برشلونة وأتلتيكو.. عداوة قديمة اتظلم فيها ألفاريز

من ساعة ما بدأت شائعات انتقال خوليان ألفاريز من أتلتيكو مدريد لبرشلونة والدوري الإسباني بيتفرج على واحدة من أعقد وأطول أزمات الانتقالات في المواسم الأخيرة.. دي مش مجرد صفقة عادي اتعطلت دي بقت خناقة إدارية مفتوحة بين ناديين من كبار إسبانيا وكل يوم بيطلع فيها تصريح جديد ينكد على التاني.

الحكاية بدأت إزاي؟

ألفاريز انضم لأتلتيكو مدريد سنة 2024 من مانشستر سيتي بصفقة وصلت لـ75 مليون يورو وسريعاً بقى من أهم لاعبي فريق سيميوني.. برشلونة من ناحيته كان بيدوّر على بديل طويل المدى لروبرت ليفاندوفسكي اللي قرب على الأربعين واسم ألفاريز كان على رأس قايمة برشلونة من شهر يناير الماضي.

المشكلة إن أتلتيكو من البداية رفض يفتح باب التفاوض وده خلى الموضوع يتعقد أكتر حتى ألفاريز نفسه لما اتسأل في يوليو قال كلام يفهم منه إنه هو شخصياً حابب الانتقال يحصل لمصلحة الكل وفي وقت كأس العالم في يونيو صرح إنه عايز “يحقق حلمه” في تلميح واضح إنه عايز يمشي لبرشلونة.

من هنا بدأت الأزمة الحقيقية

أتلتيكو ما سكتش على الكلام ده وقدم شكوى رسمية للاتحاد الإسباني لكرة القدم ضد برشلونة متهمينهم إنهم بيلاحقوا اللاعب بطريقة مش لائقة وهو لسه لاعب في الفريق.. برشلونة من ناحيته وحسب تصريحات الرئيس جوان لابورتا كان قدم عرض رسمي بيتخطى الـ100 مليون يورو، لكن العرض فضل على الطاولة من غير رد.

الأزمة كبرت أكتر لما الرئيس التنفيذي لأتلتيكو ميجيل أنخل خيل مارين هاجم أسلوب برشلونة في متابعة الصفقة علناً وأكد إن ألفاريز مش هيتباع لبرشلونة طول ما هو موجود في منصبه.. الرد جه من نائب رئيس برشلونة رافا يوستي اللي وصف الكلام ده بإنه غير لائق وقال إن أتلتيكو تخطوا خط أحمر.. القصة وصلت لحد إن أتلتيكو أصدر بيان رسمي أكد فيه إنه مفيش أي تفاوض حصل ولا هيحصل مع برشلونة على اللاعب ووجه اتهامات مباشرة لبرشلونة بعدم الالتزام بالأصول المهنية والأخلاقية في التعامل.

الجمهور بقى ضد ألفاريز نفسه

المفارقة الغريبة إن اللي دفع التمن مش بس الإدارتين ده الجماهير كمان قلبت على اللاعب نفسه.. في أول ظهور له الموسم ده مع أتلتيكو قدام فياريال الجمهور استقبله بصفارات وهتافات غضب من لحظة ما اسمه اتقرا على السماعات ولما نزل الملعب في الدقايق الأخيرة الاستقبال كان أسوأ وفي نهاية الماتش لاعبي أتلتيكو راحوا يحيّوا الجماهير لكن ألفاريز مشى في الاتجاه المعاكس دخل الجراج على طول وسيميوني قال بعد كده إن القرار ده جه من النادي نفسه مش من ألفاريز شخصياً.

آرسنال كمان دخل على الخط كخيار بديل لكن حتى كتابة هذا الموضوع والصفقة لسه معلقة قبل غلق سوق الانتقالات في أول سبتمبر من غير أي حل واضح في الأفق.

طب أصل العداوة بين النادين جاي منين؟

عداوة برشلونة وأتلتيكو مدريد مالهاش نفس العمق التاريخي والسياسي بتاع الكلاسيكو مع ريال مدريد لكنها عداوة رياضية بحتة اتبنت بمرور الوقت.. أول مواجهة رسمية بين الفريقين كانت سنة 1929 في الدوري وأتلتيكو فاز فيها 4-1 و من ساعتها والفريقين بيتقابلوا بانتظام وبرشلونة عنده الأفضلية في عدد الانتصارات على مدار التاريخ.

لكن العداوة الحقيقية ظهرت لما أتلتيكو بقى منافس على لقب الليجا مش بس على المراكز المتقدمة.. أشهر لحظتين في التاريخ الحديث بين الفريقين كانوا موسمي 2014 و2015 في 2014 أتلتيكو توّج بطل للدوري بالتعادل مع برشلونة في ملعب الكامب نو نفسه وفي السنة اللي بعدها بالظبط برشلونة رد الجميل وحسم اللقب بفوزه في ملعب أتلتيكو بهدف من ميسي.

فرق الأسلوب كمان له دور كبير في تغذية العداوة برشلونة اتشهر بطريقة “التيكي تاكا” وكرة الاستحواذ والمهارة الفردية بس أتلتيكو تحت قيادة سيميوني اشتهر بركن الباص والطابع القتالي.. الفرق ده في الفلسفة خلى كل مواجهة بينهم حتى في المباريات العادية بتتحول لاختبار حقيقي بين مدرستين مختلفتين تماماً في الكورة.

طب ليه لابورتا نفسه في خناقة مستمرة مع أتلتيكو؟

الخلاف بين لابورتا وأتلتيكو مش بسبب صفقة ألفاريز بس في الحقيقة فيه توتر متراكم من قبل كده.. في أبريل اللي فات بعد ما برشلونة خرج من ربع نهائي بدوري أبطال أوروبا قدام أتلتيكو حصل توتر كبير جوه برشلونة بخصوص أداء التحكيم في المباراة وده وصل لحد إن لابورتا دخل في نقاش شديد مع مسؤول في يويفا في ملعب المتروبوليتانو نفسه بعد نهاية الماتش وبعدين تواصل شخصياً مع رئيس يويفا يشتكيله من قرارات معينة أثرت في نتيجة المباراة.. يعني قبل ما تبدأ أزمة ألفاريز أصلاً كانت العلاقة بين الطرفين متوترة بسبب ملفات تانية غير الانتقالات.

ولما جت أزمة ألفاريز لابورتا حافظ في الأول على نبرة دبلوماسية نسبياً وقال إنه بيحترم رأي الجميع في أتلتيكو لكنه في نفس الوقت أكد إن صبر برشلونة مالوش نهاية مفتوحة ومع تصاعد الهجوم من جانب خيل مارين بدأ لابورتا يرد بشكل أقوى وقال كلام معناه إن النادي الكبير مش قادر يتحمل وجود لاعب مش مبسوط جواه في إشارة غير مباشرة لحالة ألفاريز مع أتلتيكو.

الموضوع ده مش أول مرة يحصل بين الفريقين

الطريقة اللي بتتصرف بيها الإدارتين دلوقتي من شكاوى رسمية للاتحادات لحد الاتهامات العلنية سبق وحصلت بالظبط بين نفس الفريقين قبل كده.. في صيف 2019 وقع برشلونة مع أنطوان جريزمان قادم من أتلتيكو بعد ما دفع شرط الرحيل اللي كان وقتها 120 مليون يورو وكان ساعتها واحد من أساطير أتلتيكو.. أتلتيكو رفض يعترف بالصفقة بالشكل ده وقال إن جريزمان والاعبيه كانوا متفقين مع برشلونة من وقت كان فيه شرط الرحيل أعلى بكتير 200 مليون يورو وقبل ما ينزل السعر رسمياً.. على أساس ده أتلتيكو قدم شكوى رسمية للرابطة الإسبانية للمحترفين ولحد الدوري نفسه وطالب بفرق مبلغ إضافي يقارب الـ80 مليون يورو.

الخلاف ده فضل مستمر لفترة لحد ما الطرفين اتفقوا وديّاً بعدها بأشهر على تسوية اتضمنت إن برشلونة ياخد حق أولوية شراء عدد من لاعبي أتلتيكو في المستقبل بدل غرامة مالية مباشرة والغريب إن نفس جريزمان ده رجع تاني لأتلتيكو سنة 2021 بعد ما تجربته في برشلونة ما نجحتش زي المتوقع.

يعني القصة الحالية مع ألفاريز مش حاجة جديدة على العلاقة بين الفريقين لكنها بتكرر نفس السيناريو اللي حصل مع جريزمان شرط رحيل.. اتهامات بتحرك مبكر من برشلونة شكوى رسمية من أتلتيكو وحرب تصريحات علنية بين الإدارتين قبل ما توصل الأمور لحل.