إزاي فريق ثون قدر يكون بطل سويسرا بعد 128 سنة؟

في واحدة من أجمد قصص الكورة في أوروبا نادي ثون السويسري عمل حاجة شبه المستحيل وتوّج ببطولة الدوري لأول مرة في تاريخه بعد 128 سنة! والأغرب من كده؟ إن الفريق كان بيلعب في الدرجة التانية الموسم اللي فات ورجع في سنة واحدة بس بقى بطل.

ثون حسم وتوج الدوري قبل النهاية بـ3 جولات رغم إنه خسر من بازل 3-1 لكن في نفس الوقت منافسه سانت جالن خسر هو كمان فالفارق بقى 11 نقطة واتحسم الموضوع رسمي.. الفريق كسب 24 ماتش من أصل 35 وخسر 9 بس.. وعمل أفضل فارق أهداف في الدوري.

 ثون استغل الفرصة

اللي حصل الموسم ده غريب جدًا لأن الدوري السويسري كان دايمًا بين بازل ويونج بويز وزيوريخ لكن كلهم وقعوا بشكل واضح.. بازل ويونج بويز أنهوا الموسم بعيد عن المنافسة وزيوريخ كمان كان موسمه كارثي.

ثون بقى استغل كل ده.. وبدأ الموسم بدون أي ضغوط لأن محدش كان متوقع منه حاجة أصلاً.. لكن الفريق قلب الدنيا وتصدر من نص الموسم، وعمل سلسلة انتصارات قوية جدًا بين ديسمبر ومارس “كسب 12 ماتش وتعادل مرة واحدة بس”.

وأهم لحظة في الموسم كانت ماتش زيوريخ.. ولما كان خسران 2-0 ورجع كسب 4-2 في الآخر ودي كانت نقطة التحول اللي خلت الفريق يصدق إنه ممكن ياخد الدوري.

سر النجاح الحقيقي 

اللي بيميز ثون مش بس النتائج لكن الاستقرار الرهيب جوه النادي.. والمدرب ماورو لوسترينيللي أصلاً كان لاعب في الفريق وهداف تاريخي ليه ورجع يمسكه بعد ما اشتغل في كل المناصب تقريبًا.

رئيس النادي كمان لاعب قديم ومدير تطوير اللاعبين أسطورة في تاريخ النادي وكلهم كانوا مع بعض من أيام ما الفريق لعب في دوري أبطال أوروبا 2005!.. الفكرة ببساطة إن النادي شغال بعقلية “العيلة” ناس بقالها سنين مع بعض مش بيجروا ورا الفلوس لكن بيبنوا فريق عنده انتماء.

رغم إن قيمة الفريق السوقية حوالي 22 مليون يورو بس “أقل بكتير من الكبار” لكنه قدر يتفوق عليهم كلهم.. في الآخر قصة ثون بتقول حاجة واحدة.. مش لازم تكون أغنى نادي عشان تكسب.. بس لازم يكون عندك مشروع وصبر وناس مؤمنة ببعض.