راح فين الجيل الذهبي للمصارعة؟

سنين طويلة كان جمهور المصارعة الحرة في مصر والعالم العربي مستني كل أسبوع عروض WWE عشان يشوف نجومه المفضلين على الحلبة. الجيل اللي ظهر في أواخر التسعينات وبداية الألفينات كان جيل استثنائي بكل معنى الكلمة.. جيل جمع بين الكاريزما والقوة والشخصيات اللي فضلت عالقة في ذاكرة الجمهور لحد النهارده.

أسماء زي جون سينا وباتيستا وترابيل إتش وغيرهم.. كانوا نجوم الصف الأول في عالم المصارعة.. ووجودهم كان سبب رئيسي في الشعبية الضخمة اللي حققتها اللعبة حوالين العالم.

لكن مع مرور الوقت النجوم دي كبرت.. بعضهم قرر يعتزل.. والبعض التاني دخل مجالات مختلفة زي السينما أو الإدارة داخل الشركة. ومع ظهور جيل جديد من المصارعين بقى السؤال اللي بييجي في دماغ جماهير كتير.. نجوم الجيل الذهبي راحوا فين وبيعملوا إيه دلوقتي؟

جون سينا.. من بطل لنجم هوليوود

يعتبر جون سينا واحد من أهم المصارعين في تاريخ WWE.. سينا ظهر لأول مرة في الشركة سنة 2002 وبسرعة بقى النجم الأول فيها.. شخصيته المميزة وشعاره الشهير You Can’t See Me خلّوه واحد من أكثر النجوم شعبية بين الجماهير.

وخلال مسيرته حقق بطولات عالمية كتير وشارك في مباريات تاريخية في عروض ضخمة زي WrestleMania.. وقدم منافسات قوية مع نجوم كبار زي راندي أورتن وتربل إتش.

لكن مع الوقت بدأ سينا يقلل ظهوره في المصارعة بسبب دخوله عالم التمثيل.. وشارك في عدد كبير من الأفلام والمسلسلات وبقى واحد من المصارعين القلائل اللي قدروا ينجحوا في هوليوود.

في الفترة الأخيرة أعلن سينا إنه هيعتزل المصارعة نهائيًا بعد جولة وداع أخيرة.. قرار صعب على الجمهور لكن بالنسبة له الوقت جه عشان يسيب الفرصة للجيل الجديد.

دلوقتي سينا مركز على التمثيل وكمان العمل الخيري.. خصوصًا مع مؤسسة Make-A-Wish Foundation اللي يعتبر من أكثر المشاهير تحقيقًا لأمنيات الأطفال فيها.

أندرتيكر .. أسطورة اختفت

اسم الأندرتيكر يعتبر واحد من أعظم الأسماء في تاريخ المصارعة الحرة.. الشخصية الغامضة اللي قدمها على مدار أكتر من 30 سنة خلّت منه أسطورة حقيقية في عالم المصارعة.

الأندرتيكر كان صاحب واحدة من أشهر السلاسل في تاريخ الرياضة.. سلسلة الانتصارات في عرض راسلمينيا اللي استمرت سنين طويلة وخلّت اسمه مرتبط بالحدث ده بشكل تاريخي.. لكن في سنة 2020 أعلن الأندرتيكر اعتزاله رسميًا بعد مسيرة طويلة جدًا.. السبب كان تقدمه في العمر وكمان الإصابات اللي عانى منها في آخر سنواته.

بعد الاعتزال بقى بيظهر أحيانًا في برامج تحليلية أو فعاليات خاصة بالمصارعة.. وكمان بيشارك في بودكاست بيتكلم فيه عن كواليس اللعبة والجيل القديم. ورغم اعتزاله.. اسمه لسه واحد من أكبر رموز المصارعة في التاريخ.

أورتن.. الأفعى 

راندي أورتن يعتبر من آخر نجوم الجيل الذهبي اللي لسه موجودين على الحلبة لحد دلوقتي.. وأورتن بدأ مسيرته في WWE في بداية الألفينات وحقق إنجاز تاريخي لما بقى أصغر بطل عالم في تاريخ الشركة وقتها.. شخصيته المعروفة باسم The Viper أو الأفعى خلّت منه واحد من أخطر المصارعين في الحلبة.

وخلال مسيرته قدم مباريات تاريخية.. خصوصًا منافسته الشهيرة مع جون سينا اللي تعتبر واحدة من أشهر المنافسات في تاريخ المصارعة.

لكن في السنوات الأخيرة تعرض أورتن لإصابة قوية في الظهر أثرت على مشاركاته لفترة طويلة.. ورغم كده لسه بيظهر في بعض العروض الكبيرة والجمهور بيعتبره آخر ممثل حقيقي للجيل القديم.

باتيستا.. ممثل هوليوود

واحد من أشهر نجوم الجيل ده كمان هو باتيستا.. المصارع اللي كان معروف بقوته البدنية وأسلوبه العنيف على الحلبة.

باتيستا حقق بطولات عالمية كتير في WWE وكان من أكثر النجوم شعبية في فترة معينة.. لكن بعد ما قرر يسيب المصارعة اتجه لعالم السينما.. والمفاجأة إن تجربته في التمثيل نجحت جدًا.. وشارك في أفلام عالمية ضخمة أشهرها سلسلة Guardians of the Galaxy.

ودلوقتي باتيستا يعتبر واحد من أشهر المصارعين اللي قدروا ينجحوا في هوليوود ويبنوا لنفسهم مسيرة جديدة بعيد عن الحلبة.

تربل إتش.. مدير شركة

اسم تربل إتش كان واحد من أهم نجوم المصارعة في التسعينات وبداية الألفينات.. لكن بعد ما أنهى مسيرته كمصارع بدأ دور جديد داخل الشركة.

دلوقتي تربل إتش يعتبر واحد من أهم المسؤولين في إدارة WWE.. وبيشرف على تطوير العروض واكتشاف المواهب الجديدة.

كتير من المحللين شايفين إن له دور كبير في بناء الجيل الجديد من المصارعين.. وخصوصًا بعد التطوير الكبير اللي حصل في عروض الشركة في السنوات الأخيرة.

إيدج .. قصة العودة المستحيلة

قصة إيدج تعتبر من أكثر القصص المؤثرة في تاريخ المصارعة.. وإيدج كان واحد من أهم نجوم WWE.. لكنه اضطر يعتزل فجأة سنة 2011 بسبب إصابة خطيرة في الرقبة.

الجمهور كان فاكر إن مسيرته انتهت للأبد.. لكن المفاجأة حصلت سنة 2020 لما عاد للحلبة مرة تانية بعد سنوات طويلة من الاعتزال.. لكن العودة دي كانت لحظة تاريخية بكل معنى الكلمة.. لأنها أثبتت إن الإصرار ممكن يغير أي حاجة.

الجيل الجديد.. هل يقدر يعوض الأساطير؟

مع اختفاء نجوم الجيل القديم تدريجيًا بدأ يظهر جيل جديد من المصارعين يقوده نجوم زي Roman Reigns.. الشركة بتحاول تبني نجوم جدد يقدروا يشيلوا الراية ويكملوا نجاح المصارعة في السنوات الجاية.. لكن بالنسبة لجماهير كتير الجيل القديم كان له طابع مختلف.. والسبب إن المصارعين وقتها ماكانوش مجرد لاعبين.. كانوا شخصيات صنعت قصص ومباريات فضلت محفورة في ذاكرة الجمهور سنين طويلة.

جيل صنع التاريخ 

في النهاية ممكن نقول إن جيل جون سينا والأندرتيكر وراندي أورتن وباتيستا كان واحد من أعظم الأجيال في تاريخ المصارعة الحرة.. والنجوم دي ماقدمتش بس مباريات قوية.. لكنها صنعت ذكريات لجيل كامل من المشجعين.

ومهما ظهر نجوم جدد.. هيفضل الجيل ده له مكانة خاصة في قلوب الجمهور.. لأنه ببساطة كان عصر مختلف.. عصر صنع تاريخ المصارعة.