LEVEL UP: لعبة Battlefield جاية قريب للموبايل وأخبار تانية عن الفيديو جيمز

مساء الفل، لو أنت مهتم بالجيمز أو جيمر من العيار التقيل، فالموضوع ده هيهمك ودي هتبقى فقرة كل يوم الخميس هنعرض فيها أهم الأخبار اللي بتخص عالم الفيديو جيمز.

Battlefield جديدة للموبايل

البداية مع لعبة “Battlfield Mobile”، ودي هتتوفر السنة الجاية لأجهزة الموبايل، وبدأت اختبارات تشغيل اللعبة على أجهزة الأندرويد بس في إندونيسيا والفلبين، وفي خلال فترة الاختبار هيتم إضافة دول جديدة.

ولكن رغم ذلك مفيش لسه أي تاريخ عن إصدارها بشكل رسمي لحد دلوقتي ولكن هو المفروض يتم طرحها السنة الجاية.

مبتكر لعبة God of War بيتكلم عن لعبة جديدة لبلايستيشن

تاني حاجة وهي إن “ديفيد جافي” مبتكر لعبة “God of War” قال على حسابه عبر تويتر، إن في لعبة جديدة قيد التطوير لبلايستيشن وإن اللعبة دي هتكون مذهلة وهتدهش اللاعبين ولكن للأسف ماكتبش أي تفاصيل زيادة عن ميعاد الإعلان عنها ولكن نأمل إن يكون ده في أقرب فرصة

أخبار جديدة عن Call of Duty: Vanguard

واللعبة المنتظرة “Call of Duty: Vanguard” كل يوم بنسمع عنها أخبار أروع من اللي قبلها، لإن موقع “Call of Duty” أعلن عن إعادة خريطتين من جزء “World at War”، والخريطتين دول هما “Dome” و “Castle”.

ولكن الجزء الأهم واللي هيحبوا لاعبين المنصات المنزلية هو ميزة التعديل على مجال الرؤية أو ما يعرف بالـ”FOV” وده هيكون موجود في “Vanguard”، ولكن لما “أدم إيسكوف” وفريق تطوير اللعبة أعلن عن القصة دي، ماقالش هل ده هيكون لكل المنصات ولا للجيل الجديد بس.

مبتكر PUBG بيفكر في لعبة عالم مفتوح ضخمة

“Brendan Greene” مبتكر لعبة “PUBG”، نشر فيديو عبر حسابه الرسمي على تويتر وقال إنه بيطمح في صنع لعبة عالم مفتوح تكون واقعية ويكون عالمها بيتسع لعدد ضخم من اللاعبين وتكون خرائطها من مئات الكيلومترات.

وقال إن الاستوديو بتاعه ابتكر أداة ذكية جديدة بتسمح بتوليد عوالم ضخمة مختلفة، بتخليك كل مرة بتخش اللعبة تلاقي عالم مختلف.

وأهم حاجة قالها في الفيديو، إن أول مشروع بيعمله هو نسخة تجريبية للعبة واللي ممكن تكون بتلبي طموحه في صنع لعبة عالم مفتوح تكون ضخمة جدا وواقعية، ولكن مكنش فيه أي تفاصيل عن ميعاد إطلاق النسخة التجريبية دي وهل متاحة لكل المنصات ولا لا ولكنه يظل خبر مهم وممكن يغير في شكل ألعاب العالم المفتوح لو تم صنع لعبة بالشكل ده.

وإلى هنا أعزائي الجيمرز تنتهي فقرتنا ليوم الخميس، وإستنوا الخميس الجاي هنتابع الأخبار اللي اتكلمنا عنها النهاردة وعن ألعاب تانية ولو في ألعاب تانية بتحبوها أو حابين تعرفوها أخبارها، إبقوا اكتبولنا في الكومنتس.

Related Articles

Back to top button