إيه قصة حمزة عبد الكريم لاعب الأهلي اللي قرب يحترف في برشلونة؟

 الكورة المصرية ممكن تبقى على موعد مع خطوة استثنائية جدًا .. لاعب مصري شاب يلبس تيشيرت برشلونة ويحترف رسميًا في واحد من أكبر أندية العالم.. حمزة عبد الكريم مهاجم الأهلي الشاب بقى أكتر اسم متداول اليومين دول.. والسبب إنه قريب جدًا من اللعب لنادي برشلونة.

اسم “حمزة عبد الكريم” بقى مش مجرد موهبة طالعة من الأهلي.. ده بقى عنوان لحلم  ممكن يفتح باب لجيل كامل من اللعيبة الصغيرين.. جيل نحلم إنه يقود منتخب مصر في السنين الجاية ويكمل صورة الكورة المصرية في أوروبا.. اللي بيحصل دلوقتي  بيدي أمل كبير إنها  تبقى بداية للحلم ده.

موهبة خطفت عيون الغرب 

حمزة عبد الكريم اللاعب المصري الشاب مواليد 2008.. واحد من أبرز المواهب اللي طلعت من قطاع الناشئين في النادي الأهلي في السنين الأخيرة.. بدأ رحلته جوه أكاديمية الأهلي وخطف الأنظار بسرعة بسبب سرعته ومهاراته الفردية وحسه التهديفي العالي.

التألق ده خلاه عنصر أساسي مع منتخب مصر تحت 17 سنة في البطولات القارية والدولية.. خصوصًا كأس العالم للناشئين اللي كانت بوابة الشهرة الحقيقية ليه على المستوى الدولي.

أول سلمة لحمزة 

مع تألقه المستمر في المنتخبات السنية الأهلي بدأ يصعّد حمزة عبد الكريم للفريق الأول بشكل تدريجي خلال موسم 2024 – 2025.. وشارك في شوية مباريات رسمية بس مع وجود لاعيبة كتير في مركز الهجوم ماقدرش يفرض نفسه أساسي.

رغم إن مشوار مصر في كأس العالم للناشئين ماكنش طويل.. إلا إن حمزة لفت الانتباه بقوة جسمانه ومهاراته.. وبدأت تقارير صحفية أجنبية تتكلم عن اهتمام أندية كبيرة زي بايرن ميونيخ وميلان وأرسنال.

لكن الاهتمام الأوضح والأكثر جدية جه من برشلونة.. النادي الإسباني دخل في مفاوضات مباشرة مع الأهلي في ديسمبر 2025.. في إطار مشروع المواهب الشابة اللي شغال عليه النادي الكتالوني.

صحف زي موندو ديبورتيفو وآس وماركا اتكلمت عن اللاعب وشبّهته بإيرلينج هالاند.. وقالت إن برشلونة فكر في ضمه بعد إصابات ضربت فريق الرديف.. وإن النادي شايفه مشروع مهاجم مهم للمستقبل.

عرض البارسا الرسمي

برشلونة قدم عرض رسمي للأهلي.. إعارة حمزة عبد الكريم لمدة 6 شهور مع أحقية الشراء في نهاية الإعارة.. وقيمة خيار الشراء في العرض الأول كانت حوالي 4 ملايين يورو.

الخطة كانت إن اللاعب يبدأ مع فريق برشلونة الرديف.. مع متابعة مستمرة من الجهاز الفني للفريق الأول.

بعد تحفظ الأهلي على العرض.. برشلونة رجع بعرض مالي محسّن.. ووفق تقارير إسبانية القيمة وصلت لحوالي 2 مليون يورو صافي.. في محاولة لتقريب وجهات النظر وإنهاء الصفقة.

حسابات المستقبل

الأهلي تمسك بحقوقه المالية وطلب 2 مليون يورو مبلغ ثابت.. بالإضافة لـ 6 ملايين يورو حوافز مرتبطة بالمشاركة والإنجازات.. عشان توصل الصفقة لحوالي 8 ملايين يورو.

كمان الأهلي اشترط نسبة 20% من أي بيع مستقبلي للاعب.. تحسبًا لانفجاره فنيًا في أوروبا.. وفي تقارير مصرية تانية قالت إن الأهلي طلب 500 ألف دولار مقابل الإعارة و2.5 مليون دولار في حالة الشراء النهائي.. مع تأكيد إن الرقم النهائي اللي الأهلي ممكن يوافق عليه فعليًا يدور حوالين 5 ملايين يورو.

الموقف الحالي 

اختلاف الأرقام بين التقارير المصرية والإسبانية سببه اختلاف العملات وطريقة احتساب الحوافز.. و الصحفي “فابريزيو رومانو”  أكد إن المفاوضات بين برشلونة والأهلي مش ماشية بسلاسة.. وإن لسه فيه خلافات معطّلة إتمام الصفقة لحد دلوقتي.

لكن فيه تقارير بتقول إن برشلونة وفقًا لموندو ديبورتيفو حسنت نسبة البيع المستقبلي 15 % بعد لما الاهلي كان طلب 20 ودي اللي ممكن تخلي الأهلي يوافق على العرض.

هل الصفقة قربت؟

باسل طبّال مراسل بي إن سبورتس في برشلونة كشف يوم 30 ديسمبر 2025 إن برشلونة قريب جدًا من حسم صفقة حمزة عبد الكريم.. خصوصًا إن النادي محتاج اللاعب في أول أسبوع من يناير وطبّال قال إن برشلونة قدم عرضه الأخير رسميًا للأهلي.. والمرّة دي الأمور أقرب للحسم عن أي وقت فات.

وفي النهاية الحلم بقى أقرب من أي وقت فات.. وحمزة عبد الكريم ممكن يبقى أول لاعب مصري شاب يفتح باب برشلونة رسميًا.. ويكتب فصل جديد في تاريخ الكورة المصرية.