10 حقايق عن صفات مواليد شهر سبتمبر 

مواليد شهر سبتمبر صعب نلاقي كلام يوصفهم طبعا وده لإن ليهم أفضل مواقف وعندهم أحسن طريقة كلام، وبيقدروا يخلوا الناس يقعوا في حبهم بسرعة من خلال الكلام معاهم بس، وبمناسبة شهر سبتمبر قررنا نحتفل بمواليد شهر سبتمبر فجمعنا صفات مواليد سبتمبر حسب ما قال موقع “just web world”:

1- مؤدبين جدا جدا:

لو سمعت كلمة “لا” منهم فأكيد هيكون بأسلوب مؤدب جدا، وده لإنهم بيخافوا يأذوا الناس برفضهم.

وبيقدروا يقنعوا الناس برأيهم وصعب جدا حد يرفضه، وعشان كده ممكن يبقوا محاميين ومدرسين كويسين جدا لإنهم مباشرين.

2- بيحبوا الحقيقة:

مابيحبوش الأوهام والخيال ودايما موجودين على أرض الواقع، وبيقبلوا المواقف زي ما هي بسهولة جدا وده السبب في إنهم بيتصرفوا بشكل ممتاز في المواقف الصعبة.

عارفين إيه الصح وحاسمين موقفهم فيه جدا ومابيتعبوش في التفكير في إيه الصح والغلط كتير.

3- بيقدروا الجمال:

بينجذبوا دايما للحاجات الجميلة سواء كانت حية أو غير حية زي بيت حلو مثلا أو هدوم حلوة، وبيدعموا الجمال لأعلى مستوى وبيقدروه، وده السبب في إنهم ناس حساسة ورومانسية.

4- عندهم قلق مفرط:

أغلب مواليد سبتمبر بيعانوا من مشكلة الـ “Overthinking” أو التفكير الزيادة في أي حاجة، وعشان كده بيبقى عندهم قلق مفرط وصعب جدا يبقى بالهم رايق وهادي، وبياخدوا وقت عشان يقدروا يحلوا أي مشكلة.

5- بيحبوا الحاجة تتعمل زي ما هما عايزين:

بيبقوا عايزين الشغل أو أي حاجة تتعمل على طريقتهم مش على طريقة حد تاني، وعشان كده بيحبوا الكمال وأغلب شغلهم بيبقى أقرب للكمال وبغض النظر عن الحاجة اللي هتتعمل فبيعملوها من كل قلبهم.

6- بيعرفوا يحبوا حلو:

هو ده الفخ في شخصية مواليد سبتمبر، بيعرفوا يرضوا شريكهم كويس وطرق التعبير عن الحب بتاعتهم بتاخد وقت عشان تتفهم.

7- بيدوروا على الحماس في كل حاجة:

أحيانًا بيبقى صعب مواكبة مواليد سبتمبر لإنهم بيدوروا على المغامرة في كل حاجة، وبيحتاجوا طاقة من اللي حواليهم عشان يحافظوا على معناويتهم مرتفعة.

8- بيحبوا الأكل:

الأكل هو الحافز بتاعهم عشان يكملوا اليوم، وسهل يرضوا بأي حاجة ممكن تتاكل بس أهم حاجة تبقى سخنة وطازة وهياكلوها ويستمتعوا، وده من أهم الأسباب اللي بتخليهم يحبوا السفر لإن تجربة الأكل الجديد من أهم اهتمامتهم في الحياة.

9- عارفين قيمة العلاقات:

بيعرفوا يديروا العلاقات بشكل كويس وبيكملوا شريكهم بكل الطرق، وبيعرفوا يحقووا التوازن في العلاقة في كل الجوانب سواء كانت في الرومانسية أو في الجد أو في الهزار، ده غير إنهم مابيهربوش من الالتزامات وبيبقوا أزواج كويسين، ومابيقدروش يعيشوا لوحدهم بيحتاجوا دايما لحد يبقى في حياتهم.

10- بيحبوا السفر:

فضولهم هو اللي بيخليهم يحبوا السفر بالشكل ده، وعشان كده ممكن يفقدوا الأمل أو يجيلهم إحباط لو مافيش أي خطط للسفر قريب.

في الأخر مواليد كل شهر ليهم مميزاتهم وعيوبهم بس مواليد سبتمبر ماعندهمش غير مميزات.. هتسأل ليه هنقولك عشان اللي كاتب الموضوع مواليد سبتمبر