أكتر 10 أشخاص منحوسين في العالم! 

احتمال كبير تبقى مش مؤمن بحكاية الحظوظ وإن فيه حد حظه حلو وحد حظه وحش فعلا.. بس زي ما فيه ناس ممكن تكسب اليانصيب من غير أي اجتهاد وبيبقى عشان بس حظهم حلو فيه ناس بتخسر فلوس كتير عشان بس حظهم وحش.. وبعد انتشار فيديو لحرامي سرق موبايل مراسل اليوم السابع ووشه طلع في كاميرا الموبايل بالتفاصيل خلينا نقولك إنه مش هو الشخص الوحيد اللي حظه وحش بالشكل ده في العالم وفيه ناس كتير كان حظهم أوحش وذكرهم موقع “casino” في واحد من مقالاته وهما:

1- “كوستيس ميتسوتاكيس”:

هو صانع أفلام يوناني، كان عايش في قرية إسبانية صغيرة وكل سكان القرية اشتركوا في شراء تذكرة يانصيب في احتفالات رأس السنة في 2011 وهو كان الشخص الوحيد اللي ماشاركش في تذكرة اليانصيب، وفازت التذكرة دي بـ 922 مليون يورو وهو كان الشخص الوحيد الخسران في القرية اللي عدد سكانها كان حوالي 250 شخص.

2- “مارتين توت”:

ومن ضمن الناس الغير محظوظة في اليانصيب، في أمريكا سنة 2001 فيه شخص اسمه “مارتين توت” ومراته “كاي” اشتروا تذكرة يانصيب وطلعت هي التذكرة الفايزة بس اكتشفوا إنهم ضيعوا التذكرة وطبعا راحت عليهم الفلوس.

3- “روي سوليفان”:

وده أكتر واحد اتضرب من البرق لإن البرق ضربه حوالي 7 مرات في حياته، وبقى في موسوعة جينيس للأرقام القياسية لإنه أكتر شخص نجا من ضربات البرق في التاريخ وفي فترة غير مسبوقة خصوصا إن اتعرض لضرب البرق 4 مرات في 5 سنين بين سنة 1969 لسنة 1973.

4- “جايسون وجيني كيرنز لورانس”:

ودول أكتر زوجين بينحسوا أي بلد بيرحوها، في 2001 كانوا في نيويورك وقت حادثة 11 سبتمبر، وفي 2005 زاروا لندن وكان وقتها البلد بتعاني من سلسلة تفجيرات انتحارية، وفي 2008 قرروا يزوروا مومباي وحصل وقتها هجوم على المعالم في البلد.. وده بيقولك إنك لما تتخانق مع أهلك أو صحابك وأنت مسافر يعتبر ولا حاجة عادي.

5- “فيوليت جيسوب”:

وهي ممرضة إيرلندية أرجنتينية وكانت مضيفة على سفينة “RMS Titanic” و HMHS” Britannic” لما غرقوا في أوائل القرن العشرين، وكانت على سفينة “RMS Olympic” لما اتعرضت لحادثة تصادم في البحر، وبالرغم إن ده ممكن يخلي بعض الناس ماتشوفش البحر طول عمرها إلا إنها رجعت تشتغل على السفن تاني في سنة 1920.

6- “جون لين”:

هو شخص اتعرض لـ 16 حادثة كبيرة في حياته من ضمنهم إنه وقع من على ضهر حصان ومن عربية ودهسته تريله ووقع في حفرة واتصعق وحوادث ألغام وحوادث عربيات ووقع من على شجرة ودراعه اتكسر، والأصعب إن وهو راجع من المستشفى اتعرض لحادثة أتوبيس.

7- “آن هودجز”:

هي مواطنة في ألاباما وكانت بتشتغل راح خبطها نيزك وهي شغاله، ويقال إنها الشخص الوحيد اللي اتصاب من نيزيك أو اتصاب بصخرة فضائية عموما على الأرض، والحادثة كانت غريبة لإن النيزك خبط في سقف البيت بتاعها فكسر الراديو ورد خبطها في فخدها.

8- “إريك نوري”:

أكتر الأشخاص المحظوظة وغير المحظوظة في نفس الوقت، لإنه نجا من لدغة تعبان وهجوم سمكة قرش وهجوم قردة وضربة برق.. إريك فقد جزء من رجله بسبب هجوم سمكة القرش لكن والده أنقذه، وبالرغم إنه محظوظ عشان عاش إلا إنه منحوس برضه عشان احتمال التعرض لهجوم القرش قليل جدا.

9- “جون واد اجان”:

هو سواق تاكسي حياته عبارة عن سيناريو فيلم لإنه اتعرض لضربة برق وسرقة تحت تهديد السلاح وطعن ولدغات تعبان كتير.

10- “تسوتومو ياماغوتشي”:

وهو رسميًا الناجي الوحيد من القنبلة الذرية اللي انفجرت في اليابان في هيروشيما وناجازاكي في الحرب العالمية الثانية، و كان “تسستومو ياماغوتشي” عنده 29 سنة بس لما نجى من الموت مرتين في 3 أيام وهو على بعد 2 ميل بس من مكان القنبلة في 6 أغسطس، “ياماغوتشي” عاني من ثقب في طبلة ودنه وحروق في الجزء العلوي من جسمه، ولما قرر يرجع بلده الأصلية اتقبض عليه في الانفجار التاني في 9 أغسطس، وعاش بعد كده لحد عمر 93 سنة.