام المعالج للمناهج المصدقة علميا:

العلاج مش إنك تقضي وقت تتكلم فيها عن مشاعرك، فيه طرق علاج كتير مختلفة، زي الطرق اللي بيكشفوا بيها عن الذكريات القديمة المستخبية جواك، أو زي العلاج المعرفي السلوكي، أو العلاج السلوكي الجدلي، اسأل المعالج أو الدكتور بتاعك عن طريقته ودور عليها واقرأ عنها، ولو حسيت بأي حاجة ضايقتك أو قفلتك اطلب من الدكتور إنه يلتزم بس بالطرق العلمية، ولو شوفت إن الدكتور بيبعد عن الطرق العلمية غيره على طول.

6- احترام غير مشروط:

لازم المعالج بتاعك يكون بيحترمك احترام إيجابي غير مشروط، بمعنى إنه يحترم آرائك ويقبلها ومايكونش بيحكم عليها، ممكن مايوافقش عليها لكنه لازم يحترمها، لازم دكتورك مايوصفكش بالغباء أو الضعف أو النقص بسبب اختياراتك، لو كان دكتورك بيكلمك بطريقة عدوانية أو عاطفية لازم تغيره.

7- قبول القيم المختلفة:

قيمنا بتشكل اللي إحنا عليه، بغض النظر عن معتقداتك الدينية أو السياسية، ماينفعش دكتورك يبقى بيغير قيمك الدينية أو السياسية مثلا، أو إنه يطلب منك المشاركة في أنشطة معينة زي إنك تروح الجامع أو الكنيسة، أو الإيمان بقيم معينة والتصرف على أساسها، مابيكونش قادرين يدوا المريض أحسن علاج، المعالج بتاعك لازم يحتوي قيمك، وأحسن معالج هو اللي بيشاركك رؤيتك للعالم.

8- التعاون مع خبراء تانيين:

الدكتور مش كفاية لوحدة في حالات العلاج، غالبا هيكتب لك على أدوية ليها تأثير نفسي كمان عشان تساعدك على العلاج، والدكاترة المحترفين بينصحوا بعلاج إضافي في حالات الضرورة، واللي هي بتكون من خلال التعاون مع مهنيين تانيين، الدكتور اللي يمنعك عن الأدوية أو عن مهنيين تاني مش هو أفضل اختيار ليك.

9- تطوير علاقاتك:

علاقاتك بالناس اللي في حياتك من أهم الحاجات عشان علاجك ينجح، لو كنت في علاقة سامة أو خطر لازم دكتورك يتكلم معاك عن العلاقة دي، لكن مش المفروض يقولك اقطع العلاقة دي حالا، في الواقع ده لو حصل هيبقى دكتورك بيزود عادة غير صحية في الإعتماد عليه، ومن دور المعالج كمان إنه يشجعك إنك ماتوقفش العلاقات بالناس اللي بتحبهم في حياتك، بعض المعالجين بيطلبوا منك إنهم يقابلوا شريكك أو شريكتك أو حد من أهلك أو حد من صحابك، بس لازم الدكتور يلتزم بالسرية ومايشاركش معلوماتك لطرف تالت إنت مش حابه يعرف معلومة معينة أو معلومات عنك.

10- القابلية للنقد:

أحسن المعالجين والدكاترة ممكن يغلطوا، بس أحسنهم هما اللي هيقدر يتعامل مع نقدك له بحيادية وموضوعية ومش هيشوفه مرض عقلي وهيشوفه نقد بناء، فلو عندك حق فعلا هيقدر يصلح من نفسه ويطور سلوكه.

في النهاية العلاج النفسي هو عملية كامله بيشارك فيها طرفين ناقصين وفقا لطبيعتنا البشرية، وبالرغم من كده لازم تكون واثق في دكتورك ولازم تحس بالراحة في مشاركتك له أصغر التفاصيل عن يومك وحياتك وذكرياتك وأضعف الأجزاء فيك، لو حاسس أي عيب أو مشكلة مع طبيبك النفسي، مفيش مشاكل فيه فيه دكاترة كتير أوي، خد وقتك في التدوير والكلام وخوض التجربة مع دكتور جديد أكتر كفاءة.