هي لوحة ليلة النجوم اترسمت إمتى؟ اكتشاف تاريخ جديد للوحة فان جوخ الشهيرة
الحدوتة المعروفة عن لوحة “ليلة النجوم” بتاعت الرسام الهولندي “فان جوخ” اللي أشهر من نار على علم.. هي إنها اترسمت من ورا شباك أوضة في مصحة “سان ريمي” في جنوب فرنسا.. والكلام ده في يونيو 1889.
لما “فينسنت فان جوخ” اتحجز هناك بإرادته وكان كل يوم الفجر يبص من شباك أوضته على السماء.. وطلع بلوحة السماء فيها كأنها بحر.. والنجوم بتنور كأنها حية وبتتنفس.
طب إيه اللي جد؟
بعض الباحثين من كوريا الجنوبية قالوا إن السماء اللي بتظهر في اللوحة أقرب للسماء الحقيقية اللي كانت موجودة فجر يوم 22 يوليو 1889.. يعني بعد التاريخ المتعارف عليه بحوالي شهر.
والدراسة ماجبتش الكلام ده من دماغها.. لأن الباحثين استخدموا محاكاة فلكية وبيانات تاريخية ورسائل من فان جوخ نفسه عشان يتأكدوا.
طب إزاي العلماء وصلوا للتاريخ ده؟
1. عادوا بناء شكل السماء
باستخدام برامج المحاكاة الفلكية.. قدروا يعيدوا رسم السماء فوق مدينة “سان ريمي” في فرنسا خلال شهر يونيو ويوليو في 1889.. وقارنوا الكلام ده بالشكل اللي رسمه “فان جوخ”
2. ركزوا على 3 علامات أساسية في اللوحة
الأول كان القمر.. اللي ظهر في اللوحة على هيئة هلال رفيع.. وده كان مختلف عن شكل القمر المتوقع في التاريخ المعروف للوحة
التاني كان كوكب الزهرة.. واللي حاول الباحثين يحددوا موقعه بالنسبة للقمر والنجوم وقتها
التالت والأخير كان عنقود نجوم اسمه “عنقود القلائص “.. ودي مجموعة من النجوم ليها ترتيب معين.. درسوا الترتيب بتاعها وقارنوه باللي رسمه فان جوخ
3. راجعوا حالة الطقس
حللوا سجلات الطقس التاريخية في المنطقة وقتها.. ولقوا إن الظروف الجوية كانت تسمح برؤية السماء بالشكل ده في الفترة دي
4. رسائل فان جوخ
الباحثين راجعوا رسائل “فان جوخ” لأخوه “ثيو” ولاحظوا إنه كان بيذكر في كلامه كل شوية نوع حشرات بيظهر في الحر اسمه “الزيز”.. واعتبروه مؤشر على الجو الحر وقتها.. ودي ظروف الجو اللي بتتوافق مع درجات الحرارة المسجلة في يوليو مش يونيو
طب باقي العلماء بيقولوا إيه؟
العلماء اختلفوا شوية في الموضوع ده.. وفيه اعتراضات من خبراء تاريخ الفن والفلك على تاريخ اللوحة الجديد.
بدايًة من متحف فان جوخ في أمستردام.. اللي لسه متمسك بالتاريخ التقليدي اللي هو يونيو 1889.. وده مش من فراغ لأنهم برضه بيستندوا في كلامهم لأدلة تاريخية.. زي رسالة “فان جوخ” لأخوه يوم 18 يونيو.. اللي ذكر فيها إنه بيشتغل على دراسة جديدة لسماء مليانة نجوم.. ده غير الرسم اللي بعته لأخوه يوم 2 يوليو وكان قريب جدًا من اللوحة.. وكإنه بداية رسمها أو المسودات الأولى ليها.
كمان المتحف بيقول إن “فان جوخ” ماكانش مهتم بنقل السماء بصورة مطابقة للواقع أصلًا.. وإنه كان بيستخدم خياله ورسوماته القديمة.. وبالتالي مش بالضرورة تكون مواقع النجوم اللي رسمها دليل على تاريخ الرسم نفسه.
ومن ضمن اللي اعترضوا على التاريخ الجديد كان عالم الفيزياء والفلك “دونالد أولسون”.. وقال إن مواقع كوكب الزهرة وعنقود النجوم مش متطابقة بالشكل الكافي مع حساباته.. وإن الباحثين افترضوا زاوية رؤية معينة للسماء.. في نفس الوقت اللي فيه المشهد اللي في اللوحة محتاج زاوية أوسع.
خد مني.. وراجع ورايا!
الدراسة وضحت 3 قيود أساسية:
1. إن يوم 22 يوليو هو التاريخ اللي اتطابق مع السماء أفضل من التاريخ القديم.. لكنه مش دليل قاطع إن “فان جوخ” بدأ أو أنهى اللوحة في اليوم ده
2. وارد جدًا إنه يكون شاف السماء في ليالي مختلفة.. وبعدين لما جه يرسم دمج كل ده في لوحة واحدة
3. الدراسة ماقدرتش تحدد إذا كان بدأ رسم اللوحة في يونيو وكملها بعدين.. ولا خلصها وعدلها بعد كده
ففي الآخر سواء رسمها في يونيو ولا في يوليو.. المهم إننا نلحق نجيب الهودي اللي مرسوم عليه اللوحة في عز البلاك فراي داي كده ونلحق الخصم ونوفر فلوسنا!
