8 فوائد للضحك.. لو عرفتهم هيخلوك عايز تضحك أكتر!
لو سألتك دلوقتي إيه سر أي قعدة حلوة مع صحابك أو أهلك.. بنسبة 94.2% هتقولي بتبقى حلوة عشان قاعدين بنضحك سوا.. ولو سألتنا جبنا النسبة دي منين هنقولك بنتوقع ياأخي!
بس في الحقيقة بقى وكلمتين من أبو جد إن الضحك جزء لا يتجزأ من حياتنا اليومية كبني آدمين عمومًا ومصريين خصوصًا… وبلا شك إن دي حاجة بتميزنا حتى ولو كنا مش زي بعض ومش بنضحك على نفس الحاجات.. بس بنضحك.
ومن هنا حبينا مانسيباكش بتضحك بس لأ كمان نعرفك شوية فوائد للضحك هتحببك فيه وتخليك عايز تضحك أكتر.
وحسب كلام Healthline و UCLA Health فوائد الضحك هم:
1. بيعزز المناعة وبيقاوم الأمراض
لما بتضحك جسمك بيقلل هرمون التوتر اللي هو “الكورتيزول”.. وبيزود الخلايا المناعية والأجسام المضادة اللي هتحتاجها بعد كده لو تعبت بأي مرض
2. بيحسن وظائف القلب والأوعية الدموية
عشان بيزود تدفق الدم وبيقلل الضغط العالي.. وده معناه إن فرص إصابتك بأمراض القلب هتقل.
كمان وقت الضحك ضربات قلبك بتزيد لفترة بسيطة.. وبعدها عضلاتك بتسترخي وضغطك بيقل.. بالظبط كأنك عملت شوية تمارين خفيفة.. الكلام ده بيساعد في إيه؟ هيجري الدورة الدموية في جسمك يا صاحبي عايز إيه أكتر من كده طيب؟
3. بيدعم صحة الجهاز التنفسي والرئة
غير إن الضحك بيحرك الحجاب الحاجز والرئتين في جسمنا.. وبيخرج كمية كبيرة من ثاني أكسيد الكربون وبيحفز دخول الأكسجين وبيفتح مجرى التنفس.. يعني هتاخدلك شوية هواء حلوين كمان.
4. تمرينة على خفيف
والمرة الجاية وانت بتضحك لو ركزت هتلاقي إن فيه عضلات كتيرة بتتحرك في نفس الوقت.. عضلات البطن والحجاب الحاجز والكتفين فتعتبر تمرينة خفيفة وسهلة.. بس ماتخدهاش حجة وتقضيها ضحك وتفكس للتمرين اللي بجد.
5. بتحسن الإبداع والإدراك
المشاعر الإيجابية الحلوة اللي منها “الضحك”.. بتزود التركيز وبتحسن الذاكرة وبتخليك تفكر بإبداع أكتر.. فرصتك تكتشف موهبتك بقى.
6. بتقوي العلاقات
لو فكرت في علاقتك اللي حواليك.. هتلاقي ناس كتير جدًا بتحبهم عشان بيضحكوك أو بتضحكهم.. أو بتفهموا هزار بعض من الآخر.. فالتقارب والثقة في العلاقات اللي قايمة على الضحك واللذاذة بتبني روابط عاطفية حلوة وبتقربنا من بعض أكتر.
7. بيعدل المود
هتقولي ما دي بديهية يعني إيه الجديد؟.. هقولك إن اللي ماتعرفوش
إن ده مش شئ مؤقت لأ.. ده كمان يقدر يقلل أعراض الاكتئاب ويزود شعورك بالرضا عن الحياة على المدى البعيد.
8. بيقلل التوتر الجسدي والألم
الضحك بيفرز هرمون “الإندورفين” واللي عبارة عن شوية مواد كيميائية طبيعية في الجسم برضو بتعدل المزاج وبتشتغل كمسكن طبيعي للألم.
في النهاية الضحك حلو.. وسهل.. وجميل.. وقادر يحل مشاكل كتير ويفض خناقات.. ويقلل الزعل والتوتر ويحافظ لنا على علاقتنا.. فحافظ أنت عليه بقى وربنا يديم علينا الضحك والانبساط.
