إيه هو هربس الفم وإزاي تحمي ابنك منه؟
في فصل الشتاء لما بيجيلك دور برد ساعات بتطلعلك كده قرحة في بوقك بتزعجك وتوجعك.. ولو مابتهتمش بيها فانت محتاج تكمل الموضوع ده لأن ده فيروس مهم تعرف عنه وهو هربس الفم أو Cold sores!
إيه هو الهربس الفموي (cold sores)؟
- عدوى فيروسية نتيجة فيروس الهربس البسيط (HSV-1).. بتظهر على شكل تجمعات لبثور صغيرة مليانة بالسوائل حول الشفاه.. ونادرًا لما بتصيب الأنف أو الخدين.. بيفضل في الجسم مدى الحياة وبينشط على فترات.. وساعات بيتسمى قروح الزكام أو الحمى
- الهربس الفموي مُعدي وبينتقل من خلال التلامس المباشر مع القروح أو استخدام الأدوات الشخصية للمصاب زي الأقلام أو المعالق
قرحة الزكام دي بتمر بـ 3 مراحل:
1- الوخز والحكة: بتحس بالتنميل أو الحرقان حول الشفاه لمدة يومين قبل ظهور القروح
2- البثور: بتظهر مجموعة بثور صغيرة مملوءة بالسوايل حوالين خط الشفتين أو داخل الفم
3- التقشر: بتتجمع البثور وتنفجر فبتتحول لقروح سطحية وتتقشر في الآخر
الأعراض بتختلف شدتها حسب لو دي الإصابة الأولى بيه ولا كان فيه إصابات قبل كده:
- الإصابة الأولى: الأعراض بتظهر بعد حوالي 20 يوم من التعرض للفيروس.. والقروح بتاخد من أسبوعين لـ 3 أسابيع عشان تخف.. وبتبقى حاسس بحمى.. صداع.. آلام العضلات والحلق واللثة
- الإصابات المتكررة: القروح بتيجي في نفس المكان بس شدتها بتبقى أقل من المرة الأولى
- الأطفال: بتجيلهم العدوى من سن 1-5 سنين وبتنتقل من خلال لمس القروح أو وضع صوابعه في فمه.. وبتتشخص غلط على إنها “قرح قلاعية”.. ضروري مراقبة علامات الجفاف عند الأطفال لو قل شربه للسوائل
- السبب الرئيسي هو فيروس الهربس البسيط سواء النوع الأول (HSV1 ) أو التاني (HSV-2)
- نزلات البرد.. الإكزيما.. إصابات منطقة الفم.. الإيدز.. لمس بثور زكام ممتلئة بالسائل المُعدي.. التغيرات الهرمونية زي الحمل والدورة الشهرية
- فيروس الهربس الفموي بيستقر في الخلايا العصبية مدى الحياة وبينشط بشكل متكرر وبيسبب قروح في نفس المكان
- عوامل تحفيزه هي التوتر والضغط النفسي.. الحمى.. تغيرات مناعية
وفي الآخر ضروري تحافظ على اهتمامك بنفسك ونظافتك الشخصية وتتجنب تلمس أي سلالم أو أماكن مش نضيفة وتغسل إيدك على طول!
