١١ نصيحة مستوحاة من قصص حقيقية لازم تعرفهم قبل ما تبعت “فويس نوت”

أوقات كتير بنكسل نكتب وإحنا بنعمل “شات” مع حد فبيبقى الأسهل إننا نبعت “فويس نوت” عشان نختصر الوقت والمجهود خصوصا إنها موجودة في الشات بتاع “الابلكيشنز” اللي بنستخدمها ماعدا العاق تويتر، بس مش كل الناس بتحب تسمع “فويس نوتس” وده من اللي عملناه في الخاصية واستخدمنا ليها.

لو قررت تبعت لحد “فويس نوت” ماتكرهوش في اليوم اللي اتكلم معاك فيه وفي معرفتك، خلينا نقولك شوية نصايح عشان تبعت “فويس نوت” ماتشتمش عليها:

1- حاول تدخل في الموضوع اللي هتتكلم فيه على طول من غير ما تتكلم في مواضيع فرعية كتير وبلاش تبدأ بقصيدة من السلامات والتهاني.

2- سجل “فويس نوت” في مكان هادي بلاش وإنت قاعد بتتفرج على التليفزيون ولا وإنت مشغل حمو بيكا جنبك، وعارفين إن ساعات العشم بيبقى واخدك بس بلاش الحمام عشان الصوت بيرن وبيبقى باين.

3-  ياريت بلاش تسجل الفويسنوت وإنت بتاكل عشان صوت المضغ بيبقى متعب في الودن أوي وساعات بيبقى مقرف، واللي متعب أكتر لو العشم خدك وتجردت من آدميتك وقررت تغني.

4- افتكر إنك بتبعت فويسنوت عشان توفر وقتك ومجهودك فبلاش تفتكر نفسك أم كلثوم وتسجل بالـ 10 والـ 20 دقيقة عشان محدش مهما كان العشم بينك وبين أي حد صعب يسمعك الوقت ده كله بتتكلم لوحدك.

5- خليك فاكر إنك مش “نبطشي” في فرح شعبي، فبلاش برضه 10 “فويس نوتس” ويبقوا ورا بعض وكل جملة في “فويس نوت” لوحدها.

6- سيب ثانية واحدة قبل ما تتكلم خلي اللي بيسمعك يلحق يحط الموبايل على ودنة عشان بلاش الفضايح.

7- لو هتشتم أو هتقول حاجة مش مناسبة في الـ”فويس نوت” أو حاجة خاصة قول قبلها بالكتابة للشخص يسمع لوحده أو يحط الـ”هيد فونز”

8- بلاش “مممممم” و “ءءءء”.. لو عايز تفكر في حاجة أو تتأمل في خلق الله.. ياريت تعمل كده قبل أو بعد الفويس نوت.. مش محتاجين نسمع صوت تفكيرك.. وصوت نفسك كمان يا متتنهدش “وهيييييح”.. إنت مش الفنانة أنغام.

9- لو الحاجة اللي هتقولها ينفع تتكتب.. ماتبعتش فويس نوت أصلا.. الواحد فيه اللي مكفيه.

10- جروب الشغل مش مكان مناسب للفويس نوتس.. دول مش ولاد خالتك عشان صوتك يوحشهم.

11- بلاش تسجل وإنت لسه صاحي من النوم.. عشان عارف صوتك العادي اللي بنشتكي منه ده.. بيبقى أصعب تقريباً ب 178 مرة وإنت لسه صاحي