تفاصيل رفع منظمة الصحة العالمية حالة الطوارئ الدولية بسبب فيروس “إيبولا”
منظمة الصحة العالمية أعلنت يوم الأحد إمبارح 17 مايو 2026 حالة طوارئ صحية عامة دولية.. وده بسبب تفشي سلالة “بونديبوغيو” من فيروس إيبولا في جمهورية الكونغو الديمقراطية وأوغندا.. فهو إيه اللي بيحصل بالظبط؟
- حسب منظمة الصحة العالمية.. تم الإبلاغ عن 8 حالات مؤكدة مخبريًا.. و246 حالة مشتبه فيها.. و80 حالة وفاة مشتبه فيها (بينها 4 وفيات مؤكدين).. ده غير 65 مخالط منهم 15 شخص مصنفين ضمن الفئة عالية الخطورة.. ودول في محافظة إيتوري في شرق الكونغو اللي بتقع على الحدود مع أوغندا وجنوب السودان
- أما بالنسبة لأوغندا فهي سجلت حالتين مؤكدتين وحالة منها توفت.. ولحد دلوقتي صلة الحالتين مش واضحة بس كانوا مسافرين جايين من الكونغو
- معظم الحالات المشتبه في إصابتهم بفيروس إيبولا أعمارهم بين 20 و39 سنة.. ونسبة الإناث المصابين 60% منهم.. وده معناه إن فيه مخاطر كبيرة لانتقال العدوى جوه البيوت ومقدمين الرعاية
- وزير الصحة في جمهورية الكونغو الديمقراطية “صامويل روجر كامبا” قال إن سلالة “بونديبوغيو” مالهاش لقاح ولا علاج محدد.. ونسبة الوفيات بسبب السلالة دي عالية جدًا بتوصل لـ 50%
- معهد “روبرت كوخ الألماني” بيقول إن معدل الوفيات ممكن يوصل لـ 90% لو الرعاية الفورية ماوصلتش للمصابين
- المدير العام للمنظمة “تيدروس أدهانوم غيبريسوس” قال على منصة “إكس_ تويتر سابقًا” إن الفيروس بيشكل حالة طوارئ صحية عامة تقلق الدول.. وده تاني أعلى مستوى إنذار حسب اللوائح الصحية.. لكنه مايستوفاش لحد دلوقتي معايير الجائحة
- قالت المنظمة إن العدد الفعلي للحالات ونطاق انتشار الفيروس لسه مش واضح.. وممكن يبقى أوسع بكتير عن اللي متبلغين بيه.. ففيه خطر كبير إنه ينتشر محليًا أو إقليميًا
- دي طريقة بتستخدمها منظمة الصحة العالمية.. لما بيحصل حدث صحي بينتقل خارج حدود دولة واحدة عشان تمنع تهديد انتقاله لدول تانية وماتهددش صحة العالم
- بيحصل بالتنسيق بين المنظمة والدول.. وبيكون ليها صلاحية إنها تصدر توصيات معينة مؤقتة على السفر والتجارة.. وبتطلب من الدول إنها تنقل المعلومات الصحية لبعض بشكل سريع.. وكمان تعزز أي إجراءات فحص وعزل ومراقبة صحية.. وده عشان تخلي الحكومات تجهز موارد طبية ومالية بشكل عاجل
- ولجنة الطوارئ التابعة للمنظمة بتراجع الوضع الصحي كل 3 شهور تقريبًا.. عشان تقيم لو الأزمة الصحية تستدعي إنهاء ولا استكمال حالة الطوارئ دي
فيروس إيبولا ظهر لأول مرة سنة 1976.. وهو بينتقل من خلال الاتصال المباشر بسوائل الجسم زي اللعاب والبول والدم والعرق.. وأعراضه بتبقى آلام في العضلات والمفاصل.. صداع شديد وارتفاع مفاجئ في درجة حرارة الجسم.. فقدان شهية وألم في الحلق.. وتعب وإرهاق شديد
