مواجهات ثأرية في دور الـ 32 بكأس العالم

دور المجموعات خلص وبدأت المرحلة اللي مفيهاش فرصة للتعويض.. من هنا أي غلطة معناها باي باي يا بطولة وعشان كده دور الـ32 في كأس العالم 2026 مش مجرد مباريات خروج مغلوب لكنه كمان مليان مواجهات ليها تاريخ وذكريات قديمة.. فيه منتخبات داخلة تدور على رد اعتبار بعد سنين ومنتخبات تانية عايزة تثبت إن عقدة الماضي لسه مستمرة وفيه صدامات هتتجدد لأول مرة من سنين طويلة وده هيخلي كل مباراة ليها قصة مختلفة 

1- “ألمانيا × باراجواي” إعادة ذكريات 2002

ألمانيا وباراجواي هيتقابلوا تاني في كأس العالم لأول مرة من نسخة 2002 والذكريات أكيد لسه موجودة عند المنتخبين.. وقتها الاتنين لعبوا في دور الـ16 والمباراة كانت مقفولة جدًا وفضل التعادل السلبي مسيطر لحد الدقيقة 88 قبل ما “أوليفر نوفيل” يخطف هدف قاتل ويأهل ألمانيا لربع النهائي في طريقها للوصول للمباراة النهائية

آخر مواجهة بين المنتخبين كانت ودية سنة 2013 وشهدت إثارة كبيرة وانتهت بالتعادل 3-3 وده معناه إن باراجواي عارفة كويس إنها تقدر تسبب مشاكل للألمان حتى لو التاريخ بيدي الأفضلية للماكينات

2- “فرنسا × السويد” منافسة أوروبية متجددة

فرنسا داخلة المواجهة وهي متفوقة تاريخيًا لكن السويد دايمًا كانت منافس صعب عليها.. آخر بطولة كبيرة جمعت المنتخبين كانت يورو 2012 وقتها السويد كسبت 2-0 وقدمت واحدة من أفضل مبارياتها رغم خروجها من البطولة

بعدها فرنسا ردت بقوة فكسبت السويد في مباراة ودية سنة 2014 وبعدها كل منتخب كسب مباراة في تصفيات كأس العالم قبل ما الديوك يحققوا الفوز في المباراتين اللي جمعتهم بدوري الأمم الأوروبية سنة 2020.. الأولى 1-0 والثانية 4-2 يعني المواجهة دي عمرها ما كانت سهلة لأي طرف

3- “المغرب × هولندا” فرصة لكسر العقدة

المغرب قدامها فرصة تكتب صفحة جديدة في تاريخها قدام هولندا.. آخر مواجهة بين المنتخبين في كأس العالم كانت سنة 1994 وانتهت بفوز هولندا 2-1 بعد مباراة قوية

وبعد أكتر من عشرين سنة اتقابلوا تاني في مباراة ودية سنة 2017 وبرضه الطواحين خرجوا فايزين بنفس النتيجة 2-1 لكن المغرب دلوقتي مختلف تمامًا بجيل وصل قبل كده لنصف نهائي كأس العالم وعنده طموح يكسر العقدة ويحقق أول فوز في تاريخه على المنتخب الهولندي

4- “البرتغال × كرواتيا” ثأر من ليلة كواريزما

يمكن دي أكتر مواجهة فيها حسابات قديمة لأن الكروات مستحيل ينسوا اللي حصل في يورو 2016 لما كانوا قريبين جدًا من التأهل لكن ريكاردو كواريزما خطف هدف في الدقيقة 117 ومنح البرتغال بطاقة العبور.. بعدها المواجهات استمرت بين المنتخبين.. البرتغال كسبت كرواتيا وديًا سنة 2013 وبعدها تعادلوا في 2018 ثم البرتغال فازت بالمباراتين في دوري الأمم سنة 2020 بنتيجة 4-1 & 3-2

في 2024 كرواتيا أخيرًا قدرت تكسب البرتغال 2-1 وديًا لكن البرتغال ردت بعدها بفوز 2-1 في دوري الأمم قبل ما آخر لقاء بينهم ينتهي بالتعادل 1-1 كل ده يخلي المواجهة مفتوحة على كل الاحتمالات

5- “إسبانيا × النمسا” حساب مفتوح من 1978

رغم إن المواجهات بين المنتخبين قليلة جدًا لكن المباراة دي ليها قيمة تاريخية كبيرة لأن المرة الوحيدة اللي اتقابلوا فيها في كأس العالم كانت سنة 1978.. وقتها النمسا حققت مفاجأة وكسبت إسبانيا 2-1

ومن ساعتها الإسبان مستنين فرصة يردوا الهزيمة دي وبعد مرور 48 سنة الفرصة جات أخيرًا في دور الـ32 خصوصًا إن إسبانيا داخلة البطولة وهي واحدة من أقوى المنتخبات دفاعيًا وهجوميًا

6- “البرازيل × اليابان” الساموراي عايز يثبت إن الفوز الأخير مش صدفة

على مدار التاريخ البرازيل كانت دايمًا متفوقة على اليابان.. أشهر مواجهة كانت في كأس العالم 2006 لما السيلساو قلب تأخره لفوز كبير 4-1 بفضل ثنائية رونالدو ومعاها أهداف جونينيو وجيلبرتو.

بعدها البرازيل فضلت تفرض سيطرتها فكسبت اليابان في كأس القارات 2013 وبعدها في وديات 2014 و2017 و2022

لكن في 2025 حصلت المفاجأة واليابان حققت أول انتصار ليها على البرازيل بنتيجة 3-2 وده خلى المواجهة الحالية مختلفة تمامًا لأن الساموراي داخل بثقة كبيرة بينما البرازيل عايزة تثبت إن الهزيمة دي كانت مجرد كبوة

7- “المكسيك × الإكوادور” صراع مفيهوش كبير

يمكن دي أكتر مواجهة متوازنة في دور الـ32.. المنتخبين لعبوا مباريات كتير على مدار السنين والمكسيك ليها أفضلية بسيطة لكن النتائج الأخيرة بتقول إن مفيش فريق يقدر يضمن الفوز

أول مواجهة في كأس العالم كانت سنة 2002 وكسبتها المكسيك 2-1 بعد كده الإكوادور قدرت تحقق أكتر من انتصار في المباريات الودية بينما المكسيك ردت بفوزين مهمين وشهدت آخر 3 مواجهات بينهم تعادلين بدون أهداف في 2022 وكوبا أمريكا 2024 قبل ما يتعادلا 1-1 في ودية 2025.

وده معناه إن المواجهة الجاية هتكون واحدة من أكتر مباريات دور الـ32 تكافؤًا لأن الفوارق بين المنتخبين بقت بسيطة جدًا

في النهاية الأدوار الإقصائية محتاجة إنك تدخلها بشغف الفوز مهما كان المنافس بتاعك لأن في الأول وفي الآخر هي مجرد 90 أو 120 دقيقة وبيكون فيها 11 لاعب ضد 11 لاعب ف انت كمنتخب مش هتقول مين المنافس.. المفروض تقول إزاي أكسبه؟