سلسلة حكايات يومية عادية حكاية 70: “الجدعنة مش رجالي بس”

أغلب الوقت معيار الجدعنة هتلاقيه بيتقاس بالرجالة.. فهتلاقينا على طول نديها واحدة “ست بـ 100 راجل” مع إن ممكن نوصف إنها ست جدعة وخلاص من غير حاجة تانية

الموضوع بدأ معايا من زمان إن العادي لما أحتاج حاجة أو هكون في موقف صعب محتاج مساعدة ودعم من حد فـ أول تفكير ليا هو إني أكلم حد من صحابي “الرجالة” عشان هم أكيد الأنسب وهيقفوا جنبي وده مش تقليلًا من أصدقائي البنات لكن هو مجرد تعود

لكن من حوالي 4 سنين كده صديقة ليا غيرت رأيي عن الموضوع ده بالصدفة لما حصل موقفين أثبتوا إن تفكيري غلط

أول واحد فيهم لما كنت مزنوق في مبلغ كبير وبدأت أشوف صحابي فـ فيه اللي كان قادر وساعدني عادي وفيه اللي قالي مش هقدر ووضحلي سبب وفيه اللي عمل من بنها ولا كأنه يعرفني.. فلما كنت بصيح مع صديقة ليا وإن يعني فيه ناس كنت فاكرها ممكن تقف جنبي ويكونوا أجدع من كده وسمعت هي للآخر بعدين قالتلي: “انت محتاج كام؟” قولتلها المبلغ وكان كبير وقتها قالتلي تمام أنا هديهولك وابقى رجعه لما تكون قادر

بس أنا مش متعود على ده ومكنتش متوقع وسكت ماقولتلهاش تمام وهاتيه وكده.. لحد ما لقيتها فعلًا بعد يومين كده جايبة الفلوس وبتقولي خد أهم وخدتهم وقولتلها أنا ممكن اتأخر إنهم يرجعوا عشان الدنيا صعبة وعليا مبلغ كبير.. وفات شهور وبعدها بسألها انتي محتاجة المبلغ؟ أنا ممكن استلفه من حد عشان ما أتقلش عليكي أكتر من كده بس هي أصرت إن عادي رجعهم في أي وقت براحتك وصبرت عليا أكتر من سنة ورجعتلها الفلوس وقتها

تاني موقف كانت فترة تقيلة وصعبة ضغط شغل مع ميكس خناقات أنا وكل الناس اللي في حياتي تقريبًا ومشاكل في البيت وحوارات.. جيت تعبت تعب شديد في اليوم ده ومش عايز أكلم حد خالص لحد ما لقيتها بعتت تسأل وعرفت إن الدنيا بايظة فبدأت تتابع معايا وتسأل وتساعد بأكل وعلاج وحاجات من غير ما أطلب منها حاجة 

من بعدها قعدت فترة بشوف الموضوع وأبص لحياتي وصحابي بشكل تاني.. واكتشفت إن عادي فعلًا الجدعنة تطلع من بنت وتكون بشكل أكبر من الراجل وطبعًا دي حاجات حسب المواقف وحسب الظروف لكنها في الآخر علمتني أنا حاجة وهي إن “الجدعنة مش رجالي بس”