لو عايز تفصل عن الأخبار الكئيبة.. ١٧ معلومة ماتعرفهاش عن الزرافات

الزرافة بالنسبة لنا هي الحيوان اللطيف اللي بنشبه بيه صحابنا الطوال أو اللي متصورين معاها الصورة بتاعت جنينة الحيوانات وإحنا صغيرين وهي بتاكل من فوق رأسنا أو لعبنا معاها في جنينة الحيوانات بس، يمكن لو بتحب الزراف أوي هتبقى عارف إنه أطول الثدييات على الأرض وممكن كام معلومة تانية.

بمناسبة يوم الزرافة العالمي هنقولك شوية معلومات ماتعرفهاش عن الزراف وفقا لموقع “mental floss” وموقع “luxe adventure traveler” :

1- الزرافة ممكن تجري بسرعة 35 ميل في الساعة لكن على مسافات قصيرة.

2- الزرافة بتحتاج تشرب مياه كل يومين، لإنها بتحصل على المياه من النظام النباتي اللي عايشة عليه، ودي حاجة كويسة لإن طولها بيخلي عملية الشرب أصعب، وبيكون فيه خطر عليها لو كانت بتشرب وهجم عليها أسد.

3- الزراف حديثي الولادة يقدر يقف ويجري كمان من بعد ساعات من ولادته.

4- ممكن لسان الزرافة طوله يوصل لـ 20 بوصة ولونه داكن كمان.

5- الزرافة بتفضل في وضع عمودي حتى وهي نايمة ولو نامت على الأر ض فدي بتبقى مجرد قيلولة سريعة لمدة 6 دقايق وبتصحى تاني.

6- الزرافة بيبقى عندها قرون متغطية بالشعر، ولكن الذكور منها بس اللي بيستخدموها في الخناق.

7- الزرافة بتحتاج أكتر من 75 رطل أكل في اليوم ومع إنها بتاكل أوراق ونباتات فده معناه إنها بتقضي معظم وقتها في الأكل.

8- اسم الزرافة العلمي “Giraffa camelopardalis” وده جيه من اعتقاد الإغريق القداما إنها شبه الجمل اللي لابس معطف من جلد النمر.

9- بالرغم إن رقبة الزرافة طويلة جدا إلا إنها بتتكون من 7 فقرات بس زي الإنسان ولكن الفقرات أطول لدرجة إن كل فقرة طولها حوالي 10 بوصة.

10- الزرافات بتمتلك نظام قلبي وعائي، وطول قلبها حوالي 2 قدم ووزنه حوالى 25 رطل.

11- ده غير إن الأوردة أو العروق الوداجية  بتحتوي على سلسلة من الصمامات اللي اتجاهها واحد وده عشان يمنع الدم الزيادة إنه يتدفق لرأسها لما توطي دماغها وهي بتشرب.

12- الزرافات المؤنثة بتحاول هي كمان تسيطر وبتدخل مع الذكور في نوع من الطقوس بيزقوا فيه جسم ورقبة بعض.

13- بالرغم إن الزرافات بتجري وبتهرب من الدفاع عن نفسها أو الهجوم إلا إن ممكن ركلة من رجلها تسبب ضرر كبير ممكن يوصل للقتل لأسد حظه سئ.

14- ذكور الزرافات بيختبروا خصوبة أنثى الزرافة عن طريق تذوق بولها.

15- يوم 21 يونيو 2014 هو أول يوم عالمي للزرافات.

16- أول زرافة دخلت أوروبا كانت عن طريق “يوليوس قيصر” من اسكندرية سنة 46 قبل الميلاد كنوع من احتفاله برجوعه لروما منتصر بعد حروب أهلية كتير.

17- الزرافات والعصافير صحاب وبينهم علاقة تكافلية، الزرافة بتسمح للعصافير إنهم يتغذوا على العث والأوساخ منها وبكده الزرافة بتحافظ على نضافتها والعصافير بتاخد وجبة لذيذة وركوبة مجانية.