طبيب مصري يقود فريق بحثي في بريطانيا لاكتشاف علاج مشاكل العظام من الصوف

حسب موقع King’s College London – KCL  فريق بحثي في بريطانيا على رأسه الطبيب المصري د. شريف الشرقاوي قدر يطور أغشية علاجية من مادة الكيراتين المستخرجة من الصوف والتجربة نجحت في مساعدة العظام إنها تبني نفسها من جديد.. وده معناه إن مادة جاية من الصوف ممكن تبقى أمل جديد لعلاج كسور وعيوب العظام في المستقبل

إيه اللي حصل بالظبط؟

الباحثين صنعوا أغشية خاصة باستخدام الكيراتين.. وهو بروتين طبيعي موجود في الصوف والشعر والضوافر وده بعد ما استخرجوه من الصوف واتعالج كيميائيًا عشان يتحول لمادة قوية وثابتة تقدر تشتغل بشكل يدعم ويساعد الجسم يبني عضم جديد عليه

 زي سقالة صغيرة الجسم يستخدمها عشان يعمّر مكان العضم التالف

ليه اختاروا الكيراتين؟

• لإن أولًا الكيراتين مادة طبيعية والجسم يقدر يتعامل معاها أحسن مايتعامل مع بعض المواد الصناعية
• ثانيًا مادة مرنة وقابلة للتطوير.. وممكن تبقى خيار طبي أساسي لو أثبتت كفاءتها في علاج العظام
• ثالثًا مستدامة ومتوفرة على عكس الكولاجين اللي كانوا دكاترة العظام بيعتمدوا عليها في العلاج طول السنين اللي فاتت

مراحل التجربة

• مرحلة المعمل.. الفريق اختبر الأغشية دي على خلايا عظام بشرية داخل المعمل والنتيجة كانت مفاجأة.. حصل نمو كويس جدََا للخلايا وفضلت حية ونشطة كمان ظهرت علامات واضحة بتدل على تكوين عضم صحي جديد وده معناه إن المادة مناسبة مبدئيًا للتعامل مع خلايا العظام

• مرحلة التجربة على حيوانات.. بعد نجاح اختبارات المعمل الباحثين زرعوا الأغشية دي في فيران عندها عيوب في عظام الجمجمة وكانت الفتحات كبيرة لدرجة إنها مش هتلتئم طبيعي لوحدها

ده كان الاختبار الفارق في التجربة لأنه بيقيس “هل المادة فعلََا تقدر تساعد الجسم يعالج مشكلة صعبة ولا قدرتها في العلاج محدودة؟”

حصل إيه بعد الزراعة؟

الباحثين راقبوا تأثير الأغشية على نمو العظام الجديدة في المناطق المصابة على مدار أسابيع والنتيجة إن رغم إن أغشية الكولاجين كونت كمية عضم أكبر بشكل عام.. إلا إن أغشية الكيراتين قدّمت نقطة قوة مختلفة ومهمة جدًا زي إن..

• العضم الجديد كان منظم أكتر
• التركيب كان أقوى وأكتر ثبات
• الألياف كانت مترتبة بشكل أفضل
• شكله قريب جدًا من العضم الطبيعي السليم

يعني الكمية أقل شوية لكن الجودة والبناء الهندسي أفضل كمان الأغشية اندمجت بسلاسة مع الأنسجة اللي حواليها وفضلت ثابتة طول فترة الالتئام

دكتور شريف الشرقاوي قال إيه؟

قال إنهم أثبتوا فعليًا نجاح التقنية داخل نموذج حيواني وده معناه إن الموضوع بقى أكبر من مجرد فكرة أولية لمادة جديدة وإن الكيراتين أثبت قدرته على دعم تجدد العظام داخل نظام بيولوجي حي وده قرّب التكنولوجيا بشكل واضح من استخدامها مع مرضى حقيقيين

مين دكتور شريف الشرقاوي؟

دكتور شريف الشرقاوي هو طبيب مصري ومحاضر أكاديمي إكلينيكي في تركيبات الأسنان التعويضية (Prosthodontics) ومشارك في البحث اللي بيفتح باب جديد لعلاج مشاكل العظام وتجديد الأنسجة

اتخرج في الأصل من جامعة الأسكندرية بدرجة بكالوريوس جراحة الأسنان مع مرتبة الشرف وبعدها كمل طريقه الأكاديمي في بريطانيا وحصل على ماجستير في علم الأحياء الفموية بامتياز من كلية بارتس ولندن للطب وطب الأسنان

بعد كده دخل مرحلة أعمق في البحث العلمي وحصل على منحة دكتوراه وزمالة مابعد الدكتوراه في الهندسة الحيوية وعلوم المواد تحت إشراف البروفيسور ألفارو ماتا في جامعة كوين ماري بلندن

وكمل مسيرته الأكاديمية هناك كمان واشتغل مدرس سريري في طب الأسنان الترميمي بجامعة كوين ماري بلندن قبل ما ينتقل لـ جامعة كينجز كوليدج لندن ويستكمل مشواره في التدريس والبحث العلمي

وصلوا لفين دلوقتي؟

التجربة لسه في مرحلة النماذج الحيوانية.. يعني لسه ماوصلتش للاستخدام البشري المباشر لكن النجاح في كائن حي يعتبر خطوة كبيرة لأنه بيدي أمل لفكرة تنفيذها كـعلاج فعلي على أرض الواقع

وخطوة اكتشاف علاج لمشاكل العظام من الصوف دي تعتبر نقلة في طب العظام ولو الأبحاث كملت بنفس النجاح ممكن نشوف في المستقبل علاج لعيوب العظام بيعتمد على مادة طبيعية بسيطة ومستدامة وتأثيرها أفضل من اللي كان موجود قبل كده والدكتور شريف الشرقاوي كان واحد من الأسماء اللي حطت بصمتها في الخطوة دي