“الكاروم”.. لعبة بين البلياردو والطاولة
لعبة الكاروم واحدة من الألعاب اللي أول ما تشوفها تحس إنها خليط غريب شوية بين البلياردو ولعب الطاولة.. لوحة خشب مربعة.. أقراص.. فتحات في الزوايا.. بس من غير عصاية.. كله معتمد على صباعك وتركيزك.. وده اللي مخليها لعبة ممتعة وسهلة في الشكل بس عميقة في اللعب.
يعني إيه كاروم؟
الكاروم لعبة طاولة بتتلعب بين لاعبين أو فريقين.. فكرتها بسيطة.. تدخل الأقراص في الجيوب اللي في زوايا اللوحة باستخدام قرص أكبر اسمه السترايكر.. كل ضربة محتاجة دقة وحساب زوايا مش أقل من البلياردو
رغم بساطة الأدوات.. اللعبة محتاجة ذكاء وتكتيك وإحساس عالي بالتحكم.. وده اللي خلاها تخرج من كونها لعبة بيت أو قهوة وتتحول لرياضة منظمة في دول كتير.
طريقة اللعب والهدف
اللعبة بتبقى مكونة من 9 أقراص بيضا و9 سودا ومعاهم قرص أحمر اسمه الملكة.. كل لاعب أو فريق ليه لون محدد.. والهدف إنه يخلص كل أقراصه الأول والنقطة الأهم هي الملكة.. الملكة ما تتحسبش غير لما اللاعب يدخلها وبعدين يغطيها فورًا بقرص من لونه.. لو الترتيب اتلخبط الملكة بترجع نص الطاولة.. وده بيزود التوتر ويخلي كل ضربة محسوبة كويس.
بداية الكاروم
أصل لعبة الكاروم راجع للهند.. وشكلها الحديث ظهر تقريبًا بين القرن الـ18 والـ19.. في الأول كانت لعبة بيلعبها الأمراء والنخبة على طاولات معمولة يدويًا.. وبعد كده نزلت للشارع وبقت لعبة شعبية جدًا ومع الوقت القوانين اتنظمت.. واللعبة خرجت من إطار التسلية وبقت رياضة ليها قواعد وبطولات
تنظيم دولي
في سنة 1988 اتأسس الاتحاد الدولي للكاروم.. واللي بقى الجهة الرسمية المسؤولة عن تنظيم اللعبة في العالم كله.. الاتحاد ده بيحط القوانين.. يعتمد البطولات.. ويشرف على الاتحادات الوطنية ووجود اتحاد دولي نقل الكاروم من لعبة محلية لرياضة معترف بيها خصوصًا في آسيا وأوروبا.
بطولات وأبطال
الاتحاد الدولي بينظم بطولات عالمية وقارية بشكل منتظم.. أبرزها بطولة العالم للكاروم.. وبتتلعب بنظام احترافي كامل بحكام وتصنيفات رسمية للاعبين
الهند وسريلانكا مسيطرين على اللعبة بشكل واضح.. وعندهم قاعدة لاعيبة كبيرة ونظام منافسات قوي.. وده مخلي أبطالهم دايمًا موجودين على منصات التتويج.
واللعبة ليها شعبية جدًا في الهند وسريلانكا وبنجلاديش.. وفي أوروبا بدأت تكبر خصوصًا في ألمانيا وإيطاليا وسويسرا.. البطولات هناك بقت منظمة وحضورها بيزيد سنة بعد سنة
في العالم العربي الكاروم لسه موجودة كلعبة ترفيهية أكتر منها رياضة رسمية.. ومفيش اتحادات قوية لحد دلوقتي.. وده بيفتح باب كبير إنها تتطور لو لقت دعم وتنظيم.
رياضة ولا تسلية؟
رغم إن ناس كتير بتتعامل مع الكاروم على إنها لعبة قعدة ولمّة صحاب.. إلا إنها على المستوى الدولي رياضة كاملة بقوانين صارمة وبطولات رسمية وسه الكاروم ما دخلتش الأولمبياد.. لكن انتشارها المتزايد وتنظيمها العالمي بيخلي حلم الاعتراف الأكبر مسألة وقت مش أكتر.
