عدو التعاطف.. إيه هي مراقبة المشاعر أو Emotional Monitoring وإزاي تقللها؟
لما بتسمع مشكلة حد تحبه بتبدأ تفهمه وتحسسه إنك جنبه ودي حاجة صحية جدًا في العلاقات لكن لو زادت عن حدها واتحولت إنك بتراقب كل تصرف ليه عشان ماتخليهوش زعلان فدي مشكلة محتاج تاخد بالك منها وهي مراقبة المشاعر.. فهنقولك إيه هي والفرق بينها وبين التعاطف وليه بتعملها حسب موقع VeryWell Mind وPsychology Today
يعني إيه مراقبة المشاعر/ Emotional Monitoring؟
بتبقى ماشي تراقب وتحلل مشاعر اللي حواليك خاصة الدايرة القريبة ليك.. وده عشان تتوقع هما هيتصرفوا إزاي وده عادة بيحصل من غير ما تحس
إيه علامات مراقبة المشاعر؟
- بتتنبأ بالمشاعر: فبتبدأ تركز مع نبرة صوت اللي قدامك وتعبييرات وشهه ولغة جسده طول الوقت عشان تسرح بخيالك وتفكر يا ترى إيه ممكن يكون مضايقه وتشوف لو كنت قولتل حاجة زعلته
- الاطمئنان المستمر: فتكرر سؤالك عليه من وقت للتاني لو كان زعلان منك ولا قولت حاجة عصبته ولا لأ
- بتدور على أي ردة فعل شديدة: فبتراقب أي علامة بتعبر عن مضايقته أو زعله عشان تسأله عنها وكأنك مسؤول يبقى كويس حتى لو مش بسببك
- مابتحبش الكلام يتقفل: غير لما تعرف منه إيه مزعله حتى ولو بشكل غير مباشر.. ولو ماردش هتعيد كل المواقف بينكم في دماغك وتسحل نفسك في كل كلمة قولتها
- بتاخد حذرك: فبتخاف تتكلم في مواضيع معينة أو تقول حاجة بعفوية ليزعل منها أو يضايق.. وحتى مابتقولش رأيك بصراحة عشان ماتتخانقوش فتضايقه
- بتشيل مسؤولية مشاعره: فبتشخصن مشاعره وتصرفاته وبتشوف إنك انت السبب فيها وبتشوف إن دورك تبسطه
ويفرق إيه التعاطف عن مراقبة المشاعر؟ وهل هما واحد؟
ممكن تحس إن مراقبة المشاعر حاجة كويسة وفاكر إن ده كده تعاطف لكن ده مش صح.. لأن التعاطف بيحصل كرد فعل على موقف بيتحكيلك فبتتفهم وتستوعب مشاعر اللي قدامك لكن المراقبة انت قلقان فمركز مع كل شعور عشان تتوقع أي حاجة وبتتعامل إن حل المشكلة مسؤوليتك انت لوحدك
طب ليه بتراقب مشاعر اللي حواليك؟
الموضوع بيبدأ من الطفولة خاصة لو كنت في بيت بيحملك مسؤولية لغبطة أي حاجة بتحصلهم.. والتلاعب وصدمات التجارب السابقة ليها دور في إنها تحولك لشخص بيحاول يرضي اللي حواليه طول الوقت.. فبتحاول تحمي نفسك من الألم بأنك تعملهم اللي يخليهم بيحبوك.. والخوف من الرفض أو الوحدة بيحركك إنك تريح اللي قدامك بأي طريقة
إزاي تقلل من مراقبة المشاعر عشان يكون الموضوع صحي؟
-
- فرق بين القلق والحقيقة: ففي اللحظة اللي بتراقب فيها مشاعر اللي قدامك ماتفترضش حاجة إلا لو فيه سبب يثبت مخاوفك
- خلي فيه لغة تواصل: فبدل ما كل حد دماغه تسوحه.. من وقت للتاني اتكلم مع اللي قدامك بصراحة عن أي مواضيع عدت وضايقتكم من بعض من غير لف ودوران
- اتكلم عن مشاعرك: وماتخافش يتحكم عليك ولا تخبي مشاعرك عشان خايف تترفض
-
- اعرف مسؤوليتك الحقيقة: فكل حد مسؤول عن مشاعره.. ودورك إنك تفهم إحساس اللي قدامك وتحتويه بس حل مشاعره دي بره عنك
- ماتربطش إحساسك بالأمان بمشاعر حد: وافتكر تبقى حنين على نفسك وماتقعدش تطلعها إنها سبب خراب كل شئ دايمًا
وفي الآخر انت محتاج تحط نفسك أولوية وتهتم بيها زي ما بتهتم باللي قدامك وماتجيش على نفسك عشان أي حد مهما كان مين
