ليه فيه ناس مابتحبش تلبس تقيل في الشتاء؟

في الأيام التلج زي دي تبقى انت لابس 4 طبقات وشرابين وبرضه سقعان وتبص على صاحبك لابس بنص كم ولما تسأله يقولك إنه مش سقعان أصلًا فتفتكر إنه روش.. بس هو فعلًا بيروشن ولا فيه أسباب ورا إن فيه ناس مابتحبش تلبس تقيل في الشتا؟ كمل وانت تعرف!

1- حساسية اللمس الحسية (Tactile Defensiveness):

حالة عصبية بيحس بيها الشخص بمضايقة كبيرة لما بيلمس أي حاجة وده لأن دماغه بترجم أي لمسة خفيفة لانزعاج لأنه بيحس بكل حاجة أكتر من الطبيعي

2- اضطراب المعالجة الحسية (Sensory processing disorder)

هو اختلاف في طريقة فهم الدماغ للمعلومات الحسية اللي بيتعرض ليها واستجابته ليها.. والاضطراب ده بيكون في مختلف  الحواس واللي منها هنا اللمس.. ودي بتكون فرط الاستجابة الحسية (SOR) اللي الحاسة دي بتستجيب لكل حاجة بتحسها بشكل شديد أوي وسريع جدًا أو حتى بتحسها لفترة طويلة أوي عكس باقي الناس الطبيعية

3- اللبس التقيل والضغط على الأعصاب

طبقات الشراب اللي بتتلبس فوق بعض قادرة إنها تضغط على عصب في الرجل اسمه العصب الشظوي.. والعصب ده مسؤول عن رفع القدم فلما بيحصل عليه ضغط بتتصاب الرجل بمرض اسمه “تدلي القدم أو القدم الساقطة” بيكون الشخص بيجر الرجل المصابة.. عشان كده الدكاترة بتنصح إن بلاش تلبس شرابين فوق بعض وده سبب تاني للناس اللي مابتحبش تتقل في الشتا

4- تنظيم حرارة الجسم (Thermoregulation)

دي عملية بتخلي الجسم يحافظ على درجة حرارته الداخلية الأساسية وده بقى كمان بيساعد كل أجهزة التنظيم الحراري إنها ترجع للجسم لحالة توازن داخلي وتكون حرارته مستقرة وطبيعية

ودي بتختلف من شخص للتاني حسب شوية عوامل ومنها:

1- الغدة الدرقية: بتأثر على إحساس جسمك بالحرارة.. فلو فيها خلل زي فرط نشاط الغدة الدرقية ده بيخلي إحساسك بالحرارة أعلى من الطبيعي وبيزود من التعرق فمابتقدرش تتحمل الحرارة وبالتالي لبس تقيل يحررك أكتر

2- الجلوكوز: الحرارة اللي بينتجها الجسم بتتأثر بارتفاع مستويات الجلوكوز.. فمثلًا لما بتاكل وجبة فيها بروتين أو كربوهيدرات زي حلة المحشي في الشتا.. الجسم حرارته بتزيد وبتحس بالدفئ.. وده عشان الجسم بيحول الأكل ده لجلوكوز وبالتالي بيتحول لطاقة بتتخزن في الجسم على شكل دهون وده بيخلي درجة حرارة الجسم عالية.. عشان كده مرضى السكر اللي بتبقى مستويات الجلوكوز مرتفعة عندهم درجة حرارتهم بتكون عالية فمابيتحملوش اللبس التقيل اللي بيدفي  

3- عملية الأيض (Metabolism)

دي عملية بتحصل في كل خلية بالجسم وهي اللي بتحول السعرات الحرارية لطاقة.. ومعدل الأيض الأساسي بيبقى كمية الطاقة اللي جسمك محتاجها عشان يحافظ على توازنه سواء في التنفس أو ضخ الدم وكمان من أهمها درجة الحرارة.. والمعدل ده بيتأثر من شخص للتاني حسب شوية عوامل منها العمر والجنس ونسبة العضلات للدهون والهرمونات

4- الأنسجة الدهنية البنية 

دي نوع من دهون الجسم اللي بتنظم درجة الحرارة الجسم وقت البرد.. وتلاقيها اشتغلت على طول قبل ما جسمك يبدأ يترعش.. ونسبتها طبعًا بتختلف من شخص للتاني وده اللي بيخلي حد مش عايز يلبس تقيل في الشتا لو نسبة الدهون دي عنده عالية

وفي الآخر عارفين إن لبس الشتا بيخليك شبه الدب القطبي بس برضه الدفا عفا عشان تبعد عن دور البرد اللي بيلف على الكل