مين بيصرف فلوس أكتر العازب ولا المتجوز؟

عمرك فكرت إن كلمة “أنا عايش لوحدي” ممكن يكون وراها فاتورة مخفية؟

مش مجرد فاتورة كهربا ولا إنترنت.. لا فاتورة اسمها “Singles Tax” أو “ضريبة العُزّاب”

بس قبل ماتحسبن لأ دي مش ضريبة رسمية ولا فلوس بتدفعها للدولة.. ده مجرد تعبير اقتصادي بيشرح فكرة إن الشخص اللي عايش لوحده غالبًا بيدفع تكلفة أعلى لأنه مفيش حد يشاركه المصاريف

يعني مثلًا لو واحد عايش لوحده فالإيجار كله عليه.. فاتورة الإنترنت.. الأكل والمشتريات كلها عليه.. حتى لو اشترى شماعات  جديدة مفيش حد يقول “ندفع النص بالنص” 

لكن شخصين عايشين مع بعض ممكن يتفقوا يقسموا نفس الحاجات

وده بالظبط اللي بتشرحه تحليلات زي تحليل “Zillow“.. اللي استخدمت مصطلح الـ “Singles Tax” لوصف الفرق بين تكلفة السكن لوحدك وتكلفة مشاركة السكن مع شخص  تاني

طب الموضوع فارق قد إيه؟

حسب تحليل Zillow في الولايات المتحدة مثلًا الشخص اللي بيأجر ويعيش لوحده ممكن يدفع حوالي 10,470 دولار زيادة سنويًا مقارنة باللي بيشارك السكن مع شخص تاني يعني تقريبًا فلوس عربية صغيرة كده رايحة في “فاتورة الاستقلالية” 

والفكرة مش إن العزوبية وحشة أو الجواز أوفر دايمًا.. الفكرة إن الاقتصاد بيحب المشاركة

يعني الحب مش بس ورد وشوكولاتة.. أحيانًا كمان بيطلع له تأثير في الإيجار 

لأن شخصين في بيت واحد ممكن يوفروا فلوس كتير من غير ما يضاعفوا المصاريف

بس لحظة.. هل السنجل خسران دايمًا؟

لا طبعًا

العيش لوحدك له مكاسب تانية زي الحرية الكاملة.. الخصوصية وقراراتك انت.. لا حد يغير درجة التكييف ولا ياكل آخر حتة البيتزا بتاعتك 

حتى “Zillow” نفسها أشارت إن العيش منفردًا له مميزات زي الاستقلالية والتحكم في المساحة لكن المقابل إنك بتتحمل التكلفة كاملة بنفسك

طب ليه الناس بتتكلم عن الموضوع دلوقتي؟

لإن مع ارتفاع تكاليف المعيشة بقى الفرق أوضح.. لما الأسعار تزيد الشخص اللي عنده دخل واحد بيحس بالضغط أكتر من شخصين بيقسموا نفس الالتزامات 

فببساطة المتجوز أو اللي ساكن مع حد مش بيشتري حياة أرخص.. هو بس بيقسم الفاتورة

أما السنجل

فغالبًا بيدفع تمن رفاهية إنه لوحده ومحدش بيلمس ريموته

في النهاية الـ “Singles Tax” مش معناها إن العزوبية خسارة ولا إن الجواز قرار مالي بس.. هي مجرد ملاحظة اقتصادية

الاستقلال له سعر وأحيانًا أغلى حاجة في الاستقلال إنك تدفع كل حاجة لوحدك