دليلك لفستان مثالي في أي مناسبة خلقها ربنا

3 شهور الصيف دول مليانين مناسبات قد كده.. ولأننا عارفين الزنقة اللي بتبقى فيها عشان تلاقي “أوتفيتة” حلوة تروحي بيها فرح بنت عمة صاحبتك.. والسهرة اللي عند الخياط عشان يعملك الفستان اللي شوفتيه على النت وهيطلع شبه ستارة الحمام.. عملنالك دليل يساعدك تختاري الفستان المناسب.. للمناسبة “المناسبة”

أحمد مش زي الحاج أحمد

الفستان اللي عايزه تجيبيه زي صاحبتك ده ممكن مايطلعش حلو عليكم انتم الإتنين.. محتاجة تعرفي شكل جسمك إيه الأول عشان تعرفي شكل الفستان اللي هيليق عليكي ومايبنيش أي عيب أو أي حاجة مش عايزينها تبان.

فمثلًا لو انتي شكل جسمك “كمثري” هتحتاجي فستان صك أو واسع بسيط مثلًا.. فلما تروحي تلبسي منفوش ماتزعليش بقى لو طلعك تخينة في الصور وانتي مش كده.. وده برضه ينطبق على الفساتين اللي بتشوفيها على النت طبعًا.

لابسة الخامة دي ورايحة على فين كده؟

بعد ما عرفتي شكل جسمك وعرفتي شكل الفستان اللي لايق عليه.. محتاجة تسألي نفسك هو انتي رايحة فين؟

لأن لو رايحة خطوبة صاحبتك في البيت غير لو رايحة فرح أخوكي غير لو رايحة حفلة تخرجك.

الأفراح والذي منه محتاجة إنك متأفوريش أوي في اللولي والبربرق لو انتي بعيدة شوية عن أصحاب الفرح.. خليكي في الستان والأورجانزا على خفيف.

ولو خطوبة أو سبوع أو أي مناسبة في البيت.. خليكي في الشيفون.. التُل الناعم.. الستان المطفي شوية والحاجات البسيطة.

أما بقى لو اتخرجتي فخليكي في الكريب والشيفون.. الحاجات اللي في الشياكة منه.

محتاجة برضو تشوفي حركاتك في المكان.. يعني لو هتطلعي تتكرمي مثلًا فانتي محتاجة فستان مش طويل أوي عشان ماتقعيش على وشك.. على عكس لو معزومة في مكان هتسقفي فيه بس.

بينك يا مُنى؟

تالت حاجة مهمة وهي اللون.. عشان تختاري لون الفستان محتاجة تعرفي حاجتين:

الأولى هي الألوان اللي بتليق عليكي.. فواتح.. غوامق.. أحمرات ولا أزرقات ودي هتبقى سهلة لو انتي عارفة “الأندر تون” بتاع بشرتك.. اللي هو من الآخر بيليق عليكي الألوان الدافية ولا الباردة.

طب ولو مش عارفة الأندر تون بتاعك؟.. بصي بصة هنا هتعرفي تحدديه إزاي؟

تاني حاجة وهي ألوان المكان.. ودي هتفرق في إيه؟

ببساطة في الصور.. عشان تحسي الصورة ماية واحدة وماشية مع بعضها ومُريحة للعين زي اللي بتشوفيهم على النت كده.

طب ولو مش عارفة شكل المكان ولا الألوان بتاعته؟.. بخمسة جنية نت وأحلى فلتر عليكي أو إيديت بسيط هيظبطلك الدنيا.

طب لو مابروحش مناسبات؟

حد يقولي طب أنا صاحبتي مابتحبش الأفراح والمناسبات اللي زي دي؟ تلبس فساتين ولا ماتلبسش؟

لو صاحبتك دي بتحب الخروج الصبح خليها في الفساتين القطن أو الكتان الخفيف.. الواسع اللي مابيشفش.. عشان دول أحسن حاجة للصيف وهتقدر تلاقي أشكال وألوان منهم كتير.. وده طبعًا يليق لو رايحة عيد ميلاد أو أي مكان مفتوح الصبح.

ولو بتحب تخرج بليل هيبقى مناسب أكتر الدانتيل أو الشيفون المبطنين… خفاف عشان الجو وشيك للنزول بليل.

كده بقى معاكي زتونة الفساتين اللي هتنقذك في أي مناسبة عشان ماتقوليش إن ذا جلوكال مقصرة معاكي في حاجة أهو.