اكتشــاف أثري في جبـل الطير بالمنيــا بيوضــح تطـور العمارة الجنائزية في مصر القديمة خلال عصور مختلفة

البعثة الأثرية التابعة للمجلس الأعلى للآثار أعلنت إمبارح السبت 20 يونيو عن اكتشاف مقبرتين في جبل الطير بالمنيا بترجع للعصر العتيق ودفنات بترجع لعصور ما قبل الأسرات والعصر المتأخر.. والكشف ده بيوضح تطور العمارة الجنائزية في مصر القديمة خلال عصور مختلفة.. فهنقولك التفاصيل!

تفاصيل الكشف

• المقبرة الأولى تعتبر من الاكتشافات المعمارية النادرة وبتتميز بتصميم هندسي فريد.. أما المقبرة التانية هي عبارة عن نموذج مطابق ليها بشكل كبير وبتتميز بحالة حفظ كويسة جدًا

• رئيس قطاع الآثار المصرية الأستاذ محمد عبد البديع قال إن تصميم المقبرة الأولى بيعتمد على التدرج في سماكة الجدران من أسفل إلى أعلى.. والسماكة بتزداد عند القاعدة وبتقل تدريجيًا للقمة

• النمط المعماري لتصميم المقبرة بيمثل مرحلة مبكرة من تطور النمط الهندسي اللي وصلنا بعدين لظهور الهرم المدرج وبعدين الهرم الكامل

• الأستاذ “عبد البديع” قال برضه إن احتمال تكون المقبرة اتعرضت في عصور لاحقة لأعمال تحجير عشان تُستخرج كتلها الحجرية إلا إن الأجزاء المتبقية كشفت تفاصيل مهمة عن هندسة البناء في الفترة دي.. منها آثار خطوط أكسيدية بتوضح أساليب تقطيع الأحجار بدقة..  ودعامات خشبية ضخمة استُخدمت لتدعيم الجدران.. امتد شوية منها بطول الجدار بالكامل.. وشوية تانيين جُم على شكل قطع مستقيمة منفصلة

• المقبرة التانية بتقع في الجنوب من المقبرة الأولى ومتطابقة معاها إلى حد كبير في التصميم المعماري لكنها ماتعرضتش لأعمال تحجير.. وده ساهم في الحفاظ على عناصرها بشكل أفضل

• رئيس البعثة ورئيس الإدارة المركزية لآثار مصر الوسطى الدكتور سامي درديري قال إن البعثة لقت كمان جزء من جبانة بترجع لعصور ما قبل الأسرات فيها دفنات في وضع القرفصاء ملفوفة ببقايا حصير نباتي متحلل.. وفي جوار بعضها أواني فخارية ليها حواف سوداء قدروا أرخوها لفترة نقادة التانية والتالتة 

• كشفت البعثة عن عدد من الدفنات الآدمية الفردية والجماعية.. عُثر على بعضها جوه بقايا توابيت خشبية متحللة.. وبيرجحوا تأريخها للعصر المتأخر.. وده بيأكد استمرارية استخدام المنطقة كجبانة خلال عصور تاريخية ورا بعض

طب إيه أهميته؟

الدراسات الأولية لقت تشابه ملحوظ بين تصميم المقبرتين وتصميم مقبرة الملك دن المشهورة في أبيدوس.. وده بيدي أهمية أثرية لمنطقة جبل الطير وإنها أهم الجبانات اللي تم استخدامها خلال فترات زمنية ممتدة من عصور ما قبل الأسرات لحد العصر المتأخر