نصائح عشان تعرف إزاي تـMove On من أي علاقة
الحٌب هو الغاز.. الغاز الذي نشعل به البوتاجاز.. لا خلينا نتكلم بجد، الحب زي ما هو ممكن يكون سبب سعادتك وانبساطك في الحياة وبس ده لو أنت في علاقة هادية وصحية مع شريكك اللطيف، بس أحيانا ممكن الشريك ده يكون مش لطيف، بيتصرف تصرفات مش عجباك ومش بيوفي بوعده في تغييرها، شخص مؤذي.. شخص بيعمل بلاوي وهيوديك معاه في داهية.. أو مش بيبادلك نفس الشعور بالحب أصلا، زي ما تكون ضربت مشوار لدهب 8 ساعات في شهر أغسطس ولما وصلت ملقتش كامب فاضي.
طيب هل هنفضل قاعدين نبكي على الأطلال ونغني مشيت على الأشواك؟ ولا نبدأ نشوف طرق تخلينا نتوقف عن حب الشخص ده؟ أكيد هتحتاج توقف نبع الحب اللي فايض منك تجاه شخص مش مهتم بيك أو بيتصرف تصرفات مش عجباك أو مش بيحبك أصلا، ولذلك موقع Healthline وموقع Very Well Mind بيقولنا في مقال على نصائح لإزاي تـ Move on من علاقة زي دي.
1- الشجاعة رقم 1 في الموضوع ده
محتاج تجيب كوباية القهوة أو الشاي بتاعتك وتفكر بعقلانية لو أنت في علاقة زي دي، أه ممكن نتفائل أن بكرة أحلى وبتاع والدنيا هتبقى كويسة ولكن ده خيال ممكن مايبقاش له مكان على أرض الواقع، وهنا بنحتاج التفكير بشكل واقعي لو مثلا في علاقة “فريندزونيه”، هل أنت في الفريندزون؟ إجابتك نعم صح؟ طيب خلاص أنت كده أدركت، ولو أنت مع شخص بيأذيك، ممكن تصرفاته دي تساعدك على إنهاء العلاقة وتتغلب على مشاعرك.. يعني ابدأ خد العلاقة من منظور جديد.
2- شوف حد قريب منك وفضفض له
الموضوع ده له طريقين، يا يكون في حد من عائلتك أو أصدقائك تتكلم معاه وتاخد نصيحته وتفكروا سوا وخصوصا اللي مروا بنفس الموضوع، أو إنك تشوف حد متخصص يساعدك على إتخاذ قرار في الموضوع ده.
3- بفكرك.. الموضوع ممكن ياخد وقت
زي فؤاد المهندس في فيلم عائلة زيزي لما فضل شغال على مشروعه لحد ما بدأت تطلع قماش، الموضوع مش زرار هتدوس عليه ولكن من خلال خطوات هتفضل تاخدها وتستمر فيها وده هياخد وقت ومش مهم وقت طويل ولا قصير، المهم إنك توصل للنتيجة النهائية اللي أنت عايزها والهدف منها هو إنك تسيطر على مشاعرك.
4- بص معايا كده لنص الكوباية المليان
زي ما قولنا في النقطة اللي فاتت إن الموضوع ممكن ياخد وقت بس فكر كده، المستقبل أكيد هيبقى أحسن وممكن تكون مع شخص تانى أفضل من الحالي، وأنت تجربتك الحالية علمتك أنت عايز إيه ومش عايز إيه.. ركز على دي كويس عشان ماتكررش نفس التجربة.
5- عايزين نعدي بقى المرحلة دي
لو فضلت “محشور” مع شخص مخلي العلاقة مؤذية والشخص نفسه مؤذي، أو في علاقة مع شخص مش بيحبك، ده ممكن يخليك ماتحسش بالسعادة مع أي شخص تاني هتقابله وخلال رحلتك في الـ Moving on اتعرف على ناس جديدة ده ممكن يخليك تشوف ناس أحسن من شريكك السابق.
6- ابعد ابعد ابعد
أنت ممكن من جواك تكون خلاص قدرت تكون جاهز نفسيًا على تجاوز الشخص ده وتقول نسيت وكده ولكن مجرد رسالة قصيرة ولا بصة على البروفايل ترجع كل حاجة زي الأول، فماتبعتش رسالة، متتصلش لو مفيش حاجة عاجلة أو مهمة، طالما مثلا مش شغالين في نفس المكان فا كل ده تجنبه.
لو كان الشخص ده من ضمن شلة أصدقاء وإنتوا كنتوا صحاب قبل كده بتخرجوا وكده، وقف الخروج وشوف ناس تانية تخرج معاها، الحفاظ على الصداقة شيء مهم وبيدل على نضج الطرفين ولكن مش دلوقتي، ماتبوظش اللي أنت بتعمله.
7- هانت
مشاعر الحب كده كده هتتلاشي ومش هتستمر ولكن دي زي ما قولنا مش عملية سريعة ولكن فيه حاجات ممكن تعملها زي إنك تفكر لو صديق جالك في نفس موقفك هتقوله إيه؟ تقبل حقيقة إن الموضوع ممكن يكون مؤلم ليك ومش مريح ولكن برضه فكر في نفس الوقت إن الألم مش هيستمر للأبد ولكل حاجة في نهاية.
في النهاية يا جماعة، لازم نقول إن العلاقات مش لازم يكون فيها حد وحش وحد كويس، ممكن تكونوا إنتوا الاتنين كويسين بس مش هتقدروا تتعايشوا سوا، وإنه أكيد لو شخص مابادلكش نفس الشعور ده مش معناه إنه وحش أو أنت لا سمح الله وحش برضو، وفي الحالتين، أي وضع في أي علاقة مش هتريحك لازم تبدأ تغيره يا إما بالتفاهم والمناقشة مع الطرف التاني.. يا إما تبدأ تاخد خطوة إنك تـ Move on من العلاقة دي من أجل صحة نفسية أفضل اللي هي رقم 1 بالنسبالك وأهم من أي شيء وأي شخص.
