٧ حاجات بتحصل في جسمك في الشتاء

البرد أغلب الوقت بيخلينا قاعدين في البيت، ودرجة الحرارة القليلة بتخلينا أكتر عرضة للالتهابات والفيروسات وأغلب الوقت الشتاء بيأثر على جسمنا بطريقة مفاجأة، ويمكن مش كل التأثير بيبقى ضار، بس جسمنا بيتفاعل مع البرد بطريقة مختلفة.. خلينا نقولك إزاي الشتاء بيأثر على جسمنا زي ما قال موقع “Bright side” في واحد من مقالاته:

1- الشتاء بيخلي لسانك يشتغل أكتر:

درجة الحرارة القليلة أو البرد بيتسبب إن شفايفك تنشف أسرع وبالتالي هتضطر كتير تبل شفيفك بلسانك بالرغم إن ده بيساعد على راحة مؤقتة، إلا إن العادة دي ممكن تخلي شفايفك تتقطع أكتر أو تتشقق لإن اللعاب بيتبخر بسرعة وبيخلي شفايفك تجف أسرع، خصوصا إن اللعاب فيه إنزيمات قاسية على شفايفك وبتخليك تحس بعدم الراحة.

2- سنانك بتوجعك:

لو كانت سنانك حساسة فممكن تحس بألم جامد لما يكون الجو بارد لإن الهوا الساقع ممكن يوصل للأعصاب العميقة داخل الأسنان وهيتسبب في إصابة سنانك بالألم، وعشان كده الدكاترة بينصحوا إن الشخص يتنفس من مناخيرة لما يكون الجو ساقعة أو يلفوا “سكارف” على بوقهم عشان يخلوا أسنانهم دافية ويحموها من الحساسية في برد الشتاء.

3- ارتفاع نسبة السكر في الدم:

الجو البارد بيشجع الجسم على إفراز هرمونات التوتر اللي بتزود مستويات السكر في الدم، وبالنسبة لناس كتير بسبب انخفاض درجة الحرارة بيرتفع السكر في الدم وبيقل الحافز للخروج وممارسة الرياضة لإن النشاط البدني كمان بيقلل نسبة السكر في الدم عشان كده أغلب الدكاترة بيوصوا إن الناس تمارس رياضة أو تمارين في البيت في الشتاء عشان يحافظوا على مستويات السكر في الدم.

4- ممكن تخس:

في حين إن الشائع هو إن الناس بتتخن في الشتاء إلا إن الساقعة بتسبب زيادة في حرق السعرات الحرارية، لإن لما الجو بيكون ساقعة الجسم بينتج حرارة وده محتاج طاقة زيادة، ولما الشخص بيترعش بيحرق سعرات حرارية أكتر عشان يولد حرارة.

5- زيادة التجاعيد:

أكيد مش هنلوم علي الشتاء بسبب التجاعيد لكن بشرتنا بتبقى عرضة للتلف أكتر في البرد لإن الجلد بيجف بسبب انخفاض الرطوبة في الهوا خلال البرد، والجسم مابيحتفظش بكمية كافية من المياه والنتيجة إن البشرة بتبقى جافة أكتر وعرضة لتجاعيد أزيد.

6- نظرك بيتدهور أكتر:

ممكن عينك بتكون عرضة أكتر للخطر في الشتاء من الصيف لإننا بننسى نلبس نضارات شمس، لكن الرياح والهوا الجاف بيخلي العين تجف وبيسبب ألم في العين، عشان كده بعض الدكاترة بينصحوا ببعض القطرات في الشتاء لترطيب العين.

7- عرضة للجفاف أكتر:

خلال شهور الشتاء نادرا ما بنحس بالعطش وغالبا ببنسى نشرب كمية كافية من المياه، خصوصا إننا بنعرق بشكل أقل في البرد وبنشرب كميات مياه أقل وبنبقى مش حاسين إن جلدنا وجسمنا محتاج ترطيب، لكن الإحساس الأقل بالعطش مش معناه إن جسمك مش محتاج مياه عشان كده مهم تشرب مياه في الشتاء حتى لو مش حاسس إنك عطشان.