إزاي ممكن نولد كهرباء من الفضاء وهل حد قدر ينجح في ده؟
وسط كل التلوث اللي بيحاوطنا.. بتحاول الدول إنها تلاقي مصادر طاقة تانية ماتزودش تلوث.. والفترة الأخيرة ظهرت دراسة من وكالة ناسا بتقول إن لو حطينا ألواح شمسية في الفضاء ده ممكن يقلل من حاجة أوروبا من الطاقة المتجددة الأرضية بنسبة 80% بحلول 2050.. وبالطريقة دي هنقدر نستمد طاقة متجددة اسمها “الطاقة الشمسية الفضائية” .. طب إيه هي وفوايدها إيه؟ ده اللي هنقولك عليه!
فكرة الطاقة الشمسية الفضائية هي إن يتحط مجموعة أقمار صناعية كبيرة وفيها ألواح شمسية ثابتة على ارتفاع حوالي 36 ألف كيلومتر فوق سطح الأرض.. ساعتها أشعة الشمس هتنزل على الأقمار على مدار الساعة.. والتدفق الكبير للطاقة الشمسية دي هيتحول لموجات ميكروية (ودي نوع من الموجات الكهرومغناطيسية زي موجات الميكروويف).. وبعدها هتتبث الموجات دي لمحطات الاستقبال الأرضية
الطاقة الشمسية بتتجمع من خلال شبكة وزنها خفيف من هوائيات متثبتة على أعمدة.. والأرض تحتها عادي ممكن يتزرع فيها محاصيل أو يتركب فيها ألواح شمسية أرضية والهوائيات بقى تحول طاقة الميكروويف لكهرباء
طب بدأوا يفكروا فيها إمتى؟ ومين جربها؟
أمريكا: الفكرة نفسها اقترحها عالم أمريكي اسمه “بيتر جلاسر” سنة 1968.. وبدأت مجموعة دول تحاول بث طاقة شمسية فضائية.
الصين: بدأت تبني محطة شمسية عرضها كيلومتر سنة 2019 وحطوها في مدار جغرافي ثابت يعني مش هيتغير مكانها أبدًا.. وده هيضمن التغطية الشمسية من غير أي انقطاع.. وسنة 2025 أعلنوا عن مشروع يولد الطاقة الشمسية الفضائية مبنية على ارتفاع 36 ألف كيلومتر فوق سطح الأرض عشان ينتجوا 100 مليار كيلو واط/ساعة من الكهرباء سنويًا
اليابان: أطلقت سنة 2025 مشروع اسمه “OHISAMA” اللي معناه “السيد الشمس” وده من تقديرهم للشمس.. وهدف المشروع نقل الطاقة الشمسية لاسلكيًا من الفضاء للأرض وده من خلال لوح شمسي بيولد كهرباء وبيخزنها في بطاريات داخلية قبل ما ينقلها للأرض من خلال موجات الميكروويف لمحطة استقبال مخصصة.. وكانوا بدأوا شغل على المشروع ده سنة 2023
1- بتقلل الاعتماد على الوقود الحفري زي النفط والفحم اللي بيزود من تلوث البيئة وبيسبب الاحتباس الحراري
2- محطات الطاقة الشمسية في الفضاء هتوصل الكهرباء لأي مكان خاصة في المناطق اللي مابيوصلهاش كهرباء ومليانة حروب
3- المحطات في الفضاء مش هتتأثر بالغيوم وتقلبات الجو اللي بتحجب الشمس وبالتالي فهي هتفضل شغالة طول اليوم في المنطقة اللي الشمس طالعة فيها
4- ألواح الطاقة الشمسية الموجودة في الأرض بتاخد 1% من الطاقشة الشمسية عكس نفس الألواح الموجودة في الفضاء
ورغم مميزات الطاقة الشمسية الفضائية فهي مكلفة وانبعاثات صواريخها بتضر البيئة وتلوثها.. بس هي فكرة مبهرة كانت في خيالنا بس مكناش فاكرينها هتحصل في الحقيقة.
قولنا انت بقى إيه الفكرة الخيالية اللي في دماغك ونفسك تتحقق زي كده؟
