أكاديمية الفورمولا 1.. إزاي بدأت وليه اتعملت ؟

تخيل إنك موهوبة في سباقات السيارات وعندك حلم توصل للفورمولا 1 بس الطريق قدامك أصعب بكتير من أي سائق تاني مش بسبب موهبتك بس بسبب قلة الفرص والتمويل والدعم.. من هنا جت فكرة أكاديمية الفورمولا 1 بطولة مخصصة للسائقات هدفها تفتح الطريق قدام البنات من الكارتينج لحد سباقات سيارات المقعد الواحد وتديهم فرصة حقيقية للوصول لمستويات أعلى.

إيه هي أكاديمية الفورمولا 1؟

أكاديمية الفورمولا 1 هي بطولة سباقات مخصصة للبنات بمستوى قريب من الفورمولا 4 أسستها مجموعة الفورمولا 1 وانطلق أول موسم ليها سنة 2023.. الفكرة مش مجرد تنظيم بطولة منفصلة للسائقات بس كمان إنشاء نظام واضح بيساعد المواهب الشابة تنتقل من سباقات الكارتينج إلى سيارات المقعد الواحد وبعدها تنافس في بطولات أعلى لحد ما يبقى عندها فرصة للوصول إلى الفورمولا 1.

في أكتر من سبب وراء تأسيس البطولة وأهمها قلة عدد السيدات في رياضة المحركات وصعوبة انتقال السائقات من المراحل الأولى إلى البطولات الاحترافية.. على مدار سنين كان الطريق للفورمولا 1 أصعب بالنسبة للبنات وكتير من المواهب كانت بتتوقف قبل الوصول للمستويات الأعلى بسبب نقص الفرص والدعم المالي وعدم وجود عدد سائقات في بطولات تمهيدية زي الفورمولا 2 والفورمولا 3.

التمويل كان عقبة أساسية كمان لأن دخول عالم سباقات السيارات محتاج ميزانيات كبيرة وده كان بيصعّب المهمة على السائقات الصغيرات اللي مش بيلاقوا رعاة يغطوا تكاليف مشاركتهم وفيه سبب تاني مرتبط بتوقف بطولة دبليو سيريز اللي كانت مخصصة للسائقات ونظمت 3 مواسم في 2019 و2021 و2022 قبل ما تدخل في إجراءات الإدارة القضائية وتتوقف وبالتالي ظهرت الحاجة لبطولة جديدة تقدر توفر مسار مستمر للمواهب النسائية.

مين بيدير الأكاديمية؟

في مارس 2023 اتعينت سوزي وولف مديرة عامة لأكاديمية الفورمولا 1 وهي زوجة مدير فريق مرسيدس “توتو وولف”.. وولف عندها تجربة سابقة في عالم السباقات وكانت سائقة تطوير واختبار مع فريق ويليامز وشاركت في التجارب الحرة خلال سباقات الجائزة الكبرى في 2014 و2015 وكانت آخر سائقة تشارك في حصة رسمية في أسابيع سباقات الفورمولا 1 في تلك الفترة. وبحسب الأرقام التاريخية ماشاركتش في سباقات بطولة العالم للفورمولا 1 سوى سائقتين الإيطالية ماريا تيريزا دي فيليبيس ومواطنتها ليلا لومباردي وكان آخر ظهور لسائقة في سباق رسمي منذ حوالي 50 سنة.

توتو وولف وزوجته سوزي وولف

الفلوس بتتوزع إزاي؟

الفورمولا 1 بتدعم المشروع بتمويل يبلغ 2.25 مليون يورو لكن المشاركة نفسها ليها تكلفة والسائقة مطالبة بتوفير حوالي 150 ألف يورو من الرعاية عشان تقدر تدخل البطولة ورغم إن الرقم كبير لكنه أقل بكتير من تكاليف المشاركة في مستويات أعلى من سباقات السيارات وده جزء من محاولة تخفيف العقبات المالية قدام السائقات الصغيرات.

العربيات والقواعد

واحدة من أهم مميزات البطولة إن كل السائقات بيشاركوا بنفس نوع العربية وده بيقلل الفوارق الفنية بين الفرق وبيخلي التركيز أكبر على مهارة السائقة نفسها.. العربيات بتستخدم شاسيه تاتوس تي 421 المستخدم في سباقات الفورمولا 4 وإطارات من شركة بيريلي ومحرك تيربو 4 سلندر بقوة 165 حصان من تصنيع «أوتوتكنيكا».

شروط المشاركة بتسمح للسائقات من سن 16 إلى 25 سنة بالمنافسة مع السماح لكل سائقة بالمشاركة في موسمين فقط من البطولة.

من 15 عربية إلى دعم فرق الفورمولا 1

في أول موسم سنة 2023 شارك كل فريق بثلاث عربيات بإجمالي 15 عربية على شبكة الانطلاق لكن من موسم 2024 حصل تطور مهم بعدما بدأت فرق الفورمولا 1 تدعم سائقة في الأكاديمية وتشارك عربيتها بألوان الفريق في خطوة ربطت البطولة بشكل أكبر بعالم الفورمولا 1.

كمان أول خمس سائقات في الترتيب النهائي بيحصلوا على نقاط في نظام الرخصة الفائقة التابع للاتحاد الدولي للسيارات وهي الرخصة المطلوبة للمشاركة في بطولة العالم للفورمولا 1 وموسم 2026 هو الموسم الرابع للأكاديمية وبيضم 6 جولات على 3 قارات وكلها ضمن أسابيع سباقات الجائزة الكبرى للفورمولا 1.

ومن بين 18 عربية مشاركة بتحمل 10 عربيات ألوان فرق الفورمولا 1 ومن المنتظر إن كاديلاك تدعم عربية إضافية بداية من موسم 2027وكان من المقرر إقامة جولة في جدة خلال موسم 2026 بس اتلغت.

أبرز السائقات اللي خرجت من الأكاديمية

رغم إن الأكاديمية لسه في بدايتها لكنها بدأت بالفعل تقدم أسماء انتقلت للمنافسة في بطولات أعلى.. الإسبانية “مارتا جارسيا” بطلة أول موسم في 2023 حصلت على مقعد ممول بالكامل في بطولة فورمولا ريجينال الأوروبية ودي كانت خطوة مهمة في انتقالها لمستوى أعلى.

 وفي 2024 فازت البريطانية “آببي بولينج”  باللقب وحصلت على فرصة للمشاركة مع فريق رودين موتورسبورت في بطولة جي بي 3 إلى جانب 20 يوم اختبارات ممولة.

أما الفرنسية دوريـان بان بطلة موسم 2025 مع فريق بريما واللي كانت بتمثل مرسيدس فانضمت لسائقي التطوير في الفريق الألماني.. ووقعت كمان عقد للمشاركة في بطولة لومان الأوروبية وبالنسبة لموسم 2026 تُوجت أليشا بالموفسكي باللقب بحسب المعلومات المتاحة

هل الأكاديمية خطوة للأمام ولا فصل بين الجنسين؟

رغم أهمية الفكرة فيه انتقادات بتتوجه للأكاديمية وأبرزها إن تنظيم بطولة منفصلة للسائقات ممكن يتفهم باعتباره استمرارًا للفصل بين الجنسين بدلًا من دمج البنات بشكل مباشر في بطولات الرجال.

لكن سوزي وولف بتشوف إن الأكاديمية خطوة ضرورية في المرحلة الحالية وإن الهدف مش استمرار وجود بطولة منفصلة للأبد لكن بناء قاعدة أكبر من السائقات القادرات على المنافسة في البطولات الرئيسية.

وعشان كده الأكاديمية بدأت كمان شراكة مع تشامبيونز أوف ذا فيوتشر لدعم سباقات الكارتينج لأن المشكلة مش بتبدأ عند الفورمولا 1 لكنها بتظهر من المراحل الأولى لما البنات بيحتاجوا فرص وتدريب وتمويل يساعدوهم يكملوا.

حلم سائقة في الفورمولا 1

سوزي وولف قالت إنها متفائلة بإمكانية تواجد سائقة في الفورمولا 1 في السنوات العشر الجاية وإن وصول أول واحدة ممكن يفتح الطريق لعدد أكبر بعدها.

ولحد دلوقتي الأكاديمية ماخرجتش سائقة وصلت للفورمولا 1 لكن بعض بطلاتها بدأوا بالفعل الانتقال إلى بطولات أعلى وده بيخلي نجاح المشروع مرتبط بقدرته على تحويل المواهب لسائقات قادرات على المنافسة خارج البطولة نفسها.

في النهاية أكاديمية الفورمولا 1 مش مجرد بطولة للبنات بس هي مجرد محاولة لمعالجة مشكلة قديمة في رياضة المحركات إزاي نخلي الموهبة تلاقي فرصة حقيقية من غير ما تكون التكلفة وقلة الدعم عائق قدامها قبل ما توصل حتى لخط البداية.