في ذكرى نصر أكتوبر.. وبالذات في الأوقات اللي احنا فيها دلوقتي.. الناس كلها كانت بتتكلم عن النصر.. وفي نفس الوقت كان فيه صناع محتوى مش ناسيين الذكرى وعارفين أهمية إنهم يتكلموا عنها ويفكروا الناس بيها.

ريهام عياد.. القصة وما فيها

في برنامجها “القصة وما فيها” الإعلامية ريهام عياد عملت حلقة اتكلمت فيها عن التجهيزات للحرب.. والمصاعب اللي كانت بتواجه الجيش وإزاى قدروا يحلوها.. وكمان اتكلمت عن خطة الخداع الاستراتيجي وإزاي مصر أقنعت العالم إنها مش ناوية تحارب دلوقتي.. وإزاي كان فيه حاجات ماحدش لاقيلها حل والجيش المصري قدر يتغلب عليها بأفكار ممكن تبان بسيطة.

محمد ممدوح – ملحمة النهاية

في حلقة خاصة لـ “محمد ممدوح” في برنامجه.. اتكلم عن ملفات وتقارير طلعت من الجيش الإسرائيلي نفسه وبيرد على فكرة إن المصريين نسيوا حرب أكتوبر ومابقوش يتأثروا بيها واللي بيحاول يصدرها إعلام الاحتلال.. وكمان اتكلم في حلقته عن التكنيك اللي كان الجيش الإسرائيلي بيشتغل بيه وفند أكاذيب الاحتلال الإسرائيلي بتقارير وحكايات من عندهم هم نفسهم.

محمود سعد – إنه في يوم 6 أكتوبر 1973

من زاوية تانية خالص.. الإعلامي محمود سعد بيحكي في قناته على يوتيوب عن وقت الحرب من حكاياته وهو في الشارع.. مواطن بيسمع بيان الحرب والنصر.. والناس في الشارع كانوا حاسين بإيه وبيتصرفوا إزاي.

صائد الدبابات – المواطن سعيد

حكايات عن بطولات المصريين في حرب أكتوبر.. من الرقيب أول محمد عبد العاطي اللي اتسمى بـ “صائد الدبابات” من كتر الدبابات اللي قدر يوقعها.. للطيار سليمان ضيف الله اللي مسابش طيارته بعد ما اتضربت عشان يوقع طيارة من طيارات العدو.

أزمان بودكاست

في البودكاست ده اختاروا إنهم يتكلموا عن شخص معين كان ليه تأثير كبير في حرب أكتوبر.. الشهيد إبراهيم الرفاعي.. قائد المجموعة 39 قتال واللي كان ليه دور كبير في حرب الاستنزاف وفي الحرب نفسها.

الروائي – شهادات أسرى حرب أكتوبر

في الحلقة دي محمد خالد اتكلم عن شهادات الأسرى من جنود الاحتلال الإسرائيلي وكانوا حاسين بإيه وإزاي افتكروا إن إسرائيل انتهت بعد الحرب مع مصر والصدمات اللي اتعرضوا ليها وفشل جيش الاحتلال الإسرائيلي في مواجهة مصر.