“جينياك” من عادي في أوروبا.. إلى أسطورة في المكسيك

بعد أكثر من 10 سنين مع نادي تيجريس الميكسيكي.. المهاجم جينياك أعلن إنه هيعتزل بنهاية الموسم وعمل مسيرة كويسة جدًا مع ناديه عشان يقرروا يعملوا له تيفو تاريخي وهينهي مسيرته كأسطورة للنادي بس خلينا نرجع خطوات لورا نعرف قصة المهاجم ده ومسيرته من البداية.

بدايات المهاجم

أندريه بيير جينياك مهاجم كان متوسط في فرنسا مع أندية زي لوريان.. تولوز وأخيرًا مارسيليا.. وقدر يسجل في فرنسا أكتر من 100 هدف في 389 ماتش وحتى مع المنتخب الفرنسي سجل 7 أهداف في 36 ماتش.. ودي أرقام أقل من العادية فكان الحل الخروج من الـ”Comfort Zone” أو المنطقة اللي أنت مرتاح فيها.

مغامرة في المكسيك

جينياك بيقرر ياخد الخطوة دي بالانتقال إلى مكان بعيد عن بيتك وفي قارة بعيدة وعادات وتقاليد وثقافة مختلفة.. وكمان رايح في سن الـPeak بتاعك كمهاجم.. وكنت ممكن تنتقل لنادي أعلى في أوروبا وتاخد سنوات العز زي ما بيقولوا بس المتشابهه شوية بين المكسيك وجينياك.. هو الشغف للكورة.

يبدأ جينياك مع النادي في 2015 وقدر في الموسم الأول يكسب الدوري وفي الفرديات قدر يكسب جائزة أفضل لاعب في الدوري المكسيكي وهداف الدوري بـ13 هدف.

الوصول لـ إنجازات تاريخية

ويعيش بعدها جينياك مع الفريق ويقدر يكسب بطولة دوري أبطال الكونكاكاف أعلى بطولة في القارة موسم 19\20 للمرة الأولى في تاريخهم والوحيدة حتى الآن.. وبعدها قدر يوصل بالفريق لنهائي كأس العالم للأندية في فبراير 2021 ولكن خسره قدام بايرن ميونيخ بنتيجة 1-0.. بس قدر يكسب جائزة “هداف البطولة”.

بطولاته وإنجازاته في المكسيك

كسب 5 دوري مكسيكي

بطل أبطال الدوري 3 مرات

(البطولة دي بتتلعب بين بطل الدور الأول

وبطل الدور الثاني في الدوري المكسيكي)

بطل أمريكا والمكسيك مرتين

(بطولة بين بطل الدوري الأمريكي والمكسيكي)

وفرديًا كسب هداف الدوري المكسيكي 3 مرات

وهداف دوري أبطال الكونكاكاف مرة

وهداف كأس العالم للأندية مرة

هل أنت في المكان المناسب؟

الكورة دايمًا بتعكسلنا الواقع بس بشكل مختلف شوية.. ممكن تحس أنك مالكش لازمة في شغلك أو أي مكان تاني.. يمكن أنت في المكان الغلط حتى لو وسط أهلك وناسك.. بس الأكيد أنك بمجرد ما تلاقي المكان المناسب “حتى لو في المكسيك”.. هتبقى أسطورة وهتتودع بالدموع أنك مشيت حتى لو مكانش المتوقع أنك تكون هنا من الأساس.