بعد وفاة RJ Mitte.. إيه هو الشلل الدماغي اللي جسده في Breaking Bad وعاش معاه في الحقيقة؟

امبارح توفي الممثل الأمريكي “RJ Mitte”.. المعروف بدور والتر وايت جونيور في مسلسل Breaking Bad.. الشخصية اللي شوفنا معاناتها مع الشلل الدماغي.. وهي نفس الحالة اللي عاش معاها “RJ”

اتشخص “RJ” بالشلل الدماغي وهو عنده 3 سنين.. وخلال طفولته كان بيعمل علاج طبيعي ووظيفي.. واستخدم دعامات تساعده على الحركة.. لكن حالته ما كانتش عائق قدام حلمه في التمثيل.. بالعكس استغل الشخصية وشهرته في التوعية بالشلل الدماغي

طيب إيه هو الشلل الدماغي؟

الشلل الدماغي هو مجموعة من الاضطرابات اللي بتأثر على قدرة الشخص على الحركة والحفاظ على التوازن الجسم

بيحصل الشلل الدماغي نتيجة نمو غير طبيعي للدماغ أو تعرض الدماغ في مرحلة النمو للتلف.. والشلل الدماغي أكثر أنواع الإعاقات الحركية انتشارًا بين الأطفال

وبتختلف أعراض الشلل الدماغي من شخص للتاني.. فبيحتاج الشخص المصاب بحالة شديدة لمعدات تساعده على المشي.. أو في حالات مايقدرش يمشي خالص وبيحتاج لرعاية خاصة طول حياته.. أما في الحالات الأبسط بيكون في قدرة على المشي بس بطريقة مش متناسقة شوية

والشلل الدماغي مش بتزيد خطورة حالته مع الوقت.. لكن الأعراض ممكن تتغير بشكل بسيط على مدار حياة المريض

أنواع الشلل الدماغي:

بيصنف الدكاترة الشلل الدماغي على أساس نوع اضطراب الحركة الأساسي اللي بيعاني منه المريض.. وحسب مناطق الدماغ المتأثرة  ممكن يظهر اضطراب حركي واحد أو أكتر من الاضطرابات دي:

• تيبس العضلات، ويُعرف بالتشنج العضلي (Spasticity)
• الحركات اللاإرادية (Dyskinesia)
• ضعف التوازن والتناسق الحركي (Ataxia)

وفي أربعة أنواع رئيسية من الشلل الدماغي:

1. الشلل الدماغي التشنجي (Spastic Cerebral Palsy)

دي النوع المنتشر أكتر.. بيكون عند حوالي 80% من الأشخاص المصابين بالشلل الدماغي

بيعاني المصابون بيه من ارتفاع في توتر العضلات.. يعني عضلاتهم بتكون متيبسة.. وده بيخلي حركاتهم مش متناسقة أو صعبة

2. الشلل الدماغي الحركي اللاإرادي (Dyskinetic Cerebral Palsy)

بيعاني المصابون بالنوع ده من صعوبة التحكم في حركات الإيدين والرجلين.. وده بيخلي القعود والمشي صعب

والنوع ده له كمان حالات فرعية.. بيكون فيها الحركة لا إرادية.. فممكن  تكون بطيئة أو سريعة.. وأحيانًا بيتأثر الوجه واللسان كمان.. وده بيخلي في صعوبة في البلع والكلام

3. الشلل الدماغي الترنحي (Ataxic Cerebral Palsy)

بيعاني المصابون بالنوع ده من مشكلات في التوازن والتناسق الحركي.. فبيكون عندهم صعوبة في أداء الحركات السريعة أو الحركات اللي بتحتاج تحكم عالي.. زي الكتابة أو إنهم يمسكوا الحاجات

4. الشلل الدماغي المختلط (Mixed Cerebral Palsy)

وده لما بيعاني المريض  من أعراض بتنتمي لأكتر من نوع من أنواع الشلل الدماغي

الأعراض

العلامة الرئيسية اللي قد تشير لإصابة الطفل بالشلل الدماغي هي تأخره في اكتساب المهارات الحركية.. عشان كده بيكون ضروري متابعة إيه الحركات اللي المفروض يكون الطفل قادر يعملها في أول سنتين

والأعراض بتختلف من شخص للتاني.. وبتكون:

• الإعاقة الذهنية
• نوبات الصرع
• مشكلات في الرؤية أو السمع أو الكلام
• تغيرات في العمود الفقري زي الجنف (اعوجاج العمود الفقري)
• مشكلات في المفاصل زي التقلصات العضلية والمفصلية

الأسباب المحتملة كتير

وكان الاعتقاد السائد زمان أن الشلل الدماغي بيحصل بشكل أساسي بسبب نقص الأكسجين أثناء الولادة.. لكن دلوقتي العلماء لاحظوا أن نقص الأكسجينمسؤول عن نسبة صغيرة بس من الحالات

والنمو غير الطبيعي للدماغ أو التلف اللي بيسبب الشلل الدماغي ممكن يحصل قبل الولادة أو خلالها أو خلال الشهر الأول بعد الولادة.. أو في السنوات الأولى من حياة الطفل لأن بيكون دماغه لسه في مرحلة النمو

والحالات المرتبطة بنمو الدماغ غير الطبيعي أو التلف اللي بيحصل قبل الولادة أو خلالها الشلل الدماغي الخِلقي (Congenital Cerebral Palsy).. ونسبته بين 85% و90% من إجمالي الحالات.. ومش بيكون السبب معروف

والنسبة الأصغر بتحصل بسبب نمو غير طبيعي للدماغ أو تلفه بعد 28 يوم من الولادة.. وبيتسمى الشلل الدماغي المكتسب (Acquired Cerebral Palsy).. وبيرتبط بنوع من العدوى زي التهاب السحايا أو إصابة في الرأس

العلاج

مفيش علاج بيشفي تماما من الشلل الدماغي لحد دلوقتي.. ومفيش علاج واحد مناسب لكل الأطفال المصابين بالشلل الدماغي.. وعلى حسب تقدير الحالة بيكون العلاج بين:

• الأدوية
• الجراحة
• الدعامات والأجهزة المساعدة
• العلاج الطبيعي
• العلاج الوظيفي
• علاج النطق والتخاطب

لكن اكتشاف الحالة بدري وبدء العلاج بسرعة مهم وبيساعد على تحسين حياة المصابين بيه